Sa Disiembre 9, 2022 nga sulat sang Secretary General of the Council of Europe (COE) sa Minister of Foreign Affairs sang Russia, ginpangabay niya ang Russia nga tumanon ang pinakabag-o nga mga desisyon sang European Court of Human Rights (ECHR). Nalakip sa sini ang importante nga desisyon nga ginhimo sang Hunyo 2022 nga nagasiling nga ilegal ang pag-ban sang Russia sa mga Saksi ni Jehova. a

Ang sulat nagpahanumdom sa Russia nga bisan indi na ini miembro sang COE sugod sang Marso 2022, obligasyon gihapon sang gobierno nga tumanon ang tanan nga desisyon nga ginhimo sang ECHR antes kag asta sa Septiembre 16, 2022. Dugang pa, ang pagpatuman sa mga desisyon sang Korte padayon nga bantayan sang Committee of Ministers sang COE.

Halin sang ginhimo ang desisyon sang Hunyo 2022, ginmanduan sang Committee ang Russia nga baliskaron ang desisyon sang Supreme Court sang 2017 nga naga-ban sang relihioso nga mga hilikuton sang mga Saksi ni Jehova. Ginsilingan man sang Committee ang Russia “nga rebyuhon ang kasuguan sini parte sa anti-extremism nga nagasiling nga extremist ang organisasyon sang mga Saksi ni Jehova . . . ; nga untaton ang tanan nga kaso batok sa mga Saksi ni Jehova kag paguaon ang mga napriso, dulaon sing bug-os ang ila criminal record, kag ibalik ang tanan nga propiedad sang mga Saksi nga ginkuha sang gobierno ukon magbayad sang danyos para sa sini.” b

Subong, sobra 660 sa aton mga kauturan ang ginmultahan ukon ginpriso bilang resulta sini nga pag-ban bangod lamang sa paghimo nila sang mga hilikuton sang ila relihion. Sobra 360 sa ila ang napriso, diin 114 pa ang ara sa prisuhan ukon sa pretrial detention.

Sobra 450 ka kauturan ang gindugang sang gobierno sang Russia sa listahan sang mga extremist kag mga terorista. Mabudlay gid ini sa ila kag sa ila pamilya. Ini nga listahan makita sang publiko, kag kon ara ka sa sini nga listahan maguba ang imo reputasyon. Gani madamo ang indi makakita sang obra. Dugang pa gid sa mga kabudlayan kay indi nila makuha ang ila kuarta sa banko, indi sila makakuha ukon maka-renew sang mga insurance policy, makabaligya sang propiedad, makanegosyo, makabaton sang palanublion, ukon bisan magbakal sang SIM card sang cell phone.

Nalipay gid kita nga padayon nga ginatinguhaan sang COE nga mahatagan sang hustisya ang aton mga kauturan sa Russia. Samtang wala pa ini, ang mga kauturan sa bilog nga kalibutan napalig-on gid sang regular nga mga report sa jw.org parte sa pagtuo, kaisog, kag kalipay sang aton mga kauturan sa Russia. Salamat gid sa bulig ni Jehova.—Filipos 1:12-14.