SEPTIEMBRE 23, 2021
RUSSIA

Ang Anom ka Sister kag Isa ka Brother nga Ginkasuhan Nagasalig Gid kay Jehova kag sa Ila mga Kauturan

I-PLAY

Time Line

Sa indi madugay ipahibalo sang Leninskiy District Court of Vladivostok ang desisyon sini sa kaso nanday Sister Nadezhda Anoykina, Sister Lyubov Galaktionova, Sister Nailya Kogay, Sister Nina Purge, Sister Raisa Usanova, Sister Yelena Zayshchuk, kag Brother Valentin Osadchuk. a Ang mga sister nagaedad sing 63 asta sa 86 anyos. Wala pa sing may ginsiling ang piskal kon ano nga sentensia ang gusto niya sa sini nga kaso
Enero 19, 2021

Ang kaso ginsaylo sa Leninskiy District Court of Vladivostok
Nobiembre 12, 2019

Ang kaso ginbalik sa opisina sang piskal
Abril 5, 2019

Pagkatapos sang 274 ka adlaw nga pagkapriso sa pretrial detention center, ginpagua si Valentin. Pero naka-house arrest sia gihapon. Sia lang ang brother nga nalakip sa sini nga kaso
Abril 19, 2018

Gin-raid sang mga agent sang Security Service (FSB) ang mga balay sang pito ka Saksi
Abril 9, 2018

Ginpasakaan sang kaso sang Investigation Department of the FSB for the Primorsky Territory si Valentin kag ang anom pa ka sister

Impormasyon Parte sa Ila

Lyubov Galaktionova

Natawo: 1942 (Vladivostok)

Biograpiya: Nag-obra sia bilang sekretarya asta nga nagretiro sia. Nakapamana sia sang 1962. Pagligad sang 14 ka tuig, napatay ang iya bana. Gani sia ang nagpadaku sa ila bata nga lalaki. Tinuig na sia nga may ginabatyag sa iya panglawas, gani madamo na sia sang indi masarangan himuon bangod sa iya kasablagan

Ginpaligban niya kon ano ang katuyuan sang kabuhi kag kon ngaa nagakapatay ang mga tawo. Nakita niya ang makapaumpaw nga sabat sa iya mga pamangkot sang nagtuon sia sing Biblia upod sa mga Saksi ni Jehova. Nabawtismuhan sia sang 1998

Ang Iya Ginsiling

Ano ang imo mga ginapangabay kay Jehova sa sining mabudlay nga mga tion?

Nangamuyo ako nga buligan niya ako nga mangin kalmado. Ginpangabay ko man si Jehova nga buligan ako nga magpaubos, para mapakita ko pirme ang mga kinaiya sang isa ka Cristiano bisan pa indi maayo ang pagtrato sa akon. Ginpangamuyo ko man nga hatagan ako sing kusog nga mabatas ini nga paghingabot.

Nailya Kogay

Natawo: 1951 (Tashkent, Uzbekistan)

Biograpiya: Nagdaku sia upod sa iya duha ka utod nga lalaki. Sang bata pa sia, mahilig sia sa sports. Pagkatapos niya sa college, nangin civil engineer sia. Retirado na sia subong. Napamana niya si Robert sang 1975. May duha sila ka bata. Sang 1989, nagmasakit si Robert kag kinahanglan niya nga may mag-atipan sa iya sa tanan nga tion. Nagsaylo sila sa Vladivostok sang 2003

Sang nagtuon sia upod sa mga Saksi ni Jehova, nakumbinsi sia nga ang Biblia amo gid ang Pulong sang Dios. Naapresyar niya ang ginatudlo sang Biblia kag ang gugma sang Dios. Nabawtismuhan sia sang 1997

Ang Iya Ginsiling

May ginhambal bala ang isa ka utod sa kongregasyon sa imo nga nakabulig sa imo nga makabatas?

Madamo nga mga sister ang nagasiling sa akon: ‘Maayo ka gid nga halimbawa para sa amon. Proud gid kami sa imo. Bangod nabatas mo ang mga paghingabot, buot silingon mabatas man namon ini!’

Valentin Osadchuk

Natawo: 1976 (Ukraine)

Biograpiya: Nagaobra sia bilang sales manager. Kilala sia nga honest, pursigido, kag mapisan. Nanamian sia maglagawlagaw sa gua

Nabawtismuhan sia bilang isa sa mga Saksi ni Jehova sang 1998

Ang Iya Ginsiling

Paano nakabulig ang imo naeksperiensiahan para magbakod pa gid ang imo relasyon kay Jehova?

Mas nga nabatyagan ko gid ang bulig ni Jehova kag ang kabakod sang aton paghiliutod. . . . [Halimbawa,] sadto ko pa naintiendihan ang pila ka importante nga butang: Indi ako dapat mahadlok kon ipahilayo ako sa akon mga paryente, kon madula ang akon mga pagkabutang, ukon kon pakahuy-an ako sa komunidad. Pero sang natabo ini tanan kag ginpriso ako, [nakita ko nga] ginbuligan gid ako sang akon Dios nga si Jehova sa mga paagi nga wala ko gid ginpaabot.

Nina Purge

Natawo: 1940 (Pesok, Pskov Region)

Biograpiya: May isa sia ka manghod nga lalaki. Nagdaku sia sang tion sang World War II. Sang 1942, ginsakop sang German nga mga soldado ang ila lugar. Ang ila pamilya diutayan lang gid ginpatay sang mga Nazi

Ginkasal sila sang iya bana samtang nagaeskwela pa ang iya bana sa Estonian Maritime Academy. May duha sila ka bata. Nagsaylo ang ila pamilya sa Vladivostok sang didto gin-asayn ang iya bana

Sang ulihi nga mga tinuig sang dekada ’90, nagtuon sia sing Biblia upod sa mga Saksi ni Jehova. Natun-an niya nga makasalig gid sia nga buligan sia pirme sang Dios. Nabawtismuhan sia sang 1999

Ang Iya Ginsiling

Paano nakabulig ang imo naeksperiensiahan para magbakod pa gid ang imo relasyon kay Jehova?

Mas nga nagbakod ang akon pagsalig kay Jehova. Ginpangabay ko sia nga hatagan ako sing kusog nga makabatas asta sa katapusan kag padayon nga mangin mainunungon sa iya. Kag ang Isaias 41:13 nakabulig sa akon nga mangin maisog, kay nabatyagan ko gid ang bulig sang akon Amay [sa langit]. Handa ako bisan ano man ang matabo sa akon.

Raisa Usanova

Natawo: 1947 (Kuznetsovo)

Biograpiya: Nagdaku sia upod sa iya tatlo ka utod nga lalaki kag isa ka utod nga babayi. Pagkatapos niya sa hayskul, nagsaylo sia sa Vladivostok agod mag-training para mangin isa ka railway technician. Nakapamana sia kag may duha ka bata nga babayi. Nagtrabaho sia bilang drayber sang trolleybus sa sulod sang 25 ka tuig. Retirado na sia subong

Sang 2000, sa tapos nga mapatay ang iya nanay, ang iya utod nga babayi, kag ang isa niya ka utod nga lalaki, ginpaligban niya kon ngaa nagakapatay ang mga tawo kag kon bala may paglaum pa ang mga napatay. Nakita niya ang maathag kag makapakumbinsi nga sabat sa iya mga pamangkot sang nagtuon sia sing Biblia upod sa mga Saksi ni Jehova. Nabawtismuhan sia sang 2002

Ang Iya Ginsiling

Ano ang natun-an mo sa sini nga pagtilaw nga makabulig sa imo sa magaabot pa nga mga kabudlayan?

Natun-an ko ang pagpugong sa kaugalingon, ilabi na sa akon ginahambal. Natun-an ko man nga magbatas kag magsalig pa gid kay Jehova. Gindugangan ko man ang akon tion sa pagtuon sang Biblia. . . . Gusto ko gid nga mangin matutom asta sa katapusan.

Ano ang ginahimo mo bilang paghanda engkaso mag-abot ang paghingabot?

[Gintinguhaan ko nga] pamalandungan ang mas madamo nga mga teksto nga ‘ipahanumdom’ sa akon sang espiritu sa tion nga kinahanglan ko ini.—Juan 14:26.

Napalig-on gid kita sa halimbawa sang aton mga kauturan sa Russia. Ginapamatud-an gid nila nga may pagtuo sila nga nagatipig sang ila kabuhi.—Hebreo 10:39.

a Ang petsa sang desisyon sang korte wala pirme ginapahibalo sing abanse.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE