Sang Oktubre 28, 2021, gin-amendahan sang tanan nga miembro sang Supreme Court sang Russia ang isa ka resolusyon parte sa extremist nga hilikuton. Suno sa sining bag-o nga resolusyon, ang isa ka indibiduwal ukon grupo nga nagahimo sang mga hilikuton sang ila relihion indi na makabig nga pagpakigbahin sa mga hilikuton sang gin-ban nga relihioso nga organisasyon. Pero, bisan pa may amo sini nga resolusyon, wala gihapon mauntat ang organisado nga paghingabot sa mga Saksi ni Jehova. Kay man, sarisari ang pag-interpretar sang mga awtoridad sa Russia sini nga resolusyon.

Halimbawa, sugod sang ginpagua ini nga resolusyon sang Oktubre 28, gin-raid sang mga awtoridad ang mga 13 ka balay sang mga Saksi, gin-deny ang pag-apelar ni Sister Irina Lokhvitskaya, kag gin-sentensiahan nga guilty ang 80 anyos nga si Sister Yelena Savelyeva. Sa pihak nga bahin, sang Nobiembre 22, 2021, ang isa ka korte sa Vladivostok nagdesisyon nga indi guilty si Brother Dmitriy Barmakin kag gin-acquit sia sa tanan nga kaso nga ginpasaka sa iya.

Indi pa naton mapat-od kon ang resolusyon bala magapahaganhagan sa paghingabot ukon basi magpabug-at pa gid sa mga sentensia sang kauturan sa prisuhan. Bisan ano man ang matabo, padayon kita nga nagasalig sing bug-os nga buligan ni Jehova ang aton mga kauturan para makabatas sila sing malipayon asta ihatag niya ang matuod kag permanente nga kaluwasan.—Salmo 146:3-5.