Sang Septiembre 3, 2020, ginpamatbatan nga guilty sang Novozybkov Town Court sang Bryansk Region sanday Brother Vladimir Khokhlov, Sister Tatyana Shamsheva, Sister Olga Silaeva, kag Brother Eduard Zhinzhikov. Ginsentensiahan sila nga mapriso sing halin sa isa ka tuig asta isa ka tuig kag tatlo ka bulan. Pero bangod ginpriso na sila antes pa sila ginbista, ginpagua sila pagkatapos sang desisyon sa ila.

Vladimir Khokhlov

• Natawo: 1977 (Novozybkov, Bryansk Region)

• Biograpiya: Isa sia ka mekaniko. Nagsoldado man sia antes sia nangin isa sa mga Saksi ni Jehova. Nanamian sia mag-soccer, magbasa, magpangisda, kag maggitara

• Ginbuligan sia sang iya abyan nga makatuon sa Biblia. Sang 2007, ginpangasawa niya si Olga. May bata sila nga babayi nga si Anastasia. Ang ila bilog nga pamilya nagaalagad kay Jehova

Tatyana Shamsheva

• Natawo: 1977 (Cherepovets, Vologda Region)

• Biograpiya: Isa sia ka ekonomista. Nagtudlo sia sing economics, law, kag accounting sa sulod sang madamo nga tinuig. Nabawtismuhan sia sang 1995. Nanamian sia magsugid sa iban sang maalamon nga mga laygay nga ara sa Biblia

Olga Silaeva

• Natawo: 1988 (Davydovo, Moscow Region)

• Biograpiya: Sia ang kamanghuran sa tatlo ka kabataan. Naggradweyt sia sa isa ka technical school kag may degree sa thermal engineering. Nanamian sia magpanahi, magbasa, kag mag-volleyball. Bangod sa halimbawa sang iya nanay, nagtuon man sia sing Biblia

Eduard Zhinzhikov

• Natawo: 1971 (Zadnya, Bryansk Region)

• Biograpiya: Nag-obra sia bilang welder kag dyanitor, kag ginapaobra man sia sang mga pulis. Miembro man sia sadto sang isa ka banda. Sang 1993, ginpakaslan niya ang iya upod sa banda nga si Tatyana. Nanamian sia maghimo sing mga binalaybay kag maggitara

• Antes sang tuig 2000, nagtuon sia sa Biblia kag nakita niya ang sabat sa iya mga pamangkot. Bangod sini, ginbag-o niya ang iya kabuhi kag nangin mas malipayon ang iya pamilya. Nagdayaw gid sa sini si Tatyana amo nga nangin isa man sia ka Saksi

Sang Hunyo 11, 2019, gin-raid sang mga pulis ang 22 ka balay sang mga Saksi sa Bryansk Region sa Russia. Gin-aresto nila si Sister Shamsheva kag si Sister Olga Silaeva. Ang kada isa sa ila ginpriso sing 245 ka adlaw bisan wala pa sila mabista. Ginpagua sila sang Mayo 2020 kag nakapauli sa ila mga balay samtang nagahulat sang desisyon sa ila kaso.

Sang Oktubre 6, 2019, ginpasakaan sang mga pulis sang kaso kriminal si Brother Vladimir Khokhlov kag si Brother Eduard Zhinzhikov. Ang ila kaso gintingob sa kaso nanday Sister Shamsheva kag Sister Silaeva. Pagligad sang pito ka adlaw, ining duha ka brother ginpriso bisan wala pa sila mabista, kag ara sila gihapon sa prisuhan asta subong.

Ining duha ka sister gin-interbyu sa 2020 Update sang Nagadumala nga Hubon #5. Si Sister Silaeva nagsiling nga bangod sa walo ka bulan niya nga pagtener sa pretrial detention, nangin kumbinsido pa gid sia nga “bisan ano kabudlay sang sitwasyon, nagahatag gid pirme si Jehova sing bastante nga balaan nga espiritu para malampuwasan naton ang bisan ano nga pagtilaw.” Si Sister Shamsheva positibo man nga nagsiling: “Si Jehova pirme gid malapit sa aton, pirme niya kita ginasakdag, ginapabakod, kag ginabuligan.”

Nagasalig kita nga padayon nga buligan ni Jehova ang tanan naton nga kauturan sa Russia nga ara sa katalagman nga mapriso ukon ginapriso na subong, para padayon nila nga mabatas ang mga pagtilaw nga may kalipay kag paghidait.—1 Corinto 10:13.