HULYO 22, 2022
RUSSIA

Ang mga Saksi sa Shuya Nagbatas sang Inhustisya

I-PLAY

Sa indi madugay, ipahibalo sang Shuya City Court of the Ivanovo Region ang desisyon sini sa kaso ni Brother Aleksey Arkhipov, ni Brother Dmitriy Mikhaylov kag sang iya asawa nga si Yelena, ni Sister Svetlana Ryzhkova kag ni Sister Svetlana Shishina. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Septiembre 21, 2017

Ginpasugtan sang isa ka judge ang pag-wiretap sa mga linya sang telepono sang mga Mikhaylov
Enero 15, 2018

Ginpasugtan sang isa ka judge ang pag-wiretap kag pag-surveillance paagi sa video sang balay ni Sister Svetlana Ryzhkova
Abril 20, 2018

Gin-raid sang mga awtoridad ang mga balay sining lima ka Saksi
Mayo 29, 2018

Gin-aresto sang mga opisyal si Dmitriy kag ginpasakaan sia sang kaso bangod sia kuno ang nagagasto para sa mga hilikuton sang isa ka extremist nga organisasyon. Ginbutang sia sa pretrial detention
Hunyo 22, 2018

Si Aleksey gindugang sa mga ginkasuhan kag gindumilian sia nga maghalin sa ila lugar
Hunyo 27, 2018

Si Sister Yelena Mikhaylova, si Sister Svetlana Ryzhkova, kag si Sister Svetlana Shishina gindugang sa mga ginkasuhan
Nobiembre 15, 2018

Pagkatapos sang halos anom ka bulan, ang court of appeals nagmando nga paguaon si Dmitriy sa pretrial detention
Agosto 10, 2021

Ginsugdan ang hearing
Septiembre 16, 2021

Ginbalik sa piskal ang kaso para rebyuhon
Mayo 25, 2022

Ginpadayon ang hearing

Impormasyon Parte sa Ila

Aleksey Arkhipov

Natawo: 1960 (Arkhangelsk, Arkhangelsk Region)

Biograpiya: Soldado sia sadto. Nag-obra sia bilang drayber sang bus

Napangasawa niya si Natalya sang 1984. May duha sila ka bata. Sang nagretiro sia, nagsaylo sila sa Shuya para atipanon ang tigulang na nga mga ginikanan ni Natalya

Natun-an niya ang kamatuoran sa Biblia halin sa iya kaupod sa trabaho. Nabawtismuhan sia bilang isa sa mga Saksi ni Jehova sang 2017

Ang Iya Ginsiling

Ano nga mga bersikulo sa Biblia ang nakabulig sa imo para makapadayon ka nga positibo sa sini nga tion?

Nakabulig gid sa akon ang laygay sa 1 Corinto 10:24. Ini nagasiling: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.” Nagpahanumdom ini sa akon nga indi magpokus sa akon mga problema kundi mas pensaron ang sitwasyon sang iban.

Napalig-on man ako sang ginsiling ni Jesus sa Mateo 5:10-12: ‘Malipayon ang mga ginahingabot tungod sa pagkamatarong . . . Malipayon kamo kon . . . ginabutangbutangan kamo sang tanan nga sahi sang kalautan tungod sa akon. Magkasadya kamo kag magkalipay, kay daku ang inyo padya sa langit, bangod amo man sina ang paghingabot nila sa mga manalagna nga nauna sa inyo.’ Ini nga mga bersikulo nakabulig sa akon nga makabatas kag naghatag sa akon sang kaisog kag paglaum.

Dmitriy Mikhaylov

Natawo: 1977 (Kupchanovka, Kazakhstan)

Biograpiya: Nag-eskwela sia sing electronics. Nag-obra sia bilang systems administrator. Nanamian sia sa photography kag mag-edit sang video

Natun-an niya ang kamatuoran sang tin-edyer sia. Nabawtismuhan sia sang 1993. Napangasawa niya si Yelena sang 2003

Ang Iya Ginsiling

Paano ninyo napalig-on nga mag-asawa ang isa kag isa bisan pa indi kamo magkaupod kay ara ka sa pretrial detention?

Sang ara ako sa detention center, napabakod gid ako sang mga sulat sang akon pinalangga nga asawa. Espesyal gid ini para sa akon kay naghalin ini sa pinakapalangga ko nga tawo. Pero ang pinakaimportante gid kay ginapabakod sini nga mga sulat ang akon pagpalangga kag katutom kay Jehova kag pati man ang akon pagtuo kag paglaum. Daw pareho lang nga ginabuligan ni Jehova si Yelena nga makakita sang insakto nga mga tinaga para paumpawan ako kag pakalmahon. Sang ulihi nabal-an ko kon ngaa amo gid sina ang epekto sang mga sulat ni Yelena sa akon. Antes gali sia magsulat, nagapangamuyo gid sia kay Jehova, naga-research, kag ginabinagbinag gid niya ang Biblia.

Ginapalig-on ko man si Yelena paagi sa pagbalos sa iya mga sulat kag pagsugid sa iya sang makapalig-on nga mga punto nga akon nakita sa akon pagbasa sang Biblia. Ginasugid ko sa iya kon paano ako ginpabakod ni Jehova. Pirme ko gid ginahambal sa iya kon paano ako ginapakamaayo ni Jehova kag ginapasalamatan ko gid si Yelena sa iya pagpalangga, pagsakripisyo, kag katutom sa aton Amay bisan ano man ang matabo.

Yelena Mikhaylova

Natawo: 1983 (Shuya)

Biograpiya: Sang nakagradweyt sia sa high school, nag-obra sia bilang tutor sa mathematics kag physics

Napatay ang iya amay sang nagaedad sia sang siam ka tuig. Nangita sia sang mga sabat sa iya mga pamangkot parte sa pagluntad sang Dios kag kon ano ang nagakatabo kon mapatay ang tawo. Sang nasabat ang iya mga pamangkot paagi sa Biblia, nagpabawtismo sia sang 1999. Napamana niya si Dmitriy sang 2003

Ang Iya Ginsiling

Ano nga mga problema ang imo naatubang sang gin-detain ang imo bana?

Kinahanglan nga doblehon ko ang akon pagpangabudlay para maatipan ang akon 80 anyos nga ugangan. Nagluya gid sia sang gin-aresto si Dmitriy. Mas mabudlay pa gid sa akon kay ang detention center 35 ka kilometro halin sa balay. Daku nga tion kag kusog ang kinahanglan para magbiyahe didto. Dugang pa, pirme ako ginapatawag sang mga imbestigador, kag gina-pressure nila ako kag ginapahog. Sang ulihi, ginkasuhan man nila ako.

Ano ang nakabulig sa imo nga mabatas ini nga mga kabudlayan?

Nangamuyo ako sa akon Amay kag nangayo sing kusog para mabatas ko ang tanan nga nagakatabo. Indi ako makatulog sing maayo bangod sa stress. Pero pagbugtaw ko kon aga, kabalo ko nga damo ako sing dapat himuon. Sa bulig ni Jehova, nahimo ko ang mga butang nga kon wala ang bulig ni Jehova indi ko gid masarangan.

Svetlana Shishina

Natawo: 1975 (Orenburg, Orenburg Region)

Biograpiya: Nagaobra sia bilang cosmetologist

Nagpamana sia sang 1995. May isa sila ka bata nga lalaki kag isa ka bata nga babayi sang iya bana

Sang nagaedad sia sang anom ka tuig, nakabasa sia sang Biblia para sa mga bata. Pila ka tuig sang ulihi, nabal-an niya kon ano ang ngalan sang Dios kag nagtuon sia sa Biblia upod sa mga Saksi ni Jehova. Nabawtismuhan sia sang 2002

Ang Iya Ginsiling

Ano ang reaksion sang imo indi Saksi nga bana sa sini nga kaso?

Sang natabo ang pagpang-raid, abi ko maakig sia sa akon. Nakibot gid ako sang ginhakos niya ako kag ginsilingan: “Indi magkabalaka. Mangin OK gid ang tanan. Batason ta ’ni nga duha.” Sina nga tion, sang nabatyagan ko ang iya suporta, naumpawan gid ako. Nagmag-an gid ang akon pamatyag.

Ano ang reaksion sang imo bana kay ginabuligan ka sang imo mga kauturan?

Indi lang isa ka bes nga gingamit sila ni Jehova para hatagan kami sang amon materyal nga kinahanglanon. Nakabaton man kami sang mga package nga may unod nga mga grocery. Indi gid maintiendihan sang akon bana kon ngaa ginabuligan kami sang mga kauturan kag wala sila nagapabayad. Nalipay gid ako sa pagsugid sa akon bana nga si Jehova ang rason sini tanan. Nakita ni Jehova ang aton mga kinahanglanon, kag ginaatipan gid niya ang iya matutom nga mga alagad.

May rason gid kita sa pagkalipay bangod sang kaisog kag pagbatas nga ginapakita sang aton pinalangga nga mga kauturan sa Russia.—1 Tesalonica 2:20.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE