Ang duha sa aton pinalangga nga mga pamatan-on sa Russia, nga sanday Brother Yegor Baranov kag Sister Darya Dulova, padayon nga nagapakita sing kaisog bisan pa mahimo sila pamatbatan nga guilty kag mapriso sing malawig. Si Brother Baranov 19 anyos pa lang kag ara subong sa prisuhan bisan wala pa sia mabista. Si Sister Dulova 18 anyos pa lang sang gin-raid sang mga awtoridad ang iya balay. Sila ang pinakabata sa 380 ka kauturan sa Russia nga ginpasakaan sing kaso kriminal bangod sa ila pagtuo.

Si Brother Baranov ginpriso bisan wala pa sia mabista sugod sang Mayo 27, 2020. Si Sister Dulova naman nagahulat sang desisyon sang korte sa duha ka kaso nga ginpasaka batok sa iya. Bisan pa sang mga kabudlayan nga ila ginaatubang, determinado sila nga duha nga magpadayon nga matutom kay Jehova.

Sang Mayo 27, gin-raid sang armado nga mga agent sang Federal Security Service (FSB) ang balay nga ginaistaran ni Brother Baranov upod sa iya nanay. Dayon, si Judge Aleksey Shatilov nagmando nga ibutang sa detention center si Brother Baranov bisan wala pa sia mabista, bangod “isa sia sa mga lider” sang mga Saksi ni Jehova sa ila lugar.

Sa sining makahaladlok nga eksperiensia sang pag-raid sa ila, si Brother Baranov nagsiling nga nangin kalmado sia sa tapos sia makapangamuyo kay Jehova. Sia nagsiling: “Ang isa sa mga agent nga nag-raid sa amon balay nagsiling nga daw ginahulat ko na kuno sila nga mag-abot.”

Siling ni Brother Baranov, pirme niya ginapahanumdom ang iya kaugalingon nga “bangod gintugutan ni Jehova nga matabo ini nga sitwasyon, buot silingon mabatas ko ini.” Nagsiling pa sia: “Ang hugot nga pagpangamuyo nga buligan ako sang Dios kag hatagan sang balaan nga espiritu nakabulig gid sa akon nga indi mahadlok. Isa pa, sigurado ako nga indi ako kriminal, matinlo ang akon konsiensia, kag ginahingabot ako bangod sa akon pagtuo.”

Nagsiling si Brother Baranov nga wala sia ginakulbaan sa detention center. Ang iya upod nga mga priso indi bayolente, ginarespeto nila sia, kag ginatrato nga daw manghod nila. “Bal-an nila nga dapat wala ako diri sa prisuhan,” siling niya.

Sang Agosto 1, 2018, gin-raid sang mga pulis ang apartment nga ginaistaran ni Sister Dulova upod sa iya nanay. Siling ni Sister Dulova, bisan pa grabe gid ang iya stress bangod sa pag-raid kag pag-aresto sa iya, mabakod gihapon ang iya pagtuo. “Determinado ako nga magpabilin nga matutom kay Jehova,” siling niya. “Alagaron ko si Jehova asta san-o, bisan ano pa ang matabo.”

Ang pagbista sa kaso kriminal batok kay Sister Dulova nagsugod sang Septiembre 2019 sa Karpinsky City Court sang Sverdlovsk Region. Sa isa sang katapusan nga mga hearing, nagsiling si Sister Dulova sa korte nga natural lang nga isugid sang mga tawo sa iban ang maayo nga mga butang nga nagakatabo sa ila kabuhi. Sia nagsiling: “Halimbawa, kabalo ako nga sa indi madugay himuon sang Dios ang duta nga isa ka paraiso, kag indi na magbatyag sing kasubo ang mga tawo. Indi bala kanami gid isugid ini nga balita sa iban?”

Bisan pa may kaisog nga nagpanindugan sa korte si Sister Dulova, kag makatarunganon ang iya mga sabat, ginpamatbatan sia nga guilty sang Enero 27, 2020. Ginsentensiahan sia sing isa ka tuig nga suspended prison sentence. Ang iya abogado nag-apelar na.

Sang Agosto 6, 2020, ginbasura sang Sverdlovsk Regional Court ang desisyon sa kaso ni Sister Dulova. Ginbalik ini sa Karpinsky City Court kag ginpauyatan sa lain naman nga judge. Wala pa sing petsa kon san-o ini bistahon. Samtang ginahulat niya ang mangin desisyon sa sini nga kaso, may isa pa gid ka kaso nga ginpasaka batok sa iya, sa iya nanay, kag sa tatlo pa ka Saksi.

Madamo gid sing natun-an si Brother Baranov kag si Sister Dulova sa mga pagtilaw nga ila ginaatubang.

Ginpaathag ni Sister Dulova kon ano ang nakabulig sa iya: “Pabakura ang imo relasyon sa Dios paagi sa pagbasa sang Biblia, paghanda para sa mga miting sang kongregasyon, kag pagsaulo sang aton mga ambahanon sa Ginharian. Pamalandungi pirme ang imo mga natun-an sa Biblia nga makabulig sa imo nga indi pirme pagpensaron ang imo mga ginakabalak-an kag ginakahadlukan.”

Si Brother Baranov nagsiling: “Para mabatas ang mga pagtilaw, dapat malapit ka sa Dios. Indi pag-usiki ang imo tion. Pabakura na ang imo pagpakig-abyan kay Jehova nga Dios subong.”

Sa Biblia, madamo sing halimbawa sang mga pamatan-on nga ginbuligan ni Jehova nga mangin matutom kag maisog. Kabalo kita nga padayon niya nga buligan ang aton pinalangga nga mga pamatan-on nga ginahingabot sa Russia kag sa iban nga bahin sang kalibutan.—1 Samuel 1:20; 16:18; 2 Hari 5:1-3; Daniel 1:14-17; 3:17-27.