NOBIEMBRE 5, 2021
RUSSIA

Ang Pagsimba ni Brother Aleksey Yershov kay Jehova Nakabulig sa Iya nga Madaug ang Pagluya sing Buot

I-PLAY

UPDATE | Ang Korte sa Russia Nagdesisyon nga Guilty si Brother Aleksey Yershov

Sang Enero 19, 2022, ang Severskiy City Court nagdesisyon nga guilty si Brother Aleksey Yershov kag ginsentensiahan sia nga mapriso sing tatlo ka tuig. Gilayon nga ginpatuman ang sentensia sa iya.

Time Line

Hunyo 22, 2021

Ang kaso ginpasaka sa Severskiy City Court sang Tomsk Region
Marso 30, 2021

Si Aleksey pormal nga ginpasakaan sing kaso base sa mga rekording sang video sang isa ka tawo nga nagpakunokuno nga interesado kag nagtuon sang Biblia sa sulod sang sobra sa isa ka tuig
Hulyo 14, 2020

Ginsulod kag ginhalughog sang mga agent sang FSB (secret police sang Russia) kag sang Investigative Committee ang balay ni Aleksey. Naglawig ini sing pito ka oras. Ginkumpiskar sang mga agent ang mga bank card, mga gadyet, mga Biblia, mga passport, kag mga router sang Wi-Fi

Impormasyon Parte sa Iya

Aleksey Yershov

Natawo: 1953 Seversk (Tomsk Region)

Biograpiya: Napatay ang tatay ni Aleksey sa tuig sang iya pagkatawo. Ginpadaku sia sang iya iloy. Nagtrabaho bilang engineer kag nagtudlo man sia sa vocational school

Napangasawa niya si Lyudmila sang 1976. May duha sila ka bata

Gin-imbitar si Aleksey sang iya estudyante nga magtambong sa miting sang mga Saksi ni Jehova. Pagkatapos sina nagtuon sia sang Biblia. Nanamian gid sia sa praktikal nga mga laygay sang Biblia kag sa paglaum parte sa Ginharian. Nabawtismuhan sia bilang isa sa mga Saksi ni Jehova sang 1994

Ang Iya Ginsiling

Ano ang nakabulig agod magbakod pa gid ang imo relasyon kay Jehova bisan pa sa sini nga mga kabudlayan nga imo naeksperiensiahan?

Ako kag ang akon asawa pirme nagapangamuyo sing magkaupod. Nahibaluan ko nga indi ko ini mabatas kon wala ang bulig ni Jehova. Gani gintinguhaan ko gid nga mangin regular sa akon personal nga pagtuon kag ginabasa ko ang Biblia adlaw-adlaw. Kada aga, ginabinagbinag namon nga mag-asawa ang daily text kag nagapangamuyo kami kay Jehova sing magkaupod.

Paano mo nadaug ang pagluya sing buot?

Nabuligan ako sang personal nga pagtuon nga indi maluyahan sing buot. Ginapamalandungan ko ang mga halimbawa sang matutom nga mga alagad sang Dios sang una. Madamo nga rekord sa Biblia ang nagapakita nga importante nga mangin kalmado kag magsalig kay Jehova. Kon ginapamalandungan ko ini, ginatinguhaan ko nga mahangpan kon ano ang nakabulig sa mga alagad sang Dios nga mangin kalmado. Ang Binuhatan 5:29 nagasiling: “Dapat namon tumanon ang Dios subong manuggahom sa baylo sang mga tawo.” Sang ginmanduan sang Sanhedrin ang mga apostoles nga mag-untat sa pagbantala, kalmado lang ang mga apostoles. Bisan sang ginpangbunal sila, wala sila nahadlok. Nahibaluan sang mga apostoles nga kaupod nila si Jehova kag nahamuot sia sa ila.

Ang aton mga kauturan sa Russia nagabakod kag napaumpawan paagi sa pagbasa sang Biblia adlaw-adlaw kag sa pagpangamuyo. Ang Salmo 9:9 nagapasalig sa aton nga “si Jehova mangin malig-on nga dalangpan para sa mga ginapigos, isa ka malig-on nga dalangpan sa tion sang kagamo.”

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE