DISIEMBRE 23, 2021
RUSSIA

Ang mga Aman ni Jehova Naghatag sing Paghidait sa Pamilya Postnikov

I-PLAY

Time Line

Sa indi madugay, ipahibalo sang Birobidzhan District Court of the Jewish Autonomous Region ang desisyon sini sa kaso ni Brother Oleg Postnikov kag ni Sister Agnessa Postnikova. Wala pa sing may ginsiling ang piskal kon ano nga sentensia ang gusto niya sa sini nga kaso
Pebrero 12, 2021

Ginpasakaan sang kaso sang FSB si Agnessa. Si Oleg kag si Agnessa gin-akusar nga nagahimo sang isa ka grupo sang mga “kriminal” kag ginatudlo nila sa iban ang ila “extremist” nga mga panudlo. Pareho sila nga ginmanduan nga indi maghalin sa ila lugar kag indi sila puede makakuha sang kuarta sa banko. Gindugang man ang ila mga ngalan sa listahan sang mga terorista sa Russia
Pebrero 12, 2020

Ginpasakaan sang kaso sang FSB si Oleg

Impormasyon Parte sa Ila

Oleg Postnikov

Natawo: 1965 (Vyazemsky, Khabarovsk Territory)

Biograpiya: Nag-obra sia bilang plumber. Sang tin-edyer sia, miembro sia sang isa ka gang. Napriso sia bangod sang mga krimen nga iya ginhimo. Nagtuon sia sang Biblia sa sulod sang prisuhan. Paggua niya, nabawtismuhan sia bilang isa sa mga Saksi ni Jehova sang 1986

Sang 1989, napangasawa niya si Agnessa. May duha sila ka kabataan

Ang Iya Ginsiling

Paano mo natun-an ang Biblia sang ara ka sa prisuhan?

May Saksi didto nga napriso kay indi sia magsoldado. . . . Pirme namon ginaistoryahan ang mga ebidensia nga may Dios kag kon ngaa sala ang teoriya sang ebolusyon. Ginaistoryahan man namon ang komplikado nga mga butang kag ang mga desinyo nga makita sa aton uniberso. Ang amon pag-istoryahanay nagpabag-o sang akon pagtamod. . . . Sang ulihi ginbasa ko ang pila ka publikasyon sang mga Saksi ni Jehova. . . . Sang makagua ako, ginpadayon ko ang pag-Bible study kag nabawtismuhan ako.

Ano ang natun-an mo parte sa pagsalig kay Jehova?

Pirme na gid ako nagapangamuyo subong ilabi na kon makigkita ako sa imbestigador. Maathag nga indi bastante ang akon kaalam kag kusog para mabatuan ang mga pahito sang imbestigador para talikdan ko ang akon pagtuo sa Dios. Narealisar ko nga kon gusto ko mangin kalmado kag may kompiansa, dapat magsalig ako sing bug-os kay Jehova.

Ano nga teksto sa Biblia ang nakapalig-on sa imo?

Pirme ko ginapamensar ang ginasiling sang Josue 1:9: “Kaupod mo si Jehova nga imo Dios bisan diin ka magkadto.” Nagapahanumdom ini sa akon nga mahimo makalab-ot ako sa mga lugar nga indi ko gusto kadtuan. Pero ginapasalig ako ni Jehova nga daw nagasiling: ‘Updan ta ka, indi ka magkabalaka. Kon paano nga gin-updan ko [ang matutom nga mga lalaki pareho kay] Jose, maupod man ako sa imo.’ Nagbulig ini sa akon nga indi pagkabalak-an ang matabo sa palaabuton. Nakabulig man ini sa akon nga indi paghunahunaon ang makapaluya nga mga butang.

Agnessa Postnikova

Natawo: 1963 (Kazakhstan)

Biograpiya: Ikalima sia sa pito ka kabataan. Mahilig sia magsaot kag mag-perform sa theater sang lamharon sia. Nanamian man sia mag-ski kag mag-skate. Subong, nanamian sia sa uma, magsagod sang mga bulak, kag mag-hiking. Nakaobra sia sa talahian

Nabawtismuhan sia sang 1979. Napamana niya si Oleg sang 1989

Ang Iya Ginsiling

Ano ang nakabulig sa imo sa sining mabudlay nga tion?

Gusto ko gid pasalamatan ang Nagadumala nga Hubon sa pag-aman sing espirituwal nga pagkaon sa nagakaigo nga tion. Gusto ko man pasalamatan ang tanan nga kauturan nga nagabulig sa paghanda sang mga kanta, pelikula, video, kombension, kag bag-o nga mga translation sang Biblia. Nagapasalamat ako kay Jehova nga may mapinalanggaon ako nga pamilya nga nagapabakod sa akon sa sining mabudlay nga tion.

Ano nga mga aman ni Jehova ang nakabulig gid sa imo?

Nakabulig sa akon ang pagpangamuyo kay Jehova kag ang pagdumdom pirme sang mga kanta pareho sang, ‘Sa Bag-o nga Duta’ kag ‘Dali Na Lang Katama.’ Ini nga mga kanta parte sa bag-ong kalibutan. Makapakalma ini, kag nagapasalig nga palangga ako sang akon Amay.

Ini nga mga eksperiensia dugang nga pamatuod nga ginahanda ni Jehova ang iya katawhan para mangin matutom sa sarisari nga mga kabudlayan. Kabay pa nga padayon kita nga magsalig sa “mainunungon nga gugma kag pagkamasaligan” ni Jehova.—Salmo 115:1.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE