Ang una nga mga misyonero nga gin-asayn sa Peru nakalab-ot diri sang Oktubre 1946. Nadiskobrehan sini nga mga misyonero ang tuman ka lapad nga lugar para bantalaan. May ara ini pito ka milyon ka pumuluyo nga nalapta sa mga 1.3 ka milyon ka kilometro kuadrado nga duta. Sang nagligad nga 75 ka tuig, nagpanikasog gid sa ila pagbantala ang mga misyonero kag ang lokal nga mga manugbantala sa Peru. Kag nakita gid nila nga sigesige ang pagdamo sang mga tawo nga nagabaton sang kamatuoran, sa mga baryo man sa kabukiran ukon sa mga siudad nga malapit sa baybayon.

Sa mga tinuig antes nag-abot ang mga misyonero, ang mga Saksi ni Jehova halin sa South America nagakadto na kon kaisa sa Lima, ang kapital sang Peru, para magpanagtag sing publikasyon sa mga interesado. Ang iban nga nakabaton sini nga mga publikasyon nag-alagad kay Jehova. Sang 1945, duha ka misyonero halin sa Chile ang nagkadto sa Lima para bawtismuhan ang una nga tatlo ka Saksi ni Jehova sa Peru.

Halin sang Oktubre 1946, may mga misyonero nga nakaeskwela sa Gilead nga gin-asayn sa Peru para organisahon ang hilikuton didto. Ginhiwat nila ang una nga miting upod sa mga interesado sa Rimac district sang Lima. Samtang nagadamo ang lokal nga mga manugbantala kag nagadamo man ang mga misyonero, ang pagbantala ginhimo man sa gua sang Lima. Kag padayon ini nga nagauswag asta subong.

Si Sister Nellena Pool, nga isa sa una nga mga misyonero nga nag-abot sang 1946, nagsugid parte sa pag-uswag sang hilikuton sa Peru sa istorya sang iya kabuhi. Mabasa ini sa Marso 1, 1957 nga The Watchtower. Sia nagsiling: “Indi ko masaysay ang akon balatyagon sang nakita ko nga ang duta nga sang una daw desyerto ‘nagpamukadkad nga daw rosas.’”

Si Sister Irene Mannings, nga naggradweyt sa ika-54 nga klase sang Gilead naga-alagad gihapon asta subong sa Peru. Sia nagsiling: “Sugod sang nag-abot kami diri nakita namon ang pagdamo sang mga manugbantala halin sa 7,000 asta sa sobra 130,000. Isa gid ka pribilehiyo nga nakaamot ako sing gamay sa sini nga pag-uswag. Nangin posible ini tanan bangod sa pagpakamaayo ni Jehova.”

Ang 133,170 ka manugbantala subong sa Peru nagapasalamat gid sa pagbantala nga ginhimo sa sini nga pungsod 75 ka tuig na ang nagligad. Ang kasaysayan sang mga Saksi ni Jehova sa Peru isa pa gid ka pamatuod nga nagakatuman ang promisa ni Jehova sa Isaias 60:22: “Ang diutay mangin isa ka libo kag ang gamay nga pungsod mangin gamhanan.”