Sa sulod sang 17 ka tuig, ang aton mga kauturan nagadumala sing pagtuon sa Biblia kada semana sa mga priso sa Jilava Bucharest Penitentiary sa Romania. Sang magsugod ang COVID-19 nga pandemic, indi na sila makakadto sa prisuhan. Pero duha ka semana antes ang Memoryal sang kamatayon ni Jesus sang Marso 27, 2021, nagpasugot ang mga opisyal sang prisuhan nga padayunon nila ang ila pagtudlo sing Biblia paagi sa videoconference. Nagpamangkot man ang aton mga kauturan kon bala puede sila makahimo sing programa para sa Memoryal paagi man sa videoconference. Nagpasugot ang mga opisyal kag 21 ka priso kag 4 ka opisyal ang nagtambong sa Memoryal.

Si Brother Corneliu Cepan ang nagpamulongpulong para sa Memoryal sa Romanian nga lenguahe. Gin-interpret ini ni Brother Angelos Karamplias sa Griego para sa isa ka priso nga Griego ang lenguahe. Nagtambong man ang apat ka opisyal sa prisuhan, pati ang isa sa mga direktor.

Si Brother Cepan nagsiling: “Nabatyagan ko gid nga daku gid nga pribilehiyo ang magpamulongpulong para sa Memoryal. Nagpamati gid sing maayo ang mga priso kag ginpamensar gid nila ang daku nga sakripisyo ni Jesus para sa ila.”

“Nalipay gid kami nga ginbuligan kami ni Jehova nga makabantala sa mga priso kag makahiwat sang Panihapon sang Ginuo,” siling ni Brother Karamplias. “Kabay pa nga sa palaabuton, mas madamo nga priso ang magatambong sa pagtudlo sang Biblia paagi sa videoconference. Kay ini nga mga programa nga base sa Biblia makapaumpaw gid sa ila.”

Nalipay kita nga nagpasugot ang mga opisyal sang prisuhan nga mabatian sang mga priso ang pamulongpulong sa Memoryal.—1 Timoteo 2:3, 4.