HUNYO 7, 2022
RUSSIA

Ang Pagsalig kay Jehova Nakabulig sa mga Brother nga Makabatas

I-PLAY

Sa indi madugay, ipahibalo sang Babushkinskiy District Court of Moscow ang desisyon sini sa kaso nanday Brother Ivan Chaykovskiy, Brother Yuriy Chernyshev, Brother Vitaliy Komarov, Brother Sergey Shatalov, kag Brother Vardan Zakaryan. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Nobiembre 24, 2020

Masobra 20 ka balay sang mga Saksi ni Jehova sa Moscow ang gin-raid sang mga awtoridad sang Russia. Gindala sang mga opisyal si Ivan, si Yuriy, si Vitaliy, kag si Sergey sa isa ka temporary detention center kag ginbutang sila sa bartolina. Gin-videohan man ang pagpang-raid kag pag-interogar kay Yuriy kag sa iya pamilya. Dayon ginpagua ini sa estasyon sang TV nga iya sang gobierno
Nobiembre 26, 2020

Ginpagua si Sergey sa temporary detention pero gin-house arrest sia gihapon. Si Vardan, nga naospital bangod sang iya mga injury nga resulta sang pagpang-raid sa ila, ginsaylo sa temporary detention center kag ginbutang sia sa bartolina
Nobiembre 27, 2020

Ginpagua sang korte sanday Ivan, Yuriy, kag Vitaliy sa temporary detention center pero gin-house arrest sila gihapon
Nobiembre 30, 2020

Ginpagua sang mga awtoridad si Vardan sa detention pero gin-house arrest sia gihapon. Pagkatapos sini nag-file sia sang reklamo sa opisina sang piskal parte sa puersa nga pagpang-raid
Pebrero 16, 2022

Ginsugdan ang hearing

Impormasyon Parte sa Ila

Vitaliy Komarov

Natawo: 1976 (Moscow)

Biograpiya: Nag-obra sia bilang direktor sa Russian Television and Radio Broadcasting Network sa Moscow. Nanamian sia magsagod sang mga buyog

Napangasawa niya si Yelena sang 1999. Nakumbinsi sia nga sibu ang Biblia bangod sa nagakatuman nga mga tagna. Nabawtismuhan sang 2003

Ang Iya Ginsiling

Ano nga mga leksion ang natun-an mo sa sini nga mga kabudlayan?

Antes ako na-detain, gintan-aw ko liwat ang video nga Young People Ask—What Will I Do With My Life? Nanamian gid ’ko sang ginsugid sang tigulang nga brother kon ano ang iya natun-an sang ara sia sa concentration camp. Indi niya kinahanglan ang damo nga pagkabutang. Kinahanglan niya lang ang yahong kag kutsara nga magamit niya kon magkaon para mabuhi sia. Natun-an ko nga matuod gid ini sang ikaduha ko nga adlaw sa prisuhan. Bilog nga adlaw ako sa korte kag alas 9:00 sang gab-i na ako nakabalik sa selda, gani wala ako nakapanyapon. Ginhatagan ako sang upod ko sa selda sang tasa para makapangayo ako sa guardia sang ininit para makainom ako sang tsa. Nadumduman ko gid dayon ang video. Sina nga tion, ang isa ka tasa nga tsa mas importante pa sangsa salakyan ukon cellphone, mga butang sadto nga abi ko indi ako mabuhi kon wala ini.

Sergey Shatalov

Natawo: 1969 (Stavropol, Stavropol Territory)

Biograpiya: Nanamian sia maghampang sang chess, table tennis, kag volleyball sang pamatan-on pa sia. Nangin soldado sia sa navy kon sa diin na-injured sia kag nangin dis-ebol. Nagaobra sia bilang courier

Sia kag ang iya asawa nga si Yelena nagpakasal sang 1995 kag nabawtismuhan sina man nga tuig

Ang Iya Ginsiling

Ngaa nagasalig ka gid nga buligan ka ni Jehova nga mabatas ini nga kabudlayan?

Sigurado ako nga sabton ni Jehova nga Dios ang mga pangamuyo sang mga kauturan sa bilog nga kalibutan para sa akon. Nagasalig gid ako sa sini bangod sa natun-an ko sa Biblia kag bangod man sang kalipay kag kalinong nga akon ginabatyag.

Ano gid ang ginpangamuyo mo, kag paano ini nakabulig sa imo?

Pirme gid ako nagapangamuyo sa Dios kay ginpangabay ko sia nga buligan ako nga mangin maisog pareho sang leon. Paagi sa sini, indi ako mahadlok sa iban nga tawo ukon sa bisan ano man nga indi maayo nga matabo sa akon. Ginapangamuyo ko man ang akon mga kauturan nga napriso, ang ila mga pamilya, kag ang iban nga bisan wala man napriso pero may mabug-at nga mga problema nga ginaatubang pareho man sa akon.

Napalig-on gid kita nga si Jehova malapit gid sa sining mga brother kag sa ila mga pamilya bangod sang ila padayon nga pagtinguha nga mangin malapit man sa iya.—Santiago 4:8.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE