Sa Oktubre 5, 2020, * ipahibalo sang Zasviyazhsky District Court sa siudad sang Ulyanovsk ang desisyon sini sa kaso nanday Brother Aleksandr Ganin, Brother Khoren Khachikyan, Brother Andrey Tabakov, kag Brother Mikhail Zelenskiy, pati man ang sa kaso ni Brother Sergey Mysin kag sang iya asawa nga si Nataliya. Ang kada isa sa ila mahimo mapriso sing tatlo asta pito ka tuig. Ginkumpiskar man sang korte base sa pangabay sang piskal ang ila mga kuarta kag mga salakyan, nga kon totalon, naglab-ot sa kantidad nga 1.57 million rubles ($20,000 U.S.).

Aleksandr Ganin

• Natawo: 1957 (Ekhabi, Sakhalin Island)

• Biograpiya: Sobra 20 ka tuig na sugod sang ginbawtismuhan sia bilang isa sa mga Saksi ni Jehova. Retirado na sia kag nanamian manghardin

Khoren Khachikyan

• Natawo: 1985 (Yerevan, Armenia)

• Biograpiya: May degree sia sa economics. Sang pamatan-on pa sia, nag-entra sia sa mga kompetisyon sang wrestling. Kilala sia nga mabuot kag maayo nga tawo

• Nagtuon sia sa Biblia upod sa mga Saksi ni Jehova bangod gusto niya nga makilala sing maayo ang Dios kag sundon ang Iya mga sugo. Nagdayaw gid sia sa pangatarungan kag paghiliugyon sang mga libro sang Biblia

Sergey Mysin

• Natawo: 1965 (Kulebaki, Nizhny Novgorod Region)

• Biograpiya: Samtang nagaeskwela sia para mangin engineer, nakilala niya ang iya asawa nga si Nataliya. Nagpakasal sila sang 1991. Sobra 20 ka tuig na sila nga updanay sa pag-alagad kay Jehova upod sa ila duha ka dalagku na nga kabataan. Mahilig sila sa sports, ilabi na sa hampang nga lacrosse

Nataliya Mysina

• Natawo: 1971 (Leningrad, nga subong ginatawag na nga Saint Petersburg)

• Biograpiya: Nagdaku sia sa pamilya sang mga soldado. Nag-istar sia sa Germany antes sia naggradweyt sa kolehiyo bilang isa ka pharmacist. Mahilig sia magluto kag mag-bake

Andrey Tabakov

• Natawo: 1973 (Minsk, Belarus)

• Biograpiya: Parte sa information technology ang iya obra. Ginpangasawa niya si Marina sang 2006. Nagtuon sila sa Biblia upod sa mga Saksi ni Jehova kag nabawtismuhan. Mahilig sia sa electronics, ilabi na sa mga radyo kag mga kompyuter

Mikhail Zelenskiy

• Natawo: 1960 (Bulaesti, Moldova)

• Biograpiya: Nag-obra sia bilang marinero kag drayber sang trak. Ginpangasawa niya si Victoria sang 1989. Sang una nga mga tuig sang dekada ’90, nagtuon sila sa Biblia. Natun-an nila nga palanggaon si Jehova kag nabawtismuhan

Halos tatlo ka tuig na ang nagligad, ginsugdan sang Russia’s Federal Security Service (FSB) ang isa ka surveillance operation nga nagalakip sang pagrekord sang mga tawag sa telepono sang aton mga kauturan sa Ulyanovsk. Sang Pebrero 24, 2019, ginsugdan sang FSB ang pag-imbestigar sa mag-asawa nga Mysin kag kanday Brother Khachikyan, Brother Tabakov, kag Brother Zelenskiy.

Pagligad sang tatlo ka adlaw, sang mga alas 5 sang aga, gin-raid sang mga agent ang mga balay nanday Brother Khachikyan, Brother Tabakov, kag Brother Zelenskiy. Ining tatlo ka brother gin-aresto kag temporaryo nga ginpriso. Sina man nga aga, si Sister Mysina may nabaton nga tawag sa telepono. Ginsilingan sia sang nagtawag nga naguba ang iya salakyan kag ginpangabay sia kag ang iya bana nga maggua sa ila balay. Pagbukas ni Brother Mysin sang puertahan, puersa nga nagsulod sa ila apartment ang mga agent sang FSB. Ginhalughog nila ang ila apartment kag ginpanguha ang mga gadyet sang pamilya. Dayon, gin-aresto nila ang mag-asawa.

Pagkaaga, ginbutang sang Leninsky District Court sang Ulyanovsk Region si Brother Mysin sa pretrial detention. Si Sister Mysina naman kag ang tatlo pa ka brother gin-house arrest.

Si Brother Mysin nagtener sing 55 ka adlaw sa pretrial detention kag 123 ka adlaw nga naka-house arrest. Si Sister Mysina, kag sanday Brother Khachikyan, Brother Tabakov, kag Brother Zelenskiy gin-house arrest sing 50 asta 55 ka adlaw.

Sang aga sang Mayo 15, 2019, gin-raid sang mga agent sang FSB ang balay ni Brother Ganin kag gin-aresto sia. Duha ka adlaw sia sa temporaryo nga prisuhan.

Sila nga anom may ginasunod pa nga pila ka pagdumili sang gobierno sa ila mga hilikuton. Dugang pa, padayon sila nga ginahingabot sa iban nga paagi. Ginpadihutan sang awtoridad nga indi makuha sang mag-asawa nga Mysin ang ila kuarta sa banko nga mga 500,000 rubles ($6,313 U.S.) kag amo man ang kuarta sa banko ni Brother Tabakov nga mga 600,000 rubles ($7,575 U.S.).

Ginapangamuyo naton nga ang mga tinaga nga ginpasulat sang Dios sa salmista padayon nga magapabakod sa aton mga kauturan sa Russia, samtang padayon sila nga ginahingabot bangod sa ila pagtuo: “Ang Dios aton dalangpan kag kusog, handa gid sia nga magbulig sa tion sang kalisdanan.”—Salmo 46:1.