MAYO 12, 2020
PHILIPPINES
Ginabuligan sang Kongregasyon ang Apa kag Bulag nga Sister sa Sining Tion sang Pandemic
Si Sister Cynthia Pablo isa ka 64 anyos nga di-bawtismado nga manugbantala sa Panghulo Sign-Language Congregation sa Pilipinas. Apa sia kag bulag, kag pigado pa. Nagaistar sia upod sa iya indi-Saksi nga mga paryente sa isa ka bahin sang Valenzuela City nga nagaginutok ang mga pamalay. Mabudlay ang sitwasyon ni Cynthia kag ginpalala pa gid ini sang pandemic, pero wala gid sia ginpabay-an sang mga kauturan sa iya kongregasyon.
Si Brother Ilumin nga nagasakay sa iya motor para magdul-ong sang linabhan kag iban pa nga suplay kay Cynthia
May edad na si Cynthia, gani mas daku ang tsansa nga malatnan sia sang COVID-19. Sang nagsugod ang pandemic, nangin problema man ang tubig sa ila lugar kag daw indi na sia halos makapanglaba sang iya mga bayo. Antes sang pandemic, ginabuligan sia sang mga sister sa iya kongregasyon sa pagpanglaba. Pero indi na nila ini mahimo subong kay indi na sila makakadto sa iya balay.
Si Brother Walter Ilumin, nga isa ka gulang sa kongregasyon ni Cynthia, nakakuha sang espesyal nga quarantine pass nga ginhatag sang gobierno para makadtuan niya si Cynthia sa ila balay kag maatipan sia. Ini nga quarantine pass ginahatag lamang sa mga frontliner. Ginalabhan ni Walter ang mga bayo ni Cynthia, kag ginadal-an sia sang pagkaon kag sang iban pa niya nga mga kinahanglanon. Estrikto gid nga ginasunod ni Walter ang tanan nga ginapatuman sang gobierno, lakip ang pagsuksok sang mask kag pagpanghinaw pirme sang iya mga kamot.
Para pasalamatan ang mga kauturan, nagahimo si Cynthia sang malip-ot nga mga video, dayon ginapakita ini ni Brother Ilumin sa mga kauturan sa kongregasyon.
Si Cynthia nga nagabantala antes sang pandemic
Ginakadtuan man ni Brother Ilumin si Cynthia sa ila balay para i-interpret paagi sa tactile signing ang mga miting sang kongregasyon nga ginahiwat paagi sa videoconference. Bangod sini, makakomento sing regular si Cynthia sa Pagtinuon sa Ang Lalantawan sang kongregasyon. Ang iya mga komento nagapalig-on gid sa mga kauturan nga nagatambong sa miting sa sining mabudlay nga tion.
Kabalo kita nga nalipay gid si Jehova nga makita ang iya katawhan nga nagapaumpaw kag nagabulig sa isa kag isa, ‘labi na gid samtang nakita naton nga malapit na ang adlaw.’—Hebreo 10:24, 25.
