ABRIL 20, 2023
RUSSIA

Ang Pagpanilag sa mga Tinuga Nakapabakod kay Brother Okhapkin

I-PLAY

Sa indi madugay, ipahibalo sang Kineshemskiy City Court of the Ivanovo Region ang desisyon sini sa kaso ni Brother Andrey Okhapkin. Wala pa sing may ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Iya

Andrey Okhapkin

Natawo: 1962 (Zavolzhsk, Ivanovo Region)

Biograpiya: Nag-obra sia bilang computer programmer kag maestro sa physics

Napangasawa niya si Irina sang 1987. Nag-Bible study si Irina upod sa mga Saksi ni Jehova sang 1994. Nag-Bible study man si Andrey sang nakumbinsi sia nga may Manunuga. Dungan sila nga nabawtismuhan sang 1995

Ang Iya Ginsiling

Ano ang nakabulig sa imo nga mabatuan ang pagluya sing buot sang gin-house arrest ka?

Ang detalyado nga pagpangamuyo kay Jehova, bisan malip-ot lang, nakabulig sa akon nga indi maluoy sa akon kaugalingon. Kon magluya gani ang akon buot, ginadumdom ko si Job. Gingamit ni Jehova ang iya mga tinuga para ipahanumdom kay Job ang Iya matahom nga mga kinaiya. Gani gin-ilog ko man sia. Gin-obserbahan ko sing maayo ang pagbutlak sang adlaw. Ginatan-aw ko sing maayo ang panganod, ang langit, kag ang mga kahoy. Nagdayaw man ako sa ikasarang sang mga pispis nga maglupad. Ginpanilagan ko man ang magagmay nga mga kuring kag ido sa gua sang amon bilding. Ginatan-aw ko ini nga mga tinuga sa sulod sang halos lima ka bulan halin sa amon balkon. Nakabulig ini sa akon nga makita pa gid ang mga kinaiya ni Jehova sa iya mga tinuga. Subong, mas naintiendihan ko na kon daw ano ka mapinalanggaon nga Amay si Jehova.

Paano ka napalig-on sang iban nga nagabatas man sang mga pagtilaw?

Sang ara ako sa pretrial detention, nakabaton ako sang sulat halin sa isa ka brother nga napriso man. Nagsulat sia: “Ginapamangkot ako sang mga tawo, ‘Nahadlok ka man?’ Indi ako puede magsiling nga wala, kay nagabatyag man ako sang kahadlok. Pero, kinahanglan naton nga daugon ang aton mga kahadlok, kag amo sina ang rason kon ngaa kinahanglan naton sang kaisog. Bilang mga alagad ni Jehova, nakilal-an kita nga maisog nga mga tawo, kay kon nahadlok kita, ginabuligan kita ni Jehova nga mangin maisog. Dumduma nga indi importante kon daw ano kadaku ang imo mga problema, kundi kon daw ano kadaku ang imo pagtuo.” Ang pagbasa sang iya eksperiensia kag sang eksperiensia sang iban pa nagpahanumdom sa akon nga dapat ko pabakuron ang akon relasyon kay Jehova kag pensaron pirme ang parte kay Jehova kag sa iya Pulong.

Pareho kay Andrey, nagapasalamat kita sa “makatilingala nga mga binuhatan sang Dios,” nga nagapahanumdom sa aton sang Iya pagpalangga kag pag-ulikid.—Job 37:14.

Time Line

Nobiembre 18, 2021

Ginsugdan ang kaso
Nobiembre 23, 2021

Gin-raid ang anom ka balay sang mga Saksi ni Jehova, pati ang balay ni Andrey. Gin-aresto sia kag ginbutang sa temporary detention
Nobiembre 24, 2021

Ginkasuhan sia
Nobiembre 25, 2021

Ginbutang sia sa pretrial detention
Pebrero 17, 2022

Ginpagua sia sa pretrial detention pero gin-house arrest gihapon
Hulyo 14, 2022

Gintapos ang pag-house arrest sa iya pero may restriksion ang iya pagbiyahe
Disiembre 15, 2022

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE