HULYO 25, 2023
RUSSIA

Ang mga Saksi sa Vladivostok Napabakod Bangod Positibo Sila kag Nagapangamuyo Pirme

I-PLAY

Sa indi madugay, ipahibalo sang Pervorechenskiy District Court of Vladivostok ang desisyon sini sa kaso nanday Sister Nina Astvatsaturova, Sister Yelena Barmakina, Sister Ludviga Katanaeva, Sister Yekaterina Treguba, Sister Yelena Tsorn, Brother Igor Lonchakov kag Brother Yuriy Redozubov. Wala pa sing ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Yelena Barmakina

Natawo: 1967 (Cherepanovo, Novosibirsk Region)

Biograpiya: Nag-obra sia bilang photographer

Nakilala niya ang mga Saksi ni Jehova sang nagtuon sa Biblia ang iya nanay kag utod nga lalaki. Nabawtismuhan sia sang 2000

Napamana niya si Dmitriy sang 2006. Ginsentensiahan si Dmitriy nga mapriso sing walo ka tuig sang 2023

Ang Iya Ginsiling

Ano ang nakabulig sa imo para mapaumpawan ka kag mapabakod sa sining mabudlay nga tion?

Sa tapos gin-raid ang amon balay, gin-aresto kami sang akon bana kag gin-detain si Dmitriy. Indi ako kabalo kon ano ang himuon ko kay wala ang akon bana kag indi man ako kabalo kon paano ko sia mabuligan. Nabudlayan ako magpangamuyo sa sulod sang pila ka adlaw bangod nasubuan kag nabalaka gid ako. Pero nadumduman ko nga kon nabudlayan gid ako kag indi ako kabalo kon ano ang akon ipangamuyo, puede ko basahon ang mga pangamuyo sang mga alagad sang Dios sadto kag tamdon ini ni Jehova nga akon pangamuyo. (Roma 8:26) Nagpaumpaw gid ini sa akon sa tion nga nabudlayan ako.

Igor Lonchakov

Natawo: 1977 (Saratov, Saratov Region)

Biograpiya: Nagaobra sia bilang telecommunications operator para sa post office

Nangin Saksi ni Jehova ang nanay ni Igor sang nagaeskwela si Igor sa college. Nagtuon man sa Biblia si Igor sang makita niya ang kalipay sang iya nanay. Nabawtismuhan sia sang 2008

Ang Iya Ginsiling

Ano nga bersikulo sa Biblia ang nagpalig-on gid sa imo?

Indi gid maayo ang epekto sa akon sini nga kaso sa pisikal, emosyonal, kag sa pinansial. Bangod sini nadumduman ko nga kanami sang akon kabuhi sadto. Ginpangamuyo ko kay Jehova ang akon ginabatyag. Sang ulihi, ginpamalandungan ko ang ginsiling sang Manugwali 7:10: “Indi ka magsiling, ‘Ngaa mas maayo sang una sangsa subong?’ kay indi ina maalamon nga pamangkot.” Ina nga bersikulo nakabulig sa akon nga pamensaron ang mga pagpakamaayo nga nabaton ko: ang akon nanay, ang akon nobya, kag ang akon mga kauturan sa kongregasyon. Ginasuportahan gid nila ako. Kag ang pinakaimportante, nabal-an ko nga kaupod ko si Jehova. Subong kon magpangamuyo ako kay Jehova, pirme na ako nagapasalamat sa iya bangod sa tanan nga pagpakamaayo nga akon nabaton imbes nga mga problema ko lang ang isugid ko sa iya.

Yuriy Redozubov

Natawo: 1972 (Komsomolsk-on-Amur, Khabarovsk Territory)

Biograpiya: Natun-an niya ang painting sang bata pa sia, kag nangin maestro sia sa art

Napangasawa niya si Anastasiya sang 1998. May tatlo sila ka bata nga babayi

Ginbasa nila nga mag-asawa sing magkaupod ang Biblia. Sang naistorya nila ang mga Saksi ni Jehova, nanamian sila kay ang ila mga pamangkot nasabat paagi sa Biblia. Nabawtismuhan si Anastasiya sang 2003 kag si Yuriy sang 2004

Ang Iya Ginsiling

Paano ka nabuligan sang pangamuyo nga makabatas?

Sang nagsugod ini nga paghingabot, nangin mas espesipiko pa gid ang akon mga pangamuyo. Kag determinado ako nga pirme magpangamuyo kay Jehova bisan ano man ang matabo sa akon. Ang isa sa ginapangayo ko kay Jehova amo nga mangin kalmado lang ako. Nakabulig gid ini sa akon kag sa akon pamilya nga indi madaug sang pagluya sang buot kag kabalaka. Ginatamod ko ang akon sitwasyon nga isa ka pribilehiyo nga maalagad si Jehova. Mas nagbakod pa gid ang akon relasyon sa iya.

Yekaterina Treguba

Natawo: 1991 (Vladivostok, Primorye Territory)

Biograpiya: Maestra siya sa English

Ginabasahan sia sang iya lola sang Ang Akon Libro sang mga Sugilanon sa Biblia sang bata pa sia. Nagtuon sia sang Biblia sang 15 anyos sia. Nabawtismuhan sia sang 2008

Ang Iya Ginsiling

Ano ang natun-an mo sa imo naeksperiensiahan?

Ang isa sa nabudlayan ko gid amo nga kon paano ako padayon nga mangin malipayon bisan pa sa mga kabudlayan. Ginabasa ko ang parte sa mga kauturan nga gin-detain ukon ginpriso, kag natalupangdan ko nga kon daw nagabudlay ang ila sitwasyon, daw mas malipayon pa gid sila. Pero wala ko kabalo kon ano dapat ang akon rason nga mangin malipayon. Nabuligan ako sang ginpamalandungan ko ang lyrics sang amhahanon sang Ginharian numero 111, nga “Mga Rason sa Pagkalipay.” May linya ini nga nagasiling: “Tudok gid ang aton kalipay,/ Kay Pulong sang Dios nahangpan.” Ginpamensar ko kon paano ko pa gid tun-an sing mas maayo ang Pulong sang Dios, ang Biblia, kag magpangamuyo pirme para madugangan ang akon kalipay. Amo na ina ang ginahimo ko subong.

Yelena Tsorn

Natawo: 1972 (Vladivostok, Primorye Territory)

Biograpiya: Nagadumala kag nagatudlo sa isa ka eskwelahan sang magagmay nga kabataan

Nasabat sang iya kaingod nga Saksi ni Jehova ang iya mga pamangkot parte sa pag-antos kag kamatayon. Nabawtismuhan sia sang 2011

Ang Iya Ginsiling

Paano ka nakapabilin nga positibo?

Kon pamensaron ko ang nagligad nga mga tuig, nakumbinsi pa gid ako nga kontrolado ni Jehova ang tanan. Nabal-an niya pirme ang tanan nga nagakatabo. Pirme ko ginapahanumdom ang akon kaugalingon sang promisa ni Jehova sa Isaias 54:17: “Wala sing ginhimo nga hinganiban nga magmadinalag-on batok sa imo . . . Amo ini ang palanublion sang mga alagad ni Jehova.” Nabuligan ako sini nga magpokus sa palaabuton kag padayon nga magpasalamat sa pagpalangga nga ginpakita sa akon sang mga kauturan kag ni Jehova.

Napaumpawan gid kita nga mahibaluan nga padayon nga ginapakamaayo kag ginaatipan ni Jehova ang iya matarong nga mga alagad, kag ‘ginaamligan sila sang iya kahamuot.’—Salmo 5:12.

Time Line

Agosto 6, 2019

Ginkasuhan si Yelena Barmakina
Hunyo 8, 2020

Ginkasuhan man sanday Nina, Ludviga, kag Yelena Tsorn
Hunyo 17, 2020

Ginsugdan ang hearing ni Yelena Barmakina
Hulyo 9, 2020

Gin-raid ang mga balay nanday Nina, Ludviga, Yelena Tsorn, kag Yuriy. Gindala si Yuriy para interogahon. Ginbutangan sang restriksion ang pagbiyahe nanday Nina, Ludviga, kag Yelena Tsorn
Septiembre 4, 2020

Ginkasuhan si Igor
Septiembre 8, 2020

Ginkasuhan si Yekaterina
Septiembre 29, 2020

Ginbalik sa piskal ang kaso kontra kay Yelena Barmakina bangod wala sang bastante nga ebidensia sa extremism
Agosto 11, 2021

Ginkasuhan si Yuriy. Ginsugdan liwat ang kaso ni Yelena Barmakina, kag gintingob sa isa ang ila mga kaso
Septiembre 28, 2022

Ginsugdan ang hearing

a b Wala mainterbyu sanday Sister Astvatsaturova kag Sister Katanaeva.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE