Mga 3,000 ka kauturan naton ang nakigbahin sa espesyal nga pangpubliko nga pagpanaksi sa lugar nga hiwatan sang Pan American Games kag Parapan American Games sa Lima, Peru. Ini nga hampang, nga nagsugod sang Hulyo 26, 2019, kag matapos sa Septiembre 1, may sobra 8500 ka atleta kag sobra sa 250,000 ka turista ang ginabulubanta nga magaabot.

Ang mga kauturan nagplastar sang 100 ka cart sa 53 ka lokasyon para mabantalaan ang madamo nga bisita. May mga literatura sa lenguahe nga Aymara, English, French, Portuguese, Quechua (Ayacucho), kag Spanish. Sa mga cart, may mga video sa Peruvian Sign Language para sa mga bisita nga apa kag mahina ang palamatin-an.

Si Brother Kemps Moran Hurtado, nga nagabulig para maorganisar ini nga kampanya, nagsiling: “Sa sini nga paagi sang pagbantala, sarisari nga mga lahi kag kultura ang mabantalaan naton, kay ari sa sini nga okasyon ang mga tawo halin sa bilog nga kalibutan. Importante gid ang pangpubliko nga pagpanaksi sa aton hilikuton nga pagtudlo sing Biblia. Kay man, makita sang mga tawo ang mga Saksi ni Jehova nga nagabantala sa publiko nga mga lugar.”

Gusto gid naton nga mabalitaan ang resulta sining ginpasangkad nga pagpanaksi. Nagasalig kita nga padayon nga pakamaayuhon ni Jehova ang hilikuton sang aton kauturan sa Peru samtang padayon sila nga nagabantala bisan diin nga may tawo.—Binuhatan 17:17.