Sa Disiembre 18, 2020, * ipahibalo sang Leninskiy District Court sang Rostov-on-Don ang desisyon sini sa kaso ni Brother Semyon Baybak. Gin-request sang piskal ang korte nga hatagan si Semyon sang apat ka tuig nga suspended prison sentence.

Semyon Baybak

• Natawo: 1997 (Rostov-on-Don)

• Biograpiya: May duha sia ka magulang, isa ka lalaki kag isa ka babayi. Nagtuon sia sing Chinese kag nagaobra bilang tutor sang Chinese nga lenguahe. Mahilig sia magbasa kag magsulat sang mga binalaybay

• Halin sang bata pa sia, ginatudluan sia sang iya mga ginikanan parte kay Jehova. Samtang nagadaku sia, natun-an niya ang maalamon nga mga laygay sa Biblia kag ginasunod niya ini. Nagpangindi sia nga magsoldado bangod sa iya pagtuo. Bilang alternative civilian service, nangin dyanitor sia sa isa ka ospital para sa mga bata halin sang 2015 asta sang 2017

Sang Mayo 22, 2019, gin-raid sang mga officer halin sa local center nga nagapakigbato sa extremism ang 13 ka balay sang mga Saksi ni Jehova sa Rostov-on-Don. Pagligad sang mga duha ka semana, sang Hunyo 6, 2019, ginpasakaan sing kaso kriminal si Semyon. Gin-aresto sia kag nagtener sia sang isa ka adlaw sa temporaryo nga selda. Dayon, nagmando ang korte nga i-house arrest sia sa sulod lang sang walo ka semana, pero pito ka beses na nga gindugangan sang korte ang kalawigon sini.

Sang primero, ginkasuhan sang mga awtoridad si Semyon sing “mga krimen” nga pagpakigbahin sa relihioso nga mga miting kag pagsugid sa iban sang iya natun-an sa Biblia. Sang Nobiembre 2019, ginpasakaan pa gid sia sing kaso nga pagsuporta sa pinansial sa “extremist” nga organisasyon.

Samtang sige gihapon ang paghingabot sa aton mga kauturan sa Russia, kabalo kita nga si Jehova, “ang Dios sang paghidait,” padayon nga magahatag sa ila sang tanan nila nga kinahanglan para “mahimo ang iya kabubut-on.”—Hebreo 13:20, 21.