Sang Agosto 26, 2023, gindedikar ang Assembly Hall complex sa Turda, Romania, kag ang tatlo ka bilding nga gindugang sa pasilidad sang branch sa Bucharest, Romania. Si Brother Gage Fleegle, miembro sang Nagadumala nga Hubon, ang naghatag sang pamulongpulong sa dedikasyon. May 1,702 nga nag-attend sa Assembly Hall, kag may 14,101 nga nag-tie in paagi sa videoconference.

Sa programa sang dedikasyon, nabatian sang mga nag-attend ang report parte sa kasaysayan sang pagpanukod sang mga pasilidad sang branch sa Romania kag kon paano ginpakamaayo ni Jehova ini nga mga hilikuton. Gin-interbyu man ang mga kauturan nga nag-alagad sa sarisari nga mga construction team. Pagkatapos sang programa, si Sister Iaela Drăghici, nga nagbulig sa konstruksion sa assembly hall sa Turda, nagsiling: “Nalipay gid ako nga makita nga ini nga mga bilding gindedikar kay Jehova para mahimaya sia.” Si Brother Bruce Dyer, isa ka international construction volunteer nga nagbulig sa pagtukod sang gindugang nga bilding sa branch, nagsiling: “Ginaapresyar gid namon ang daku nga pribilehiyo nga makabulig sa konstruksion. Ginapasalamatan gid namon si Jehova sa iya wala tupong nga kaayo!”

Ang bag-o nga bilding sa branch may classroom nga ginagamit subong sa School for Kingdom Evangelizers kag may mga kuarto para sa pamilya Bethel. Makita man sa bag-o nga bilding ang mga opisina para sa translation, Kingdom Hall, kag ang main lobby sang branch. Makaigo sa sulod sang bag-o gindedikar nga Assembly Hall ang 1,200 ka tawo kag sa gua makaigo ang 1,350 ka tawo. Ginagamit ini sang mga 15,000 ka kauturan halin sa sarisari nga lugar sang pungsod.

Pagkadason nga adlaw, Agosto 27, bilang sugpon sang programa sa dedikasyon, may ginhiwat nga pagtilipon sa isa ka stadium sa siudad sang Cluj-Napoca. May 23,968 ang nag-attend sa programa sing face-to-face. Ang programa gin-translate sa English, Hungarian, Romanian Sign Language, Romany (Romania), Russian, Russian Sign Language, kag Ukrainian. Gin-broadcast ini sa tanan nga kongregasyon sa Romania kag Ukraine. Sa kabilugan may 121,411 tanan nga nakatambong.

Nalipay kita upod sa aton mga kauturan sa Romania nga ini nga mga bilding nadedikar na para kay Jehova kag padayon nga magasuporta sa putli nga pagsimba.—Isaias 2:3.