Sa indi madugay, ipahibalo sang Ussuriyskiy District Court of the Primorye Territory ang desisyon sini sa kaso ni Brother Vitaliy Ilinykh. a

Vitaliy Ilinykh

• Natawo: 1974 (Ussuriysk, Primorye Territory)

• Biograpiya: Naggradweyt sia bilang isa ka pulis kag nag-obra sa internal affairs department. Nagapalibog sia kon ngaa nagakapatay ang mga tawo kag kon ano ang nagakatabo sa ila sa tapos sila mapatay. Sang tungatunga sang dekada ’90, nagtuon sia sing Biblia upod sa mga Saksi ni Jehova. Nabawtismuhan sia sang 1999. Subong, isa sia ka manugpaninlo sa dalan. Napangasawa niya si Irina sang 2006

Sang Pebrero 2019, gin-raid ang balay ni Brother Vitaliy Ilinykh. Ginhimo ini bangod sa ginpasaka nga kaso kriminal sa mga kauturan naton sa siudad sang Spassk-Dalniy. Sang Septiembre 18, 2019, gin-imbestigahan sang awtoridad sang Russia si Vitaliy. Sang Oktubre 23, 2019, gin-raid liwat ang iya balay, pero sa sini nga tion, gin-aresto na sia kag ginbutang sa detention facility sing duha ka adlaw. Sang ara si Vitaliy sa detention facility nangamuyo gid sia kay Jehova. Nagsiling sia, “Indi ako sigurado kon ano ang matabo sa akon, pero kon mangamuyo ako, nagalinong ang akon hunahuna kag nagakalma ako.”

Sang ginbuy-an na sia, wala sia ginpasugtan nga magbiyahe sa iban nga lugar. Ang iya iloy nga si Sister Olga Opaleva, ginkasuhan man.

Madamo gid sing natun-an si Vitaliy sa iya eksperiensia. “Kabalo ako nga indi gid pagpasugtan ni Jehova nga makaeksperiensia kita sing mga pagtilaw nga indi naton masarangan. Naeksperiensiahan ko gid ina. Mas nagasuod pa gid kita kay Jehova kon makaeksperiensia kita sing grabe nga mga pagtilaw,” siling ni Vitaliy. “Si Jehova ang aton Maninihon. Kon kaisa ginapasugtan niya nga maagyan ko ang mga pagtilaw, pero siempre ginabuligan niya ako nga makabatas kag makatuon sa sini nga pagtilaw. Kag kon pamatyag ko daw indi ko na ini masarangan, nagapangayo ako dayon kay Jehova sing ‘gahom nga labaw sa kinaandan.’”—2 Corinto 4:7.

Mahuluy-on nga tawo si Vitaliy, pero ang pagpamalandong sa 1 Pedro 5:9 nakabulig sa iya nga mangin maisog. Napalig-on man sia sa halimbawa sang madamo nga kauturan sa Russia nga nakabatas sang paghingabot. Si Vitaliy nagsiling: “Bisan ano man ang tugutan ni Jehova nga mangin desisyon sa akon kaso, . . . para sa akon isa gid ka pribilehiyo nga panaksihan ang mga awtoridad sa sining katapusan nga mga adlaw.”

Pareho kay Vitaliy, napalig-on man kita sa pagtuo kag kaisog nga ginpakita sang katawhan ni Jehova. Kag padayon kita nga nagapasalamat kay Jehova kay ginahatagan niya kita sang “tagsa ka maayong butang agod mahimo ang iya kabubut-on.”—Hebreo 13:20, 21.