Sang Pebrero 10, 2021 nagdesisyon ang Abinskiy District Court of the Krasnodar Territory nga guilty si Brother Aleksandr Ivshin. Ginsentensiahan sia nga mapriso sing pito ka tuig kag tunga. Amo ini ang pinakamalawig nga sentensia para sa isa sa aton mga kauturan sugod sang gin-ban sang Supreme Court ang aton hilikuton sang 2017.

Aleksandr Ivshin

• Natawo: 1957 (Katav-Ivanovsk)

• Biograpiya: Antes sia magretiro, nag-obra sia bilang isa ka lathe operator, manugtroso, kag industrial safety engineer. Nagpakasal sila sang iya asawa nga si Galina sang 1974. May duha sila ka bata nga babayi kag walo ka apo

  Sang nagmasakit sia sing grabe, ginpamensar niya kon ano ang katuyuan sang kabuhi. Sa tapos niya mabasa ang tatlo sa apat ka Ebanghelyo sa isa lang ka gab-i, nagsugod sia sa pagtuon sa Biblia. Ginbawtismuhan sia sang 1995

Sang 2015 pa nagsugod ang mga kaso batok sa mga Saksi ni Jehova sa Abinsk. Ang Local Religious Organization sang mga Saksi ni Jehova didto gintawag nga “extremist” kag gin-ban. Pagligad sang lima ka tuig, sang Abril 23, 2020, ginpasakaan sing kaso kriminal si Brother Aleksandr Ivshin. Lakip sa iya mga “krimen” ang pag-organisar sang relihioso nga pagtilipon paagi sa videoconference kag pagkanta sang mga Kingdom song.

Gin-raid sang mga awtoridad ang balay ni Aleksandr kag ni Galina. Bangod sa stress nga resulta sang pag-raid, gin-high blood sila nga duha kag nabutang sa katalagman ang ila kabuhi. Pagligad sang pila ka bulan, ginkumpiskar ang salakyan ni Aleksandr. Bisan pa sa sini nga kabudlayan, positibo gihapon si Aleksandr. Sa iya katapusan nga mensahe sa korte, sia nagsiling: “Wala na ako natingala kon ngaa ginkasuhan ako kag nagaatubang sa korte subong, kay gintagna na ini ni Jesus. Ang Mateo 10:18, nagasiling: ‘Kag dalhon kamo sa atubangan sang mga gobernador kag mga hari tungod sa akon, agod makapanaksi kamo sa ila kag sa mga pungsod tuhoy sa akon.’ . . . Ang ginsiling ni Jesus wala nagpaluya sa akon. Wala, kundi nagpalipay ini sa akon, kay masugid ko sa korte ang paglaum nga nagahulat sa mga tawo nga nagahunahuna sang ila espirituwal nga kinahanglanon.”

Si Aleksandr kag si Galina nagabuylog man sa mabaskog nga tingog sang daku nga pagpanaksi nga ginahimo sa Russia kag sa bilog nga kalibutan. Kabalo kita nga pakamaayuhon gid sila bangod nagasalig sila kay Jehova.—Jeremias 17:7.