Sang Nobiembre 5, 2019, ginsentensiahan sang Oktyabrsky District Court of Tomsk si Brother Sergey Klimov nga mapriso sing anom ka tuig. Si Dennis Christensen lang ang isa pa ka brother sa Russia nga ginsentensiahan sing amo man sini kalawig. Pero, may iban pa nga restriksion nga ginpatuman ang korte kay Brother Klimov. Gani ang sentensia sa iya amo ang pinakamabug-at nga sentensia sa isa sa aton mga kauturan sugod sang gin-ban sang Supreme Court ang mga Saksi ni Jehova sang 2017.

Si Brother Klimov gin-aresto sang Hunyo 3, 2018, sa tapos gin-raid sang mga awtoridad, pati sang mga special forces ang duha ka balay sang mga Saksi ni Jehova. Mga 30 ka Saksi, pati ang isa ka 83 anyos nga sister ang gindala para kuestyunon. Sang ulihi ginbuy-an man sila tanan luwas lang kay Brother Klimov. Ginpasakaan sia sang mga awtoridad sing mga kaso kriminal kag ginpriso sia sing duha ka bulan sa pretrial detention bisan wala pa sia mabista. Pito ka beses nga ginpalawig ang pagpriso sa iya. Buot silingon antes pa niya masugdan ang iya anom ka tuig nga sentensia, napriso na sia kag wala na niya makaupod ang iya asawa kag pamilya sa sulod sang isa ka tuig kag lima ka bulan.

Iapelar sang mga abogado ni Brother Klimov ang sentensia sa iya. Dugang pa, sang Agosto 20, 2018, nagpasaka man sang reklamo nga Klimov v. Russia sa European Court of Human Rights parte sa iya pretrial detention.

Sa bilog nga 2019, nakita naton ang pagdamo sang pagpang-raid, pagpang-aresto, kag pagpangpriso sa Russia. Pero ang aton mga kauturan matutom gihapon kag maisog. Napalig-on gid kita kay nakita naton ang ebidensia nga ginapakamaayo gid ni Jehova ang bug-os nga pagsalig sang aton mga kauturan sa iya.—Salmo 56:1-5, 9.