NOBIEMBRE 29, 2023
RUSSIA

Ang Korte sa Russia sa Saratov Region Nagdesisyon nga Guilty ang Lima ka Brother

I-PLAY

Sang Nobiembre 23, 2023, ginpahibalo sang Balakovskiy District Court of the Saratov Region ang desisyon sini parte sa kaso nanday Brother Aleksey Bogatov, Brother Yevgeniy Fomashin, Brother Vladimir Mavrin, Brother Andrey Murych, kag Brother Sergey Tyurin. Sila nga lima gindesisyunan nga guilty. Si Aleksey kag Vladimir ginsentensiahan sang anom ka tuig nga suspended prison. Si Andrey, si Sergey, kag si Yevgeniy ginmultahan sang 300,000 ka ruble ($3,362 U.S.). Indi pa sila kinahanglan nga mapriso sa sini nga tion.

Impormasyon Parte sa Ila

Aleksey Bogatov

Natawo: 1960 (Baklushi, Ulyanovsk Region)

Biograpiya: Nag-obra sia bilang drayber sang ambulance

Napangasawa niya si Lyubov sang 1982. May tatlo sila ka bata nga lalaki

Sang nagpa-Bible study sia upod sa mga Saksi ni Jehova nabuligan sia nga maintiendihan kon paano ang Ginharian sang Dios magahatag sing hustisya sa tanan nga tawo. Nabawtismuhan sia sang 1994

Ang Iya Ginsiling

Paano mo nabatyagan ang bulig ni Jehova sang ara ka sa pretrial detention center?

Wala ako sang Biblia sa una nga bulan sang akon pagkapriso, pero may ara ako sang ballpen kag notebook. Nangamuyo ako kay Jehova kada adlaw para madumduman ko ang mga teksto. Sa katapusan sang bulan, nadumduman ko kag nasulat ang 112 ka teksto. Pamatuod ini nga kon basahon ko pirme ang Biblia kag pamalandungan ini, gamiton ni Jehova ang iya balaan nga espiritu para buligan ako nga makadumdom. Nagapasalamat ako kay Jehova kay ginbuligan niya ako.

Yevgeniy Fomashin

Natawo: 1977 (Balakovo)

Biograpiya: Nag-obra sia bilang isa ka elektrisyan

Nangin interesado sia sa promisa sang Biblia parte sa kalinong kag paghiusa sa duta. Nabawtismuhan sia sang 2013. Nagtuon sia sang sign language para buligan ang mga apa sa ila lugar

Ang Iya Ginsiling

Paano ka nabuligan sang halimbawa sang mga utod nga napriso sang una?

Sang ara ako sa detention center, ginpamensar ko nga napriso man sa sini nga bilding sanday Brother Konstantin Bazhenov, Aleksey Budenchuk, Gennadiy German, Roman Gridasov, Feliks Makhammadiyev, kag Aleksey Miretskiy sang 2018-2019. Ang ila halimbawa sang katutom nagpabakod gid sa akon. Kag padayon ako nga napalig-on sang madamo nga mga kauturan sa bilog nga kalibutan nga padayon nga nagaalagad kay Jehova sing matutom bisan pa sang sarisari nga mga kabudlayan. Daw pareho lang nga updanay kami nga nagabatas sini nga pagtilaw.

Vladimir Mavrin

Natawo: 1962 (Kamyshovka, Saratov Region)

Biograpiya: Nagaobra sia sa construction kag interior finishing

Nabawtismuhan sia sang 1994

Nabalo sia sang 2004, gani isahanon niya nga ginpadaku ang ila tin-edyer nga bata nga lalaki. Napangasawa niya si Irina sang 2013

Ang Iya Ginsiling

Ano ang natun-an mo parte kay Jehova sa sining mabudlay nga eksperiensia?

Nahibaluan ko ang promisa ni Jehova sa Hebreo 13:5: “Indi ko gid kamo pagbayaan, kag indi ko gid kamo pagpabay-an.” Nabatyagan ko ang pag-atipan ni Jehova sa espesyal nga paagi sa tapos ako gin-aresto kag sang ara ako sa prisuhan. Ginhatagan niya ako sang kakalma, kalinong, kag ginpabakod gid. Natun-an ko man nga ginasabat pirme ni Jehova ang akon mga pangamuyo sa pinakamaayo nga paagi. Sa sining mabudlay nga sitwasyon, wala gid ako nagbatyag nga nagaisahanon ako.

Andrey Murych

Natawo: 1991 (Balakovo)

Biograpiya: Isa sia ka steelworker

Una niya nga natun-an ang Biblia sa iya lola. Nagdayaw sia sa katumanan sang mga tagna sa Biblia. Nabawtismuhan sia sang 2007

Napangasawa niya si Anastasiya sang 2009. May isa sila ka bata nga babayi

Ang Iya Ginsiling

Ano ang nakabulig sa imo nga masarangan ang mga kabudlayan sang ara ka sa detention center?

Para sa akon, ang pinakamabudlay sa pretrial detention amo ang pagpabilin nga malipayon, ilabi na sa una nga duha ka bulan. Ang isa nga nakabulig sa akon amo ang pagpamensar kon paano ko ipakita kay Jehova nga nagapasalamat ako gihapon sa iya sa tanan nga ginhimo niya para sa akon, bisan pa sang mabudlay nga sitwasyon. Ang pagpabilin nga matutom kag malipayon sa pag-alagad kay Jehova, amo ang pinakamaayo nga paagi nga mapakita ko nga nagapasalamat ako sa iya. Mas nangin kumbinsido pa gid ako nga paagi sa bulig ni Jehova malampuwasan ko ang bisan ano. Mahatagan ako ni Jehova sang kalinong sa bisan ano nga sitwasyon.

Sergey Tyurin

Natawo: 1994 (Balakovo)

Biograpiya: Nag-obra sia bilang elektrisyan

Gintudluan sia sang iya lola parte sa Biblia. Nakumbinsi sia nga ang pagsunod sa mga prinsipio sa Biblia importante para mangin malipayon ang kabuhi. Nabawtismuhan sia sang 2012

Napangasawa niya si Yelizaveta sang 2018

Ang Iya Ginsiling

Ano nga mga leksion ang natun-an mo kay ginhingabot ka bangod sang imo pagtuo?

May tatlo ka butang ako nga natun-an. Una, si Jehova ara gid pirme para suportahan ako. Nakita niya kon ano gid ang kinahanglan ko, kag nahibaluan niya ang pinakamaayo nga tion nga ihatag ini. Ikaduha, ang pagsalig sa mga promisa ni Jehova importante gid para may ara ako sang kalinong. Bisan pa mabudlay gid kon ginahingabot, madali lang ini kon ikumparar sa wala katapusan nga pagpakamaayo sa palaabuton. Sa indi madugay, indi ko na madumduman ini nga mga kabudlayan. Kag ikatlo, ang paghiusa naton bilang mag-ulutod espesyal gid. Bangod sini, mas mahapos batason ang mga kabudlayan, kag dapat gid ini proteksionan.

Ang halimbawa sining lima ka matutom nga mga brother nagapahanumdom sa aton nga mabatas naton ang mga kabudlayan para sa maayong balita kon nagasalig kita sa gahom sang Dios.—2 Timoteo 1:8.

Time Line

Pebrero 11, 2022

Ginsugdan ang kaso
Marso 23, 2022

Gin-raid sang mga FSB agent ang balay sang lima ka brother. Gin-interogar ang kada isa sa ila kag gindala sa temporary detention center
Marso 25, 2022

Ginbutang sila sa pretrial detention center
Enero 23, 2023

Ginbuy-an sila pero ginbutangan sang restriksion ang ila pagbiyahe
Hulyo 21, 2023

Ginsugdan ang hearing
Nobiembre 23, 2023

Gindesisyunan sila nga guilty

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE