DISIEMBRE 14, 2023
RUSSIA

“Ang Pagsalig kay Jehova Nakabulig Gid”

I-PLAY

Sa indi madugay, ipahibalo sang Samarskiy District Court of Samara ang desisyon sini sa kaso nanday Brother Aram Danielyan, Brother Denis Kuzyanin, Brother Sergey Polosenko, kag Brother Nikolay Vasiliyev. Wala pa sang ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Aram Danielyan

Natawo: 1990 (Armenia)

Biograpiya: Nagsaylo ang iya pamilya sa Russia sang anom pa lang sia ka bulan

Nag-obra sia sa konstruksion kag purchasing

Nakatuon sia parte sa Biblia halin sa iya tiya kag sa iya nanay. Sang nakita niya nga ginsabat ni Jehova ang iya mga pangamuyo, mas ginpalangga pa gid niya si Jehova. Nabawtismuhan sia bilang isa ka Saksi ni Jehova sang 2011

Napangasawa niya si Elina sang 2017. May isa sila ka bata nga lalaki

Ang Iya Ginsiling

Ano ang nakabulig sa imo nga indi maluyahan sang buot?

May mga tion nga nasubuan ako sa akon sitwasyon. Pero kon matabo ina, ginadumdom ko nga ginpili ko nga mangin alagad ni Jehova. Ano ayhan ang matabo sa akon kon mag-untat ako sa pag-alagad kay Jehova bangod indi ko gusto nga hingabuton? Nalipay ako bangod nabal-an ko nga nagabulig ako sa pagpakabalaan sa ngalan ni Jehova kag sa pagpakilala sini. Determinado ako nga pamatud-an kay Satanas nga indi ako mag-untat sa pag-alagad kay Jehova bangod sini nga pagkapriso kag bisan pa sang kamatayon.

Denis Kuzyanin

Natawo: 1984 (Norilsk, Krasnoyarsk Territory)

Biograpiya: Self-employed sia

Nagpa-Bible study si Denis kag ang iya nanay upod sa mga Saksi ni Jehova sang pulo ka tuig pa lang si Denis. Nabawtismuhan sia sang 2001

Napangasawa niya si Yelena sang 2012. May isa sila ka bata nga babayi

Ang Iya Ginsiling

Ano nga teksto sa Biblia ang nakabulig sa imo para may husto ka nga pagtan-aw parte sa imo kabudlayan?

Ang libro sang Job nangin espesyal gid para sa akon. Sugod sa kapitulo 38, nagpakig-istorya si Jehova kay Job parte sa Iya gahom sa pagpanuga. Ang pagpamalandong kon ano ang nahimo na ni Jehova kag mga himuon pa nakabulig sa akon nga maintiendihan kon ano ang pinakaimportante sa akon kabuhi. Ginpahanumdom ako sini nga ang pinakaimportante amo ang pagtuman kay Jehova. Kon nalipay sia sa akon, kabalo ako nga buligan niya ako sa akon mga kabudlayan.

Sergey Polosenko

Natawo: 1968 (Uzbekistan)

Biograpiya: Nag-obra sia bilang manager sang isa ka beauty salon

Napangasawa niya si Lydia sang 1993

Nagdaku sia sa isa ka pamilya nga mga Saksi ni Jehova kag nabawtismuhan sia sang 1982

Ang Iya Ginsiling

Paano naapektuhan ang imo relasyon kay Jehova sang ara ka sa pretrial detention?

Sang ara ako sa pretrial detention center, indi ko mabag-o ang akon sitwasyon. Ako lang gid kag si Jehova. Naeksperiensiahan ko gid nga si Jehova nangin akon manug-amlig, manugbulig, kag ilabi sa tanan, abyan. Kabalo ako nga kaupod ko sia sa tanan nga tion. Bangod may ara ako suod nga relasyon kay Jehova, nagbatyag ako sang kasiguruhan kag wala na ako nagakabalaka gid sa palaabuton. Kanami gid sini batyagon. Samtang ang akon sitwasyon padayon nga nagabag-o, mas nakilala ko pa gid si Jehova kag ang iya matahom nga mga kinaiya. Ginapasalamatan ko gid sia.

Nikolay Vasiliyev

Natawo: 1984 (Aisha, Republic of Tatarstan)

Biograpiya: Nag-obra sia bilang programmer

Wala sia nagapati nga may Dios. Sang nagpa-Bible study sia, natun-an niya nga nagasanto ang mga panudlo sang Biblia kag nakumbinsi sia nga may Dios. Nabawtismuhan sia sang 2005

Ang Iya Ginsiling

Ano ang nakabulig sa imo nga padayon nga magsalig kay Jehova?

Antes ako ginbutang sa pretrial detention center, nahadlok gid ako nga prisuhon. Subong, nahibaluan ko na kon ano ang balatyagon kon mapriso kag kon paano ako ginbuligan ni Jehova. Wala na ako nahadlok subong. Bisan pa mabudlay kay wala ako nakahibalo kon ano kalawig ini nga kaso kag kon ano ang mangin desisyon, pero kabalo ko nga kaupod ko pirme si Jehova. Ang pagsalig kay Jehova nakabulig gid sa akon nga mangin malinong ang akon hunahuna kag sigurado ako nga solbaron niya ini nga sitwasyon sa pinakamaayo nga paagi.

Kumbinsido kita nga padayon ni Jehova nga paumpawan ang tagipusuon sang tanan nga nagaantos bangod sa ila pagtuo samtang sia ‘nagapalig-on sa ila agod pirme sila maghimo kag maghambal sing maayo.’—2 Tesalonica 2:16, 17.

Time Line

Disiembre 14, 2021

Ginsugdan ang kaso kanday Denis, Nikolay, kag Sergey
Disiembre 15, 2021

Gin-raid ang mga balay nanday Denis, Nikolay, kag Sergey. Gin-detain sila kag gindala sa temporary detention center
Disiembre 16, 2021

Ginsaylo si Denis, Nikolay, kag Sergey sa pretrial detention center
Enero 6, 2022

Ginsugdan ang kaso kay Aram. Gin-aresto sia sa airport
Enero 7, 2022

Ginbutang si Aram sa pretrial detention center
Disiembre 12-14, 2022

Ginpagua ang apat ka brother sa pretrial detention pero ginbutangan sang restriksion ang ila pagbiyahe
Hunyo 16, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE