SEPTIEMBRE 24, 2021
RUSSIA

Ang Pagbasa sang Biblia kag ang Pagtambong sa mga Miting Nagpabakod Gid kay Brother Maksim Beltikov

I-PLAY

UPDATE | Si Brother Maksim Beltikov Ginsentensiahan nga Guilty sang Korte sa Russia

Sang Enero 17, 2022, nagdesisyon ang Pavlovskiy District Court of the Krasnodar Territory nga guilty si Brother Maksim Beltikov kag ginsentensiahan sia sing duha ka tuig nga pagkapriso. Ini nga sentensia ipadapat gilayon.

Time Line

Hunyo 29, 2020

Ginmanduan nga indi sia makakadto sa iban nga lugar
Hunyo 23, 2020

Ginpasakaan sia sing kaso. Gin-akusar sia nga “nag-entra sa mga sesyon sang pagpanudlo sang isa ka relihion” kag nalakip sa sini ang “pagdumala kag pagpamati sa mga pamulongpulong base sa literatura sang isa ka relihion”
Abril 29, 2020

Ginhalughog sang mga awtoridad ang balay ni Maksim. Dayon, gin-interogar sia

Impormasyon Parte sa Iya

Maksim Beltikov

Natawo: 1980 (Baltiysk, Kaliningrad Region)

Biograpiya: Sang bata pa sia, nanamian sia magtokar sang tradisyonal nga mga musika. Nag-obra sia bilang bricklayer. Ang iya pakaisa ang una nga nagtudlo sa iya parte sa Biblia. Nalipay gid sia sang nakilala niya ang ngalan sang Dios nga si Jehova. Nagdayaw man sia sa praktikal nga mga laygay sang Biblia kag sang mga tagna sini nga nagakatuman. Nabawtismuhan sia bilang isa sa mga Saksi ni Jehova sang 2001. Napangasawa niya si Mariya sang 2005. May tatlo sila ka gagmay pa nga kabataan

Ang Iya Ginsiling

Paano ka kag ang imo pamilya ginbuligan ni Jehova sa sini nga paghingabot?

Gin-aman ni Jehova ang tanan nga kinahanglan sang akon pamilya kag ginbuligan niya kami nga padayon nga mangin suod sa iya. Gintinguhaan gid sang akon asawa kag kabataan nga buligan ako nga indi magpokus sa akon sitwasyon kag ginaintiende gid nila ako. Kag may isa ka brother nga nagpalig-on sa akon paagi sa Salmo 23. Siling niya: “Indi magpalayo kay Jehova kag sa iya organisasyon. Tuguti si Jehova nga atipanon ka niya.”

Paano nakabulig sa imo ang pagbasa sang Biblia kag ang pagtambong sa mga miting para mangin malipayon ka gihapon?

Ang regular nga pagbasa sang Biblia kag ang pagtambong sa tanan nga miting nakabulig sa akon nga mangin malipayon gihapon. Bangod sini, nabatyagan ko man nga wala ako ginapabay-an ni Jehova. Sang 2018, nakatambong kami nga mag-asawa sa kombension sa Seoul, South Korea. Sang Domingo nga sesyon, nagpokus ang speaker sa mga tumalambong nga Korean. Ginpangabay niya nga magtindog ang tanan nga ginpriso bangod sa ila pagtuo. Linibo ka brother naton ang nagtindog. Indi ko gid ato malipatan kag siling ko sa akon kaugalingon: ‘Kon nasarangan nila, masarangan ko man.’

Paano nakabulig ang imo naeksperiensiahan para magbakod pa gid ang imo relasyon kay Jehova?

Wala lang nagbakod ang akon relasyon kay Jehova, kundi nagbag-o man ini sa madamo nga paagi. Mas detalyado na subong ang akon mga pangamuyo. Kag makalilipay, kay mas madamo kag detalyado na ang akon pagpasalamat sangsa akon mga ginapangayo sa akon pangamuyo. Ginbag-o ko man ang akon paagi sa pagbasa sang Biblia kay mas nagapokus na ako sa mga halimbawa nga mabasa ko diri nga pareho sa akon sitwasyon.

Kabay nga padayon nga mangin mabakod ang aton mga kauturan sa Russia. Kag kabay nga mapalig-on sila pirme sang ila pagbasa sang Biblia kag sang pag-ulikid sang ila mga kauturan. Kabalo kita nga indi gid pagpabay-an sang “Dios sang gugma kag paghidait” ining aton pinalangga nga mga kauturan.—2 Corinto 13:11.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE