NOBIEMBRE 2, 2021
RUSSIA

Ang Lima nga Gin-akusar sa Sakhalin Nagasalig sa Bulig ni Jehova

I-PLAY

Time Line

Sa indi madugay, ipahibalo sang Nevelskiy City Court of the Sakhalin Region ang desisyon sini sa kaso nanday Brother Vyacheslav Ivanov, Brother Aleksandr Kozlitin, Brother Sergey Kulakov, Sister Tatyana Kulakova, kag Brother Yevgeniy Yelin. a Wala pa sing may ginsiling ang piskal kon ano nga sentensia ang gusto niya sa sini nga kaso
Hulyo 2020

Ginbutangan sing restriksion ang pagbiyahe nanday Vyacheslav, Aleksandr, Sergey, kag Tatyana
Abril 2, 2020

Ginbutangan sing restriksion ang pagbiyahe ni Yevgeniy
Enero 20, 2019

Gin-raid sang mga agent sang Federal Security Service (FSB), ang secret police sang Russia, ang indi magnubo sa 11 ka balay sang mga pumuluyo nga ginasuspetsahan nga mga Saksi ni Jehova. Agresibo ang mga nagpang-raid kag gin-interogar nila bisan ang menor de edad nga mga bata. Natabo ini bisan pa bag-o lang nagpromisa si President Vladimir Putin sang Russia nga imbestigahan niya ang paghingabot sa mga Saksi ni Jehova

Impormasyon Parte sa Ila

Sergey Kulakov

Natawo: 1961 (Nevelsk, Sakhalin Region)

Biograpiya: Sa boarding school sia nag-istar sugod sang 14 anyos sia. Sang bata pa sia, naga-soccer sia kag naga-chess. Naggradweyt sia sa isa ka vocational school kag nahanas nga mangin mekaniko sang barko. Retirado na sia subong

Sang mga dekada 2000, sia kag ang iya asawa nga si Tatyana nagtuon sa Biblia. Natandog gid sia sa gugma nga nakita niya sa mga Saksi ni Jehova. Nabawtismuhan sia sang 2008. May duha sila ka bata nga lalaki

Ang Iya Ginsiling

Sa ano nga mga kabudlayan nga ginbuligan ka gid ni Jehova nga makabatas?

Ang pinakamabudlay para sa akon amo ang mangin kalmado lang kag malipayon. Bangod padayon ako sa akon pagtuon sa Biblia kag pagsimba kay Jehova, nangin matuod gid sa akon ang ginsiling sa pulong sang Dios: “Mainunungon ka sa tawo nga mainunungon sa imo.” (2 Samuel 22:26) Nagbakod pa gid ang akon gugma kag pagsalig kay Jehova. Nakabulig man ini sa akon nga indi gid magkabalaka kay bisan ano man ang matabo, indi gid niya ako pagpabay-an.

Tatyana Kulakova

Natawo: 1973 (Nevelsk, Sakhalin Region)

Biograpiya: Halin sang bata pa sia, mahilig sia magbasa, magdrowing, kag mamati sa musika. Ang iya obra amo ang pagpang-plaster kag isa man sia ka painter. Ginpamana niya si Sergey sang 1996, kag may duha sila ka bata nga lalaki

Gin-apresyar niya ang Biblia sang nahibaluan niya ang ginasiling sini parte sa katuyuan sang duta kag sa kahimtangan sang mga patay. Nabawtismuhan sia bilang isa sa mga Saksi ni Jehova sang 2003

Ang Iya Ginsiling

Ano nga teksto ang nakabulig sa imo nga mangin maisog ukon makabatas sing malipayon?

Sang gin-raid nila ang amon balay, kag sang ulihi sang gin-akusar nila ako sang isa ka krimen kag dapat ako magkadto sa FSB, napalig-on ako sa ginsiling ni Eliseo sa iya alagad: “Mas madamo ang kaupod naton sangsa kaupod niya. Nagasalig sia sa kusog sang tawo, apang nagasalig kita kay Jehova nga aton Dios.” (2 Cronica 32:7, 8) Ginaimadyin ko nga ang Labing Gamhanan nga si Jehova, si Jesus, kag ang madamo nga mga anghel ara sa akon tupad. Bangod sini, mahimo ko ang dapat ko himuon sa baylo nga magkabalaka sing sobra.

Yevgeniy Yelin

Natawo: 1974 (Yuzhno-Sakhalinsk, Sakhalin Region)

Biograpiya: Nanamian sia magdrowing halin sang bata pa sia. Nagaobra sia bilang home designer. May kaugalingon sia nga renovation company. Nagadesinyo man sia kag nagapanghimo sang furniture

Gintun-an niya ang Biblia sang high school pa sia. Sang mga dekada ’90, nakilala niya ang mga Saksi ni Jehova kag ginrespeto gid niya sila kay nakita niya nga ginasunod gid nila sa ila kabuhi ang mga prinsipio sa Biblia. Nabawtismuhan sia sang 1992. Ginpangasawa niya si Anastasia sang 2017

Ang Iya Ginsiling

Ano ang malaygay mo sa iban para makahanda sila engkaso hingabuton man sila?

Gusto ko silingan ang iban nga pun-on ang ila hunahuna kag tagipusuon sang mga kamatuoran halin sa Biblia. Importante gid nga sundon naton ang direksion sang organisasyon. Ginahulat gid naton nga matuman ang mga tagna parte sa bag-o nga kalibutan, galing ang paghingabot lakip sa sina nga mga tagna gani dapat man ina matuman. Kon ginahingabot kita, lakip kita sa katumanan sang tagna. Daku gid ina nga pribilehiyo!

Bal-an naton nga padayon nga atipanon ni Jehova ang aton palangga nga kauturan. Nagaugyon gid sila sa ginsiling ni propeta Isaias: “Ang Dios amo ang akon kaluwasan. Magasalig ako kag indi magkahadlok.”—Isaias 12:2.

a Ang petsa sang desisyon sang korte wala pirme ginapahibalo sing abanse.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE