SEPTIEMBRE 14, 2023
RUSSIA

Ang Tatlo ka Sister Ginpabakod sang Pangamuyo

I-PLAY

Sa indi madugay, ipahibalo sang Zeya District Court of the Amur Region ang desisyon sini sa kaso nanday Sister Margarita Moiseyenko, Sister Galina Yatsik, kag Sister Yelena Yatsyk. Wala pa sing ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Margarita Moiseyenko

Natawo: 1978 (Krasnoyarsk, Krasnoyarsk Territory)

Biograpiya: Naga-obra bilang sastre. Napamana niya si Konstantin sang 1998. Nasentensiahan nga guilty si Konstantin sang Hulyo 14, 2021, kag ginsentensiahan sang anom ka tuig nga suspended prison

Nag-Bible study sia sa edad nga 18 pagkatapos mapatay ang isa ka suod nga paryente. Nabawtismuhan sia bilang isa sa mga Saksi ni Jehova sang 2001

Ang Iya Ginsiling

Ano ang nakabulig sa imo nga makabatas?

Nadumduman ko nga ginbinagbinag ang Hulubaton 21:31 sa 2018 “Magpakaisog”! nga Rehiyonal nga Kombension. Ang teksto nagasiling: “Ang kabayo ginahanda para sa adlaw sang inaway, apang si Jehova ang nagahatag sing kaluwasan.” Ang mga kabayo madali mahadlok. Para indi sila mahadlok sa tion sang inaway, dapat “nahanda” sila ukon nahanas. Pareho man ini sa aton. Wala kita natawo nga may pagtuo kag kaisog. Dapat maghanda man kita para sa aton pagpakig-away paagi sa pagtinguha nga mapakita ini nga mga kinaiya. Para mahimo ini, narealisar ko nga importante nga pabakuron ko ang akon relasyon kay Jehova, tun-an sing maayo ang Biblia, kag mangamuyo nga bisan ano man ang matabo, mangin mabakod gihapon ang akon pagtuo.

Galina Yatsik a

Natawo: 1950 (Zeya)

Biograpiya: Nag-obra sia bilang cost analyst para sa mga konstruksion sa siudad kag sa maintenance department. Retired na sia subong

Napamana niya si Valeriy sang 1971. May isa sila ka bata nga babayi kag isa ka bata nga lalaki. Nabalo sia sang 1995

Nagdaku sia nga atiesta pero pirme niya ginapamensar ang parte sa ginhalinan sang kabuhi. Nagsugod sia sa pagbasa sang Lalantawan kag Magmata! nga mga magasin kag nag-attend sa mga miting. Natun-an niya ang ebidensia nga nagkumbinsi sa iya nga may Manunuga. Nabawtismuhan sang 1994

Ang Iya Ginsiling

Ano ang natun-an mo parte sa gahom sang pangamuyo sa sining mabudlay nga tion?

Natun-an ko nga importante gid nga makapangamuyo bisan sing malip-ot lang sa wala ginapaabot nga mga sitwasyon. Nakabulig ini sa akon nga mangin kalmado kag makasabat sing insakto. Kanami man mabal-an nga ginapangamuyo ako sang iban. Ang Santiago 5:16 nagasiling: “Ang pag-ampo sang matarong nga tawo may gamhanan nga epekto.” Narealisar ko nga ang mga pangamuyo sang mga kauturan para sa akon amo ang isa sa mga rason kon ngaa nakapabilin ako nga kalmado kag wala nahadlok. Ang akon mga pangamuyo kag ang mga pangamuyo sang iban daw pareho sa balsa nga nagabulig sa akon nga indi maglugdang.

Yelena Yatsyk b

Natawo: 1972 (Zeya)

Biograpiya: Nagaobra sia bilang sastre

Napamana niya si Andrey sang 1994. May isa sila ka bata nga babayi

Ang nanay kag manghod nga lalaki ni Yelena, nga si Yevgeniy Bitusov, amo ang una nga nagpa-Bible study sa mga Saksi ni Jehova. Nakita ni Yelena nga mapuslanon gid ang mga prinsipio sa Biblia kag nangin maayo ang iya kabuhi sang ginsunod niya ini. Nabawtismuhan sia sang 1997

Ang Iya Ginsiling

Ano ang epekto sini nga paghingabot sa imo?

Nagbakod pa gid ang akon relasyon sa Dios. Nagapangamuyo ako kay Jehova nga mangin kalmado ako, kag nakita ko kon paano niya ako ginasabat paagi sa paghatag sa akon sang kalinong. Nagdugang ang akon apresasyon sa akon mga kauturan. Makapaumpaw gid mabal-an nga handa sila magbulig sa akon. Nabatyagan ko gid nga bahin ako sang daku nga pamilya. Kag natun-an ko nga dapat ko ipangamuyo ang iban nga napriso man, pareho sa akon utod nga lalaki nga si Yevgeniy. Ginapangamuyo ko sila kada adlaw.

Ang mga eksperiensia sang aton mga sister nagpahanumdom sa aton nga ginapamatian ni Jehova ang aton mga pangamuyo kag buligan niya kita nga ipakita ang mga kinaiya nga kinahanglan naton para masarangan ang bisan ano nga pagtilaw.—1 Juan 5:14.

Time Line

Marso 21, 2019

Gin-raid ang balay sang pamilya Moiseyenko
Oktubre 13, 2020

Gin-raid ang balay nanday Yelena kag Galina
Nobiembre 22, 2021

Ginsugdan ang kaso
Pebrero 15, 2022

Ginbutangan sang restriksion ang ila pagbiyahe
Abril 24, 2023

Ginsugdan ang hearing

a b Indi paryentihanay sanday Sister Galina Yatsik kag Sister Yelena Yatsyk.

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE