HULYO 20, 2020
ROMANIA
Gindayaw sang Meyor sa Romania ang Aton Pagbulig sa Aton mga Kauturan
Sang Hunyo 2020, ang banwa sang Rodna sa Transylvania, Romania, nakaeksperiensia sang mabaskog nga mga pag-ulan kag pagbaha. Bilang resulta, anom ka balay sang aton mga kauturan ang nahalitan. Sang Hunyo 27, 2020, ang manugtatap sang sirkito sa Rodna nagpanghikot upod sa mga gulang didto kag sa 25 ka kauturan halin sa tatlo ka malapit nga kongregasyon, para gilayon nga mabuligan ang mga naapektuhan sini nga kalamidad. * Ang pagbuligay sang mga kauturan nasaksihan sang meyor sang Rodna kag gindayaw niya sila paagi sa media.
Ang banwa sang Rodna isa ka lugar nga madamo sing suba, amo nga sang nagbaha grabe nga lunang kag bun-od ang nagbara sa mga karsada. Bangod sini, halos wala na sing maagyan pakadto sa banwa. Ang balay sang isa naton ka sister ara sa lugar diin ang meyor sang Rodna kag ang iya team nabudlayan gid magkuha sang lunang kag bun-od. Sang mag-abot ang mga kauturan, ginbuligan nila ang team sang meyor para makaagi sila pakadto sa balay sang sister para tinluan ini. Gani indi lang ang sister ang ila nabuligan kundi pati man ang mga awtoridad.
Gindayaw gid sang meyor ang mga kauturan sang gin-interbyu sia sa isa ka estasyon sang TV. Nagsiling sia: “Gusto ko isugid ang isa ka dalayawon nga halimbawa nga nagpabilib gid sa akon. . . . Sang una nga adlaw, naggamit kami sang dump truck kag backhoe, pero wala kami nakatapos bangod grabe gid ang agi sang baha nga dapat tinluan. Pagkaaga, ginbuligan kami . . . sang sobra 30 [ka tawo] nga mga Saksi ni Jehova nga nagboluntaryo. Gani pagkagab-i nakatapos gid man kami.” Nagsiling pa sia: “Nagbulig gid ini nga mga tawo para matinluan ang lugar. Ginapasalamatan ko gid sila tanan!”
Nag-post man ang meyor sang mensahe para sa mga kauturan sa isa ka website. Nagsiling sia: “Kabay nga si Jehova sa langit magapakamaayo sa inyo tanan kag magahatag sa inyo sing malawig nga kabuhi, maayong-lawas, kag maayo nga mga butang sa palaabuton!”
Ini nga eksperiensia sa Romania isa pa gid sa mga halimbawa nga nagapakita nga ang aton maayo nga paggawi nagahimaya sa aton Amay sa langit nga si Jehova.—1 Pedro 2:12.
^ Bisan pa gin-untat anay ang kalabanan sa mga proyekto nga pagpangkay-o bangod sa pandemic, ining ginbahaan nga mga balay dapat gid kay-uhon gilayon.
Basi Manamian Ka Man
MGA PIRME GINAPAMANGKOT
Nagabulig Bala ang mga Saksi ni Jehova sa Tion sang Kalamidad?
Hibalua kon paano kami nagabulig sa tion sang kalamidad sa mga Saksi kag sa iban.
PAGBULIG SA KOMUNIDAD
Kon May Trahedya, Ginapahulag Kami sang Gugma nga Magbulig
Sa madamo nga pungsod, ang mga Saksi ni Jehova nagabulig sa tion sang trahedya.
MGA PIRME GINAPAMANGKOT
Paano Ginasuportahan sang mga Saksi ni Jehova ang Ila Hilikuton?
Wala namon ginasunod ang paagi sang madamo nga relihion.