Si Brother Oleg Danilov kag si Brother Vladimir Ermolaev, Jr., duha lamang sa madamo nga Saksi ni Jehova sa Russia nga ginahingabot subong apang malipayon gihapon. Ining duha ka maisog nga brother napabakod sang kaisog kag pagtuo nga ginpakita sang ila mga paryente sadto.

Ang lolo kag lola ni Oleg nga si Fyodor kag si Yekaterina Rigel nangin mga Saksi ni Jehova sang 1958. Sang ginpadihutan sang gobierno nga hingabuton ang mga Saksi ni Jehova, gin-raid sang mga awtoridad sang Russia ang balay sang mga Rigel, ginkumpiskar ang ila propiedad, kag ginmultahan si Fyodor. Pero bisan amo sina ang natabo, ginbuligan gihapon ni Fyodor ang iya pamilya nga makapadayon sa pagsimba.

Ang mga bata ni Fyodor kag ni Yekaterina, nga si Alfred kag si Ella (iloy ni Oleg) ginyaguta man kag ginhingabot samtang nagadaku sila. Apang malig-on man ang ila pagtuo. Sang ulihi, sang ginpatawag si Alfred para mangin soldado, malig-on sia nga nagpangindi gani tatlo ka tuig sia nga napriso.

Pareho sa iya tiyo nga si Alfred, si Oleg Danilov ginsentensiahan man nga mapriso sing tatlo ka tuig bangod sa iya pagtuo. Napriso sia halin sang Marso 2021, gani indi niya makaupod ang iya asawa nga si Nataliya, kag ang ila duha ka bata nga lalaki nga si Ilya kag si Nikita. Bilang isa ka pamilya, nagasalig ang mga Danilov nga buligan sila ni Jehova nga makabatas, pareho sang pagbulig niya sa lolo kag lola kag tiyo ni Oleg.

Si Oleg nagsiling: “Pirme ko gid ginapensar ang akon mga paryente kag ang iban pa sa Soviet Union nga ginahingabot pero nakabatas kag malipayon gihapon.” Sia nagdugang: “Para sa akon, maathag gid ini nga ebidensia sang gahom sang espiritu ni Jehova. Gani nagasalig ako nga kami sang akon pamilya makabatas man kag mangin malipayon gihapon.”

Ang lola ni Vladimir, Jr. nga si Anna Ermolaeva nakatuon sang kamatuoran sang 1953 sa baryo sang Serebrovo, sa Irkutsk Region. Sia ang una halin sa sina nga baryo nga nabawtismuhan bilang isa sa mga Saksi ni Jehova. Ginpamatukan gid si Anna sang iya mga kaingod kag bisan gani sang iya nanay, nga wala na gid magsapak sa iya.

Sang nabalitaan sang mga awtoridad nga naga-preaching si Anna, gin-akusar sia nga ang iya ginahimo makapalain sa iya bata nga si Vladimir, Sr. Nagsiling pa sila nga kuhaon nila ang iya bata.

Ang mga kauturan sa kongregasyon ni Anna naghimo sang isa ka sulat nga nagapamatuod nga maayo sia nga iloy. Gindala sang isa ka brother ini nga sulat sa Moscow kag gindul-ong ini sa lider sadto nga si Nikita Khrushchev. Maayo gid kay ginpaimbestigahan ni Khrushchev ini nga kaso. Napamatud-an nga wala sing nahimo nga sala si Anna gani wala ginkuha sang awtoridad ang iya bata.

Si Anna may bata nga babayi nga si Nadezhda. Sang 1970, naospital si Nadezhda bangod sa grabe nga sakit sa tiyan. Gin-operahan sia sang mga doktor bisan wala pa mabal-an kon ano gid ang iya balatian. Samtang dalidali sia nga gin-operahan, nagpamilit ang mga doktor nga kinahanglan sia tughungan sang dugo. Pero pareho nga wala nagsugot si Anna kag si Nadezhda kay indi nila gusto nga ikompromiso ang ila pagtuo. Ginbalewala sang mga doktor ang gusto sang mag-iloy kag gintughungan nila si Nadezhda sang dugo nga indi pareho sa iya type. Masubo nga wala madugay, napatay si Nadezhda. Para tabunan ang ila sala, ginkondenar sang lokal nga awtoridad si Anna sa isa ka newspaper nga ginabasa sang madamo nga tawo. Mabasa diri ang sala nga report nga ‘ginsakripisyo ni Anna ang iya bata.’

Ining masubo nga hitabo may wala ginapaabot nga epekto sa bana ni Anna nga si Valentin. Sang una, sugot sia nga tudluan ni Anna sa Biblia ang ila mga bata, pero wala gid sia nagtuon sa Biblia. Pero sang nakita niya nga ginbuligan gid sang iban nga mga Saksi ang ila pamilya sa sining mabudlay nga sitwasyon, nagdesisyon sia nga magtuon sa Biblia kag nangin isa sa mga Saksi ni Jehova.

Ginpadayon nanday Anna kag Valentin ang paghanas sa ila bata nga si Vladimir, Sr., nga sundon ang mga prinsipio sa Biblia. Sang nagdaku sia, napangasawa niya ang isa ka matutom nga sister nga si Lyubov. Sang nagbata sanday Vladimir kag Lyubov kay Vladimir, Jr., gintudluan man nila sia nga palanggaon ang Dios kag sundon ang mga prinsipio sa Biblia.

Sang Pebrero 2020, gin-raid sang mga awtoridad ang balay ni Vladimir, Jr., kag sang iya asawa nga si Valeriya. Gin-aresto si Vladimir, Jr., gin-detain, kag gin-house arrest sing halos duha ka bulan. Subong nagahulat sia sa desisyon sa iya kaso nga pag-organisar sang hilikuton sang isa ka gin-ban nga organisasyon. Kon magdesisyon ang korte nga guilty sia, mahimo sia mapriso asta sa 15 ka tuig. Pero imbes nga magpokus sa mangin sentensia sa iya, ginadumdom ni Vladimir, Jr. ang matutom nga halimbawa sang iya mga ginikanan kag lolo kag lola.

“Isa gid ka pribilehiyo nga mag-antos para sa ngalan sang aton Amay,” siling ni Vladimir, Jr. “Ang akon mga ginikanan kag lolo kag lola nagbatas sing mabudlay nga mga tion kag nagpabilin sila nga matutom. Gusto ko man nga sundon ang ila maayo nga halimbawa.”

Pareho kanday Oleg kag Vladimir, Jr., madamo nga Saksi sa Russia ang napabakod sang maayo nga halimbawa sang katutom sang ila mga Saksi nga paryente. Kag ginapasalamatan gid nila ini. Kabay pa nga dumdumon man naton ang halimbawa sang mga nagbatas sang una kag sang mga nagabatas sang paghingabot subong, kag kabay nga ‘ilugon naton ang ila pagtuo.’—Hebreo 13:7.