NOBIEMBRE 8, 2022
RUSSIA

Ang Pagpangamuyo kag Pagbasa sang Biblia Nagabulig Para Makabatas

I-PLAY

Sa indi madugay, ipahibalo sang Maykop City Court of the Republic of Adygeya ang desisyon sini sa kaso ni Brother Nikolay Saparov. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Marso 22, 2022

Ginsugdan ang kaso
Marso 23, 2022

Gin-aresto si Nikolay sang ara sila sa airport sang iya asawa kag bata nga babayi. Sa tapos sang interogasyon, gin-akusar sia sang mga awtoridad nga nagaorganisar sang hilikuton sang isa ka extremist nga organisasyon. Gindala sia dayon sa temporary detention center. Sang ulihi gin-raid man ang iya balay
Marso 24, 2022

Ginsaylo si Nikolay sa pretrial detention center
Mayo 19, 2022

Ginsugdan ang hearing

Impormasyon Parte sa Iya

Nikolay Saparov

Natawo: 1981 (Saint Petersburg, Leningrad Region)

Biograpiya: Nag-obra sia bilang supervisor sa isa ka trading company

Nabawtismuhan sia bilang isa sa mga Saksi ni Jehova sang 1997. Napangasawa niya si Nataliya sang 2004. May isa sila ka bata nga babayi

Ang Ginsiling sang Iya Asawa nga si Nataliya a

Ano ang nakabulig kay Nikolay nga makabatas sang ara sia sa pretrial detention?

Sa sulod sang tatlo ka bulan, duha ka beses nga nabasa ni Nikolay ang bilog nga Biblia. Positibo gid sia. Pirme sia nagapangamuyo kag siling niya mas nagbakod pa gid ang iya kaangtanan kay Jehova. Bisan wala nabaton ni Nikolay ang amon mga sulat sa iya, nabaton namon pirme ang iya mga sulat para sa amon. Nagasiling sia nga palangga gid niya kami kag nagaulikid gid sia sa amon. Kag ginasugiran niya kami sang iya mga napamalandungan kag kon paano sia ginabuligan ni Jehova.

Ano ang nakabulig sa imo para makabatas?

Sugod sang ginpriso sia, makaisa pa lang kami ginpasugtan nga mabisitahan sia. Mabudlay gid kon indi kami updanay. Kada aga pagbugtaw ko nagahibi ako, kay bal-an ko nga isa naman ka adlaw ang malabay nga indi ko kaupod ang akon pinalangga nga bana. Gani ang una ko gid nga ginahimo amo ang pagpangamuyo para maghaganhagan ang akon ginabatyag. Dayon ginabasa ko ang Biblia sing mga isa ka oras. Bangod sini, nabatyagan ko gid nga malapit si Jehova sa akon.

Ang halimbawa sang pamilya Saparov nagapahanumdom sa aton nga ginapamatian pirme ni Jehova kon “magpangayo sing bulig” ang iya matutom nga mga alagad.—Salmo 119:147.

a Samtang ginahanda ini nga artikulo, si Brother Saparov ara sa pretrial detention. Wala sia mainterbyu.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE