Sang Hunyo 7, 2022, ang European Court of Human Rights (ECHR) nagpagua sang importante nga desisyon a batok sa Russia bangod sa paghingabot sini sa mga Saksi ni Jehova. Nagsiling ang ECHR nga ilegal ang pag-ban sang Russia sa mga Saksi ni Jehova sang 2017. Naghambal man ang Korte nga ilegal ang pag-ban sang naimprinta nga mga publikasyon kag sang jw.org. Ginmanduan sini ang Russia nga untaton ang tanan nga naka-pending nga hearing batok sa aton mga kauturan kag paguaon ang tanan nga kauturan nga ara sa prisuhan. Ginmanduan man ang Russia nga ibalik ang tanan nga ginkumpiskar nga mga propiedad ukon magbayad sang 59,617,458 ka euro ($63,684,978 U.S.) bilang danyos sa ginkumpiskar nga mga propiedad. Ginapabayad man ang Russia sang 3,447,250 ka euro ($3,682,445 U.S.) bilang danyos para sa mga Saksi nga ginkasuhan ukon sa ila mga organisasyon nga gin-ban.

Ini nga desisyon para sa 20 ka kaso halin sang 2010 asta sa 2019, nga nagalakip sa 1,400 ka Saksi nga ginkasuhan ukon sa ila mga organisasyon nga gin-ban. Pero, ini nga desisyon sang ECHR indi lang para sa ila kundi sa iban pa nga apektado. Nagsiling man ini, nga ang Russia “dapat maghimo sang tanan nga kinahanglanon nga tikang para mauntat ang tanan nga naka-pending nga kaso batok sa mga Saksi ni Jehova . . . kag paguaon ang tanan nga Saksi ni Jehova nga ginkuhaan sang ila kahilwayan.” (Kami ang nag-italics.) Ini nga desisyon nagapamatuod nga indi guilty ang mga kauturan sa sulod kag sa gua sang Russia, kag mga pumuluyo sila nga matinumanon sa kasuguan nga ginkasuhan kag ginpriso bisan wala sila sing sala.

Sa desisyon sang ECHR, ginkontra sini ang wala sing basihan nga panumbungon sang Russia nga extremist ang aton mga ginahimo, mga pagpati, mga publikasyon, kag ang aton website. Halimbawa, talupangda ang pila ka bahin sang desisyon:

• Mga ginahimo: Ginpatalupangod sang ECHR nga ang mga korte sang Russia “wala sing nakita nga tinaga, ginahimo ukon buhat sang mga Saksi nga nagapakita nga mapintas sila, nagadumot ukon may diskriminasyon sa iban.” (§271)

• Pagpati nga ara sa mga Saksi ni Jehova ang kamatuoran: “Ang pagpanikasog nga kumbinsihon ang iban sa malinong nga paagi nga matuod ang relihion sang isa kag engganyuhon sila nga biyaan ang ‘butig nga mga relihion’ kag mag-entra sa ‘isa nga matuod’ isa ka legal nga paggamit sang kinamatarong sa kahilwayan sa relihion kag kahilwayan sa paghambal.” (§156)

• Pagpatughong sing dugo: “Ang pagpangindi nga magpatughong sing dugo isa ka ekspresyon sang kahilwayan sa pagdesisyon sang isa ka miembro sang komunidad nga nagagamit sang iya personal nga kinamatarong parte sa pagpabulong nga ginakilala sang Convention kag sang kasuguan sang Russia.” (§165)

• Pagpangindi nga magsoldado bangod sa konsiensia: “Ang pagpangindi nga magsoldado bangod sa relihion wala nagalapas sa bisan ano nga kasuguan sang Russia. (§169)

• Aton mga publikasyon: “Ang mga ginahimo sang mga Saksi bangod sa relihion kag ang unod sang ila mga publikasyon nagasanto sa ila ginapatihan nga doktrina nga indi maghimo sang kapintas.” (§157)

• JW.ORG: Napamatud-an sang Korte nga ang unod sang jw.org indi extremist. Kon may nakita ang mga awtoridad nga wala nila magustuhan nga impormasyon sa website, dapat nila manduan ang organisasyon nga kuhaon ini lamang nga mga seksion imbes nga i-ban ang bilog nga website. (§231 kag §232)

Ini nga desisyon isa ka mabaskog nga pagsaway sa mga awtoridad sang Russia kag nagpamatuod nga may diskriminasyon sila, may pinasulabi, kag “indi sila honest.” (§187) Halimbawa, gindetalye sa sini nga desisyon ang mga butang nga nadiskobrehan sang Korte:

• “Ang puersa nga pagpauntat sang tanan nga relihioso nga organisasyon sang mga Saksi ni Jehova sa Russia indi bangod may nalapas sila sa kasuguan kundi ginapakita sang mga ebidensia nga ginhimo ini sang mga awtoridad sang Russia bangod may diskriminasyon sila sa mga ginahimo sang mga Saksi ni Jehova kag bangod gusto sang mga awtoridad nga biyaan sang mga Saksi ni Jehova ang ila relihion kag gusto nila punggan ang iban nga mag-entra sa sini nga relihion.” (§254)

• Gintugutan sang mga awtoridad sang Russia ang “sala nga mga proseso.” Halimbawa, ginbase sang Supreme Court sang Russia ang desisyon sini sa report sang mga eksperto nga ginpili sang mga pulis kag mga piskal, imbes nga usisaon nila mismo sing patas ang mga publikasyon. (§203)

• Ang kasuguan sa extremism hungod nga ginsulat sa masangkad kag indi maathag nga paagi amo nga makapagusto ang mga awtoridad sa bisan ano nga himuon nila sa mga Saksi ni Jehova. (§272)

Wala pa mahibaluan kon ano ang mangin epekto sang mga desisyon sang ECHR sa Russia. Pero bisan ano man ang matabo, wala kita nagasalig nga buligan kita sang awtoridad sang mga tawo nga mabatas ang aton mga kabudlayan. Sa baylo, ‘nagalaum kita kay Jehova’ bilang ‘aton manugbulig kag aton taming.’—Salmo 33:20.