Halin sang Mayo 1 asta Agosto 31, 2019, ang branch sa Peru nag-organisar sang isa ka pinasahi nga kampanya sa pagbantala para mapaambit ang mensahe sang Biblia sa mga Peruvian nga nagahambal sing Aymara, ang lenguahe sang mga nitibo. Nangin madinalag-on gid ini nga kampanya. Nakahatag sing 7,893 ka mga literatura ang mga kauturan kag nakapatan-aw sila sang mga video sing mga 2,500 ka beses. Pagkatapos sang kampanya, naumpisahan sang mga kauturan ang 381 ka pagtuon sa Biblia.

Ginabulubanta nga 450,000 ang nagahambal sing Aymara sa Peru. Halos 300,000 sa sini ang nagaistar sa rehiyon sang Puno. Subong, may 331 ka mga manugbantala nga nagahambal sing Aymara sa pito ka kongregasyon kag walo ka grupo. Bangod kalapad gid sang lugar nga kinahanglan bantalaan kag gamay lang ang mga manugbantala sa Peru nga nagahambal sing Aymara, nagbulig sa kampanya ang mga manugbantala nga halin sa Chile nga nagahambal man sing Aymara. Para malab-ot ang mga tawo nga nagahambal sing Aymara, kon kaisa kinahanglan magtaklad ang mga kauturan sing asta 5,000 ka metro (16,404 ka pie) sa ibabaw sang nibel sang dagat kag magbantala sa temperatura nga zero degrees Celsius (32ºF).

May isa ka grupo sang mga kauturan nga nagbiyahe sang pila ka oras pakadto sa isa ka lugar diin may mga tawo halin sa malapit nga banwa nga nagatipon para sa lubong. Ginbantalaan nila ang mga tawo parte sa paglaum sang mga patay nga ginatudlo sang Biblia. Bangod sang ila panikasog nga mapaambit ang makapaumpaw nga mensahe sang Biblia, ginpasalamatan sila sang lokal nga mga awtoridad kag sang pamilya sang napatay.

Sa isa naman ka lugar, nakilala sang mga kauturan ang isa ka grupo sang mga tawo nga nagatipon sing duha ka beses kada semana para magtuon sang Biblia. Nadiskobrehan sang mga kauturan nga ginagamit sang amo nga grupo ang mga libro nga Ang Pinakabantog nga Tawo nga Nagkabuhi kag Ang Akon Libro sang mga Sugilanon sa Biblia, nga ginhatag sang isa nila ka paryente nga nagaistar sa Bolivia. Sang nabal-an nila nga ginbalhag sang aton organisasyon ini nga mga libro, madamo sa ila ang nagtuon sa Biblia upod sa mga utod kag nagtambong sa aton mga miting.

Si Brother Albert Condor, isa ka gulang nga nagadumala sa isa ka grupo, nagsiling: “Nalipay gid kami sang akon asawa kay nakaupod kami sa sini nga kampanya. Nagbakod gid ang amon pagtuo kay Jehova bangod sang nagabiyahe kami, indi kami sigurado kon makalab-ot gid kami sa banwa nga kadtuan namon kay kabudlay gid sang alagyan. Sang nakaabot na kami, nangamuyo kami kay Jehova nga buligan kami nga makapangita sing madayunan. Kag ginbuligan gid niya kami. Ang amon mga pangamuyo nagpabakod gid sa akon, kag napalig-on gid ako nga makita nga nagasalig gid ang mga kauturan kay Jehova.”

Nalipay gid ang mga kauturan nga mapaambit ang nagahatag-kabuhi nga tubig sang kamatuoran halin sa Pulong sang Dios sa mga tawo nga nagahambal sing Aymara sa Puno, Peru.—Bugna 22:17.