AGOSTO 10, 2023
RUSSIA

Determinado nga Mangin Malipayon Bisan sang Paghingabot

I-PLAY

Sa indi madugay, ipahibalo sang Syktyvkarskiy City Court of the Komi Republic ang desisyon sini sa kaso nanday Brother Aleksandr Ketov, Brother Andrey Kharlamov, Brother Aleksandr Kruglyakov, Sister Lidiya Nekrasova, kag Brother Sergey Ushakhin. Wala pa sing ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Andrey Kharlamov

Natawo: 1971 (Syktyvkar)

Biograpiya: Nagaobra sia bilang heating engineer

Napangasawa niya si Larisa sang 1990

Gin-istorya sia sang iya upod sa obra parte sa Biblia. Nagnami ang iya kabuhi sang ginsunod niya ang mga prinsipio sa Biblia. Nabawtismuhan si Andrey kag si Larisa sang 1994

Ang Iya Ginsiling

Ano ang nakabulig sa imo nga padayon nga makabatas?

Ang kada pagtilaw nagahatag sa akon sang kahigayunan nga mangin suod kay Jehova. Sang gin-akusar ako, may mga tion nga abi ko indi ko ini masarangan. Pero samtang nagaligad ang tion, nakita ko gid nga ginabuligan ako ni Jehova sa espesyal nga paagi. Ginagamit ni Jehova ang iban para palig-unon ako. Kumbinsido gid ako nga kaupod ko si Jehova, nga daw ginakugos niya ako. Ginapahanumdom ako sini sa ginsiling sang Santiago 5:11: “Ginakabig naton nga malipayon ang mga nagbatas. Nabatian ninyo ang pagbatas ni Job kag nahibaluan ninyo ang pagpakamaayo nga ginhatag ni Jehova, kag nakita ninyo nga si Jehova mapinalanggaon gid kag maluluy-on.” Bangod naeksperiensiahan ko ang pag-atipan ni Jehova, mas determinado pa gid ako nga ipakita ang gugma ko sa iya kag magpabilin nga matutom.

Aleksandr Kruglyakov

Natawo: 1979 (Ukhta, Komi Republic)

Biograpiya: Nagaobra sia bilang real estate agent

Ginsugdan niya basa ang Biblia sang tin-edyer sia. Ang pag-Bible study upod sa mga Saksi ni Jehova nakabulig sa iya nga untatan ang bisyo niya nga pag-inom kag pag-drugs. Nabawtismuhan sia sang 2000

Napangasawa niya si Tatyana sang 2005

Ang Iya Ginsiling

Ano ang nakabulig sa imo nga padayon nga magbantala bisan pa ginahingabot ka?

Sa Lucas 21:12, 13, gintagna ni Jesus nga hingabuton, prisuhon, kag dal-on sa atubangan sang mga awtoridad ang iya mga sumulunod. Pero nagsiling man sia: “Magaresulta ini sa inyo pagpanaksi.” Nagapensar ako nga mahuya ako nga kon didto na ako sa prisuhan madumduman ko nga may kahigayunan ako kuntani nga isugid sa iban ang kamatuoran pero wala ko ini ginhimo. Gani, goal ko nga maistorya ang madamo nga opisyal sang gobierno. Masami ko nga ginapaathag ang pagkapareho sang ila ginahimo kag sang aton ginahimo. Pareho naton gusto nga mag-uswag ang komunidad. Ginahimo nila ini paagi sa pagpriso sa mga kriminal para indi sila makahalit sa iban. Pero kon makagua gani sila, masami nga nagabalik sila sa paghimo sing malain. Paagi sa Biblia, ginabuligan namon ang mga tawo nga maghimo sang permanente nga pagbag-o sa ila kabuhi para mangin mabuot sila nga mga tawo.

Lidiya Nekrasova

Natawo: 1953 (Kuratovo, Komi Republic)

Biograpiya: Nag-obra sia bilang maestra kag nursing assistant. May tatlo sia ka bata nga lalaki

Nagpa-Bible study sia sang 1993. Naumpawan gid sia sang natun-an niya ang madamo nga kinaiya sang Dios, lakip ang hustisya. Nabawtismuhan sia sang 1997

Ang Iya Ginsiling

Ano ang nakabulig sa imo nga mabatas ini nga pagtilaw nga may kalipay?

Ang akon mga kauturan mahigugmaon gid nga regalo halin sa Dios! Nakita ko nga kinahanglan gid namon ang isa kag isa. Ang ila suporta kag pagpalig-on nakabulig sa akon nga indi maluyahan sing buot. Ang pagpokus sa akon gugma kay Jehova kag sa akon handum nga suportahan ang mga napriso man, nakabulig sa akon nga magpabilin nga matutom kay Jehova. Nabatyagan ko gid ang espiritu ni Jehova nga nagabulig sa akon. Gani, malipayon ako nga alagad ni Jehova.

Sergey Ushakhin

Natawo: 1961 (Pinyug, Kirov Region)

Biograpiya: Nagaobra sia sa isa ka pabrika sang papel

Napangasawa niya si Nataliya sang 1987. May isa sila ka bata nga lalaki kag isa ka bata nga babayi

Nakilala niya ang mga Saksi ni Jehova sang nagpa-Bible study ang iya nanay. Nasabat ang iya mga pamangkot paagi sa Biblia, gani nakumbinsi sia nga amo ini ang kamatuoran. Nabawtismuhan sia sang 1999. Si Nataliya nabawtismuhan sang 2005

Ang Iya Ginsiling

Ano ang nakabulig sa imo nga makapabilin nga positibo?

Kon naluyahan ka sang buot, normal lang nga kon kaisa mangluya ka kag mangin negatibo. Ang pagpangamuyo, pagbasa sang Biblia, kag ang pagpakig-upod sa akon mga kauturan nakabulig sa akon para makapabilin nga positibo. Ginasambit ko gid sa akon pangamuyo kay Jehova nga buligan ako nga mapalig-on ang iban, ilabi na ang madamo namon nga kauturan nga tigulang na. Ang pagbulig sa ila nga magpokus sa tanan nga maayo nga butang sa ila kabuhi kag pagpalig-on sa ila, nagahatag sa akon sang daku nga kalipay. Kadungganan gid nga gamiton ako ni Jehova sa sini nga paagi.

Ginapakita sini nga mga eksperiensia nga si Jehova nagahatag gid sang kabaskog sa aton mga kauturan para mabatas nila ang mga pagtilaw kag mangin matutom.—Isaias 40:29.

Time Line

Marso 2, 2021

Gin-raid ang mga balay sang indi magnubo sa 14 ka pamilya sang mga Saksi ni Jehova sa Syktyvkar. Si Aleksandr Ketov, Andrey Kharlamov, kag Aleksandr Kruglyakov gindala sa temporary detention facility. Ginbutangan sang restriksion ang pagbiyahe ni Lydia Nekrasova kag Sergey Ushakhin
Marso 3, 2021

Gin-release sa temporary detention si Aleksandr Ketov kag si Andrey Kharlamov pero gin-house arrest sila. Gindala sa pretrial detention si Aleksandr Kruglyakov
Abril 27, 2021

Gin-untat ang pag-house arrest kay Andrey Kharlamov
Abril 28, 2021

Gin-untat ang pag-house arrest kay Aleksandr Ketov, kag ginpagua sa pretrial detention si Aleksandr Kruglyakov
Abril 19, 2022

Ginsugdan ang hearing
Hunyo 9, 2022

Nagsiling ang judge nga kulang ang ebidensia sa extremism kag ginbalik ang kaso sa piskal
Pebrero 14, 2023

Ginpadayon ang hearing nga may bag-o nga judge

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE