Ang European Court of Human Rights (ECHR) nagpagua sang duha ka desisyon sang Pebrero 22, 2022, pabor sa 15 ka mga Saksi ni Jehova. Ini nga mga kaso parte sa pagmaltratar sang mga awtoridad sa aton mga kauturan sang gin-raid nila ang mga balay sang mga Saksi sang 2010 asta 2012. Nagdesisyon ang korte nga ginlapas sang Russia ang panguna nga kinamatarong kag kahilwayan sa relihion sang aton mga kauturan. Ginmanduan ang Russia nga magbayad sing danyos nga sobra 99,000 euros ($112,323 U.S.). Indi na puede iapelar ini nga desisyon.

Anom ka kaso batok sa Russia ang nasakop sa sining duha ka desisyon sang Korte. a Ginkuestyon sa sini nga mga kaso kon bala legal ang mga search warrant nga gingamit sang mga awtoridad sang Russia sa pagpang-raid sa pila ka balay kag isa ka Kingdom Hall, sa pagpauba sa aton duha ka sister nga gindakop kay nagbantala, kag sa pagkompiskar sang personal nga mga gamit. Sa pila ka kaso, ini nga mga raid ginhimo sang mga FSB agent nga armado kag may tabon ang guya kag naggamit sing indi makatarunganon nga paagi sa pagdakop.

Kon kaisa, ang mga abogado sang mga Saksi ni Jehova nagakonsulta sa international human rights nga abogado nga si André Carbonneau. Si Mr. Carbonneau nagsiling nga ining importante nga desisyon sang korte “nagpahamtang sing isa ka importante nga sulundan para sa iban pa nga kaso, kag nagapamatuod ini nga ang Russia indi makatarunganon kag ilegal nga nagapang-raid sang mga balay sang mga Saksi ni Jehova, lakip ang 1,700 ka pagpang-raid sugod sang gin-ban ang mga Saksi ni Jehova sang 2017. Subong, ang bisan ano nga pagpang-raid nga himuon sa isa ka balay bangod lamang ang nagaistar sa sini isa sa mga Saksi ni Jehova makabig na nga ilegal kag nagalapas sa European Convention.” Nagsiling pa sia: “Importante gid nga sambiton nga ginakondenar sang Korte ang mga awtoridad sang Russia bangod ginapunggan sini ang mga Saksi sa pagbantala sa mga balay. Ginapakita sini nga para sa ECHR ang pagministeryo bahin sang hilikuton sang isa ka relihion kag indi dapat pagpunggan sang mga awtoridad.”

Bisan pa indi sakop sining duha ka desisyon ang paghingabot sa mga Saksi ni Jehova sa Russia, makabulig ini sa mga korte nga makahimo sing mga desisyon sa ulihi parte sa pag-ban sa aton organisasyon. Masobra sa 60 ka iban pa nga kaso nga nagadalahig sa mga Saksi ni Jehova sa Russia ang pending sa ECHR. Nagalaum kita nga ining duha ka importante nga mga desisyon mangin basihan sang Korte sa iban pa nga kaso.

Nalipay kita tanan nga makita nga ginakilala sang mga awtoridad sang tawo ang mabakod nga integridad sang aton mga kauturan sa Russia. Ini nga mga desisyon pamatuod nga ginapakamaayo ni Jehova ang mga panikasog nga depensahan ang iya ngalan kag suportahan ang iya pagkasoberano.—Salmo 26:11.