Sa Enero 27, 2021, a ipahibalo sang Nadezhdinskiy District Court of the Primorskiy Territory ang desisyon sini sa kaso ni Brother Vladimir Filippov. Mahimo sia mapriso sing anom ka tuig kag tunga.

Vladimir Filippov

• Natawo: 1943 (Oktyabrskiy, Novosibirsk Region)

• Biograpiya: Napatay ang iya amay sang World War II antes sia natawo. Naggradweyt sia sa Tomsk Artillery School sang 1964 bilang isa ka lieutenant. Ginpangasawa niya si Lyubov sang 1967. Nangin soldado sia sa sulod sang 27 ka tuig antes sia nagretiro

  Sang magtuon sa Biblia ang iya asawa sang 1994, nagtuon man sia. Dungan sila nga nabawtismuhan pagkadason nga tuig

Sang Agosto 2017, ginsugdan sang mga awtoridad ang sekreto nga pagrekord sang audio kag video ni Brother Filippov kag sang iban pa nga kauturan sa Razdolnoye. Sa sulod sang pila ka bulan, sekreto man nila nga ginrekord ang mga pamulongpulong ni Vladimir sa mga miting kag ang iya pag-istorya parte sa Biblia sa iya mga kaingod.

Sang Hulyo 19, 2018, gin-raid sang armado nga mga agent sang Federal Security Service (FSB) nga may tabon ang mga guya, ang balay sang mag-asawa nga Filippov. Si Vladimir, nga 75 anyos sadto, ginsumbag nila sa guya, ginpahapa sa salog, gingapos nga nakabaklid, kag ginhalughog nila ang iya apartment. Duha pa ka beses liwat nga gin-raid ang ila balay, sang Agosto 2019 kag sang Enero 2020. Pagkatapos sang ikaduha nga pagpang-raid, ginpasakaan si Vladimir sing kaso kriminal.

Kabay nga padayon nga hatagan ni Jehova sing kusog kag kabaskog ang aton mga kauturan para makapabilin sila nga matutom kag malipayon!—Isaias 40:29, 31.