Subong sang ginbalita sang Pebrero 6, 2019, ginsentensiahan sang Zheleznodorozhniy District Court of Oryol si Dennis Christensen nga mapriso sing anom ka tuig bangod sa pagpakigbahin sa mahidaiton nga pagsimba. Ini nga desisyon ginaapelar na subong sa mas mataas nga korte.

Ang balita parte sa amon ka tuig nga sentensia kay Christensen nagkuha gid sang atension sang bilog nga kalibutan. Ang internasyonal nga mga organisasyon pareho sang Council of Europe, European Union, United States Commission on International Religious Freedom, Office of the United Nations High Commissioner for Human Rights, kag iban pa nga organisasyon nagsiling nga ang ginhimo sang Russia indi makatarunganon kag wala sing rason para kasuhan si Dennis Christensen.

Si Michelle Bachelet sang U.N. High Commissioner for Human Rights, nagpagua sang isa ka pahayag nga may bahin nga nagasiling: “Ang mabug-at nga sentensia kay Christensen may makahalalit nga epekto kay puede ini himuon nga basihan para tratuhon bilang mga kriminal ang mga Saksi ni Jehova sa Russia bangod lamang sa ila relihioso nga mga pagpati.” Ginpangabay niya ang gobierno sang Russia “nga irebisar ang Federal Law on Combating Extremist Activity para mangin maathag kon ano gid ang buot silingon sang ‘hilikuton nga batok sa gobierno,’ kag siguraduhon nga makabig lamang nga batok sa gobierno ang isa ka hilikuton kon masingki ini ukon ginhimo bangod sa dumot.” Sa katapusan nagpanawagan si Ms. Bachelet sa mga awtoridad “nga ibasura ang tanan nga kaso kag hilwayon ang tanan nga ginpriso bangod sa ila paghimo sang ila kinamatarong sa kahilwayan sang relihion ukon pagpati, kahilwayan sang opinyon kag pagpabutyag, kag kinamatarong sa kahilwayan sa pagtipon sing mahidaiton kag pagpakig-upod.”

Duha ka adlaw pagkatapos sang sentensia kay Brother Christensen, apat ka kilala nga Russian nga eksperto sa tawhanon nga kinamatarong ang nag-organisar sang press conference sa Moscow. Napuno gid ang tilipunan, kag sobra 6,000 ang nagtan-aw sining isa ka oras nga programa nga naka-broadcast sing live sa Internet. Ginpangapinan sang tanan sa panel ang mga Saksi ni Jehova bilang mahidaiton nga katawhan kag indi gid makatalagam sa komunidad.

Nakigbahin man sa press conference ang asawa ni Brother Christensen nga si Irina, ang iya abogado nga si Mr. Anton Bogdanov, kag ang isa ka representante halin sa European Association of Jehovah’s Witnesses nga si Yaroslav Sivulskiy. Naghatag sila sing pahayag parte sa sining indi makatarunganon nga sentensia kag ginsabat man nila ang pamangkot sang mga reporter.

Bisan pa halos duha ka tuig na nga napriso si Brother Christensen, malipayon sia gihapon kag padayon nga nagasalig kay Jehova. Mga pila ka adlaw antes sang sentensia sa iya, sang naghambal sia sa korte sa katapusan nga tion, si Brother Christensen nagsiling: “Magagua gid ang kamatuoran, kag amo gid sina ang matabo sa sini nga kaso.” Sa tapos niya mabasa ang Bugna 21:3-5, kumbinsido sia nga nagsiling: “Ini nga mga pulong . . . nagalaragway sang tion nga ihatag sang Dios ang katarungan kag matuod nga kahilwayan para sa tanan nga katawhan. Ang kahilwayan kag katarungan updanay pirme. Siguraduhon sang Dios nga matuman ini tanan.”

Hulaton ni Brother Christensen ang desisyon sa iya pag-apelar sa Detention Facility No. 1 sa Oryol Region, diin ginpriso na sia sa sulod sang 20 ka bulan.