Sa indi madugay, ipahibalo sang Nadezhdinskiy District Court of the Primorye Territory ang desisyon sini sa kaso ni Sister Lyudmila Shut. a Nagpangabay ang piskal nga sentensiahan sia sing apat ka tuig nga suspended prison sentence.

Lyudmila Shut

• Natawo: 1947 (Makarov, Sakhalin Island)

• Biograpiya: Nagtuon sia sing Biblia upod sa mga Saksi ni Jehova sang mga tuig 2000. Nagdayaw gid sia sa mga tagna sa Biblia. Nabawtismuhan sia sang 2003. Sa sina man nga tuig, napatay ang iya bana. May tatlo sia ka bata kag tatlo ka apo. Bangod sang iya balatian, kinahanglan niya sing bulig kon maglakat sia

Sang Nobiembre 2017, ginsugdan sang mga awtoridad ang pagpanilag sa mga Saksi ni Jehova nga nagaistar sa village sang Razdolnoye. Sang Pebrero 2020, ginkasuhan sang mga awtoridad si Sister Lyudmila Shut. Bisan pa tigulang na sia kag dis-ebol, gindumilian sia gihapon nga magbiyahe.

Bangod sa sini nga kaso, naglala pa gid ang ginabatyag sa lawas ni Lyudmila kag kon kis-a nagaluya man ang iya buot. Nagburon man ang iya panan-aw amo nga gin-operahan sia, kag subong may insomnia sia. Nagasalig gid si Lyudmila kay Jehova nga hatagan niya sia sing kusog kag sigurado sia nga buligan gid niya sia. Nagpromisa si Jehova sa Isaias 26:3 nga hatagan sia sing “dayon nga paghidait.” Nabatyagan gid niya ina.

Palangga gid sang mga kauturan si Lyudmila, gani ginbuligan nila sia. Nalipay gid sia kay kabalo sia nga ginapangamuyo sia sang mga kauturan. “Indi ko gid ini malipatan,” siling ni Lyudmila.

Ginabuligan man sia sang iya bata nga lalaki kag kinagot nga babayi, bisan pa indi sila mga Saksi ni Jehova.

Samtang ginahulat naton ang desisyon sang korte sa kaso ni Sister Shut, ginapangamuyo naton nga padayon sia nga ‘magsalig sa gahom sang Dios.’—2 Timoteo 1:8.