Ang United Nations (UN) Working Group on Arbitrary Detention (WGAD) nagbalhag sang 12 ka pahina nga opinyon nga nagapakamalaut sa Russia bangod ilegal sini nga gin-aresto kag ginpriso si Brother Vladimir Alushkin. Ini nga report nagapanawagan sa Russia nga buy-an si Brother Alushkin kag bayaran sia sing danyos perwisyos bangod sa pagtapak sa iya mga kinamatarong.

Si Brother Alushkin gin-aresto sang Hulyo 15, 2018, sa tapos nga ginsulod sang sobra napulo ka armado nga pulis nga may tabon sa guya ang iya balay. Ginhalughog sang mga pulis ang iya balay sing halos apat ka oras. Ginpanguha nila ang mga cell phone, mga gadyet, mga Biblia, kag iban pa nga literatura, antes nila sia gindala sa presinto para kuestyunon.

Si Brother Alushkin ginbutang sang mga pulis sa temporaryo nga prisuhan sa sulod sang duha ka adlaw, antes nagmando ang Pervomayskiy District Court sang Penza nga prisuhon sia sing duha ka bulan bisan wala pa sia mabista. Pagkatapos sini, duha ka beses pa nga ginpalawig sang korte ang pag-aresto kay Brother Alushkin. Mga anom ka bulan sia nga ginpriso bisan wala sia mabista, kag pagkatapos sini gin-house arrest sia, kag asta subong naka-house arrest sia gihapon.

Bangod gusto pamatud-an ni Brother Alushkin nga wala sia sing sala kag gusto niya nga buy-an sia, nag-appeal sia sa WGAD. Ini nga panel nga ginahuman sang independiente nga mga eksperto sa tawhanon nga kinamatarong, nga gintugyanan sang UN Human Rights Council, nagauyat sang mga kaso sang mga tawo nga ilegal nga ginpriso sang mga pulis ukon sang ilegal nga mga pagpang-house arrest, pagpriso nga wala mabista, ukon pagbilanggo nga ginmando sang korte.

Sa tapos marepaso sing detalyado ang pangangkon sang Russia nga si Brother Alushkin may ginahimo nga hilikuton nga batok sa gobierno, ang WGAD nagsiling: “Ang tanan nga hilikuton nga ginpakigbahinan ni Brother Alushkin puro lamang mahidaiton nga relihioso nga mga pagtinipon. Maathag sa Working Group nga wala sing ginhimo si Mr. Alushkin magluwas nga gamiton ang iya kinamatarong sa kahilwayan sang relihion sa idalom sang artikulo 18 sang Covenant [amo ini ang International Covenant on Civil and Political Rights, kag miembro man sini ang Russia].” Gani ang opinyon nagasiling nga “gusto gid sang Working Group ipadaku nga si Mr. Alushkin dapat wala gin-aresto kag dapat wala sia ginpriso nga wala mabista kag dapat indi pagbistahon si Mr. Alushkin.” Dugang pa, ang WGAD nagpangabay sa gobierno sang Russia nga “tapuson na gilayon ang inhustisya batok kay Mr. Alushkin,” kag ginainsister sini nga “ang nagakaigo nga solusyon amo nga buy-an gilayon si Mr. Alushkin.”

Ginkilala man sang WGAD nga ini nga sahi sang kaso wala lamang natabo kay Brother Alushkin sa Russia. Sia “isa lamang sa mas nagadamo subong nga mga Saksi ni Jehova sa Russian Federation nga gin-aresto, ginpriso, kag ginkasuhan bilang kriminal bangod lamang sa ila pagpanghikot base sa ila kahilwayan sang relihion”—ang kinamatarong nga ginaproteksionan sang kasuguan nga ginapatuman sa bilog nga kalibutan. Gani, bilang pagkondenar sa paghingabot sa tanan naton nga masigkasumilimba sa Russia, ang WGAD maathag nga nagsiling nga ang ila opinyon wala lamang naaplikar sa ilegal nga pagpriso kay Brother Alushkin kundi sa tanan man nga Saksi ni Jehova nga “pareho man ang sitwasyon kay Mr. Alushkin.”

Ang gobierno sang Russia wala pa gid sing may ginsunod sa mga rekomendasyon sang WGAD. Sa baylo ang mga awtoridad sang Russia sa Penza nag-iskedyul nga si Brother Alushkin bistahon sa Agosto 2019. Ang mga hearing gin-iskedyul nga padayunon sa Nobiembre 15, 19, kag 22, 2019.

Samtang nagalaum kita nga sundon sang korte sang Russia ang opinyon sang WGAD sa ila desisyon para kay Brother Alushkin, pareho sa salmista, ang aton bug-os nga pagsalig ara kay Jehova: “Indi ako mahadlok. . . . Si Jehova yara sa akon tupad subong akon manugbulig . . . Mas maayo ang magdangop kay Jehova.”—Salmo 118:6-9.