ABRIL 8, 2022
RUSSIA

Ang Isa ka Amay nga Ginpriso Nagabulig sa Iya Pamilya nga Padayon nga Mangin Suod kay Jehova

I-PLAY

Sa indi madugay, ipahibalo sang Sovetskiy District Court of Kazan ang desisyon sini sa kaso ni Brother Konstantin Sannikov. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Agosto 25, 2020

Ginsugdan ang kaso sa tapos nga ginbutangan sang mga imbestigador sing isa ka listening device ang balay ni Konstantin. Suno sa mga awtoridad, nagahimo sia sing extremist nga mga hilikuton bangod nagakadto sa iya balay ang mga tawo para mag-istorya parte sa Biblia
Agosto 27, 2020

Gin-aresto sia kag insigida nga ginbutang sa pretrial detention
Mayo 26, 2021

Wala nagsugot ang korte nga bisitahan sia sang iya asawa kag padayon nga gina-deny ang pangabay sang iya asawa nga mabisitahan sia sa prisuhan
Agosto 20, 2021

Ginsugdan ang pag-hearing

Impormasyon Parte sa Iya

Konstantin Sannikov

Natawo: 1970 (Kazan, Republic of Tatarstan)

Biograpiya: Isa sia ka forensic medical expert kag neuropsychologist antes sia ginpriso. Napangasawa niya si Irina sang 1992. May apat sila ka bata

Nagtuon sia upod sa mga Saksi ni Jehova kag nabawtismuhan sang 1994

Ang Ginsiling sang Iya nga Asawa nga si Irina a

Paano gin-atipan sang imo bana ang inyo pamilya bisan pa ara sia sa prisuhan?

Bisan pa gin-aresto sia, padayon kami nga ginabuligan ni Konstantin nga mangin suod kay Jehova. [Sa iya mga sulat,] ginasugid niya sa amon ang mga punto nga iya natun-an sa iya nga pag-research, ginapadal-an niya man kami sang makapalig-on nga mga eksperiensia, kag ginasugid niya sa amon kon ano ang ila nga naistoryahan sang iya mga kaupod sa selda. Ginasugiran man niya kami kon paano ginasabat ni Jehova ang iya mga pangamuyo.

[Ako kag ang mga bata] padayon nga naga-family worship kada Biernes, pareho sang ginahimo namon sang wala pa mapriso ang akon bana. Dayon, ginasulatan namon si Konstantin kag ginasugid sa iya ang amon nga natun-an. Nagabalos sia kag ginasulat niya ang iya masiling [parte sa impormasyon nga gintun-an namon]. Kon kis-a, ginahatagan niya kami sang asaynment pareho sang pagkanta sang pila ka ambahanon ukon kon ano nga topiko ang amon i-research.

Padayon nga ginaatipan ni Konstantin ang iya pamilya bisan pa nga napriso sia. Makasalig man kita nga atipanon gid ni Jehova ang “mga natungod sa iya.”—1 Timoteo 5:8.

a Bangod ara sa pretrial detention subong si Brother Sannikov, indi sia puede interbyuhon.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE