Sang Enero 12, 2020, ang bulkan nga Taal sa Batangas nagbuga sang abo nga mga 14 kilometros ang kataason. Ang mga awtoridad nagpaandam sa linibolibo ka mga tawo nga nagaistar malapit sa bulkan nga posible ini maglupok kag mahalitan sila. Nagmando ang mga awtoridad nga magbakwit ang tanan nga malapit sa bulkan, nga isa sa pinakaaktibo sa pungsod.

Sobra 500 ka kauturan ang ginsaylo sa mga lugar nga wala sing peligro pareho sa mga Kingdom Hall kag mga balay sang iban nga kauturan. Wala sing utod nga nasamaran. Ang Komite sang Sanga nag-asayn sang Disaster Relief Committee para atipanon ang tanan nga kinahanglanon sang mga utod nga nagbakwit.

Ginapangamuyo naton nga ang aton mga kauturan magpadayon sa pagsalig kay Jehova, ang “aton dalangpan kag kusog.”—Salmo 46:1-3.