Sa Pebrero 18, 2021, a ipahibalo sang Birobidzhan District Court of the Jewish Autonomous Region ang desisyon sini sa kaso ni Sister Yuliya Kaganovich. Wala pa sing may ginsiling ang piskal kon ano nga sentensia ang gusto niya sa sini nga kaso.

Yuliya Kaganovich

• Natawo: 1966 (Mikhaylovka, Volgograd Region)

• Biograpiya: Nag-eskwela sia sing civil engineering. Sang pamatan-on pa sia, nagtuon sia sa isa ka dance studio, naggradweyt sa music school, nagtokar sa orchestra, kag nagkanta sa choir. Ang iya bana nga si Aleksandr indi isa sa mga Saksi ni Jehova, pero ginasuportahan niya si Yuliya kag nagapati sia nga wala gid sing katarungan ang kaso kriminal nga ginpasaka batok sa iya asawa

  Sang mapatyan sia sang iya mga pinalangga, nagsugod sia sa pagpamensar parte sa kahulugan sang kabuhi. Ang sabat sang Biblia sa iya mga pamangkot naghatag sa iya sing kalinong kag paglaum. Nabawtismuhan sia sang 1998. Ang mga prinsipio sang Biblia nakabulig man para magbakod ang relasyon nila nga mag-asawa, para mas mag-ayo ang iya kaangtanan sa iban, kag para mapadaku sing maayo ang iya bata nga si Artur, nga isa man sa mga Saksi ni Jehova

  May problema sa panglawas si Yuliya, kag naglala pa gid ini bangod sa kaso kriminal nga ginpasaka batok sa iya

“Sang may nagpanuktok sa balay sang isa ka aga, nabal-an ko gid dayon kon sin-o sila,” siling ni Sister Yuliya Kaganovich. “Grabe ang kubakuba sang akon dughan, kag ang nahambal ko lang: ‘Buligi ako, Jehova. Buligi ako, Jehova.’”

Sang Oktubre 10, 2019, nagsugod ang paghingabot sa sining aton 53-anyos nga sister, sa siudad sang Birobidzhan sa Russia. Ang pag-raid sa balay ni Yuliya nalakip sa pagpang-raid nga ginhimo sang mga agent sang Federal Security Service (FSB) sang Russia sa sobra 20 ka balay sang aton kauturan sa sina nga lugar.

Grabe gid ka makapa-stress ang pagpang-raid. Pero ang paghanda sa sini nga hitabo nakabulig kay Yuliya kag sa iban pa nga Saksi nga mangin mabakod.

“Sulitsulit namon nga ginahambal sa mga miting nga posible gid nga may raid nga matabo, gani dapat maghanda gid kami,” siling ni Yuliya. “Kay bal-an ko nga posible gid nga matabo ini, ginapraktis ko na sa akon hunahuna kon ano ang akon himuon kag isiling.” Nagdugang pa sia: “Narealisar ko nga importante gid nga nakapreparar ka na sang imo himuon. Bangod sini, wala ako nagsalasala ukon ginkulbaan, kay kabalo na ako sang akon himuon.”

Subong sang ginapaabot na, insigida nga ginpasakaan sing kaso sang mga awtoridad si Yuliya kag ang iban pa nga Saksi. Ginkasuhan sila nga nagahimo kuno sing “extremist” nga hilikuton.

Sang Marso 3, 2020, ginpasaka sang mga opisyal ang kaso sa Birobidzhan District Court. Lima ka bulan nga gin-postpone ang hearing bangod sa COVID-19 nga pandemic. Nag-atubang si Yuliya sa korte sang Oktubre 22, 2020.

Si Yuliya nagsiling: “Indi ko gusto nga maagyan ko ini nga sitwasyon. Pero, nalipay man ako nga mapangapinan ko ang pagkasoberano ni Jehova.”

“Daku gid ang nabulig sa akon sang Isaias 41:10. Gin-print ko ini nga teksto kag ginpakabit sa dingding sa amon balay para makita ko pirme ang pasalig ni Jehova nga Dios,” siling niya. “Naeksperiensiahan ko gid nga ginpabakod ni Jehova ang akon nagapalangurog nga mga tuhod.”

Nagsaulo man si Yuliya sang mga teksto nga makabulig sa iya nga mangin kalmado, maisog, kag malipayon bisan pa sang iya mabudlay kaayo nga sitwasyon.

Kabay pa nga tanan kita mangin maalamon man paagi sa paghanda kon ano ang aton ihambal kag himuon pananglitan hingabuton kita. Pabakuron man naton ang aton pagtuo kay Jehova para mangin handa kita sa mga pagtilaw nga magaabot sa aton. Makasalig kita nga “wala ginadingot ni Jehova ang bisan ano nga maayo sa mga nagalakat nga may integridad.”—Salmo 84:11.