Sang Enero 7, 2020, gintay-ug sang magnitude 6.4 nga linog ang Puerto Rico, kag ginsundan ini sang ginatos ka mahinay nga mga linog kag aftershock. Sang aga sang Enero 11, naglinog liwat sa isla kag may kabaskugon ini nga magnitude 5.9.

Madamo sa naapektuhan nga mga lugar ang wala gihapon sing kuryente kag nagaistar sa gua sang ila mga balay. Ginkompirmar sang branch sa United States nga wala sing nasamaran ukon napatay sa aton mga kauturan. Pero 248 sa ila ang naghalin sa ila mga balay. Dugang pa, 8 ka balay sang mga kauturan ang naguba gid kag 70 ka iban pa nga balay ang nahalitan. Nahalitan man ang 10 ka Kingdom Hall. May isa ka Disaster Relief Committee na, upod ang isa ka manugtatap sang sirkito, nga nagaorganisar sang bulig kag naga-shepherding sa mga kauturan nga naapektuhan.

Bisan pa mabudlay ang ila sitwasyon, ang aton mga kauturan nagapadayon gihapon sa ila espirituwal nga mga hilikuton. Si Brother Robert Hendriks, nga nagaalagad sa Public Information Desk sang United States branch office, nagsiling: “Indi anad ang mga taga-Puerto Rico sa amo sini nga klase sang kalamidad, gani nabalaka gid ang mga kauturan bangod sang mga linog. Pero, sang nakita namon nga wala gid sila maluyahan sing buot, napalig-on gid kami. Asta sa masarangan nila, padayon sila sa paghiwat sang mga miting kag sa pagbantala bisan pa wala sila sing kuryente ukon tubig. Kapisan gid sang mga gulang sa pag-shepherding, pagpalig-on, kag pagbulig sa tanan nga nagakinahanglan.”

Napalig-on gid kita kay bisan pa gin-agyan sang kalamidad ang aton mga kauturan, wala gid nila ginpabay-an ang espirituwal nga mga butang. Ginapangamuyo naton nga padayon sila nga hatagan ni Jehova sing kalinong sang panghunahuna.—Salmo 119:165.