Sang Abril 22, 2021, nagdesisyon ang Sychyovskiy District Court of the Smolensk Region nga guilty sanday Sister Nataliya Sorokina kag Sister Mariya Troshina kag ginsentensiahan sila sing anom ka tuig nga suspended prison.

Nataliya Sorokina

• Natawo: 1975 (Dresden, Germany)

• Biograpiya: Halin sa Germany, nagsaylo sia sa Saint Petersburg kag dayon sa Sychyovka sa Smolensk Region. Nagatrabaho sia bilang isa ka nars. Nanamian sia maghimo sing mga handicrafts kag magtuon sing sarisari nga lenguahe para mas madamo nga tawo ang iya masugiran sang kamatuoran. Nagtuon sia sing Biblia upod sa mga Saksi ni Jehova. Nagdayaw gid sia sa iya natun-an parte sa pagpanuga kag sa paglaum sa palaabuton. Bangod sini, gusto gid niya nga mag-alagad sa Dios. Nabawtismuhan sia sang Agosto 1994

Mariya Troshina

• Natawo: 1977 (Saint Petersburg)

• Biograpiya: Halin sang bata pa sia, mahilig na sia magtuon parte sa kasaysayan. Nagtrabaho sia bilang tour guide. Nanamian sia magtuon sing sarisari nga lenguahe para mas madamo nga tawo ang iya masugiran sang kamatuoran

  Nagtuon sia upod sa mga Saksi ni Jehova. Nagdayaw gid sia sang natun-an niya nga ang Biblia sibu gid pirme sa kasaysayan kag sa science. Gindedikar niya ang iya kabuhi kay Jehova nga Dios sang Hulyo 1991. Ang iya nanay, nga napatay na, nagtuon man sa Biblia kag nabawtismuhan

Sang Oktubre 7, 2018, gin-raid sang mga pulis kag sang mga agent sang Federal Security Service (FSB) ang apat ka balay sa Sychyovka. Ginpanguha sang mga FSB ang personal nga mga pagkabutang sang 17 ka kauturan, lakip ang mga menor-de-edad pa. Gin-aresto nila si Sister Nataliya Sorokina kag si Sister Mariya Troshina kag gin-detain.

Si Mariya nagsiling nga ang pagbasa sang mga sugilanon sang kabuhi sang iban nga mga Saksi nga gin-aresto man bangod sa sila pagtuo, nakabulig sa iya nga makahanda sa sini nga pag-raid. Nagsiling sia: “Kalmado gid ako sang adlaw nga gin-raid kami kag gin-aresto ako. Wala ko gid nabal-an nga may amo sini nga kalinong sa akon tagipusuon. Nangin posible lang ini bangod sa balaan nga espiritu sang Dios.”

Duha ka adlaw pagkatapos sang pag-raid, nagmando ang Leninskiy District Court sa siudad sang Smolensk nga ibutang sa pretrial detention ang aton duha ka sister. Napriso sila diri sing 191 ka adlaw. Dayon, gin-house arrest sila sing sobra sa anom ka bulan.

Ining duha naton ka sister nagsiling nga nakabatas sila bangod sang ila maayo nga kaangtanan kay Jehova antes pa nag-abot ang pagtilaw. Si Nataliya nagsiling nga importante gid nga tamdon ang mga nagakatabo suno sa pagtamod ni Jehova. Nagsiling man sia nga sa tion sang pagtilaw, indi gid naton dapat pagkalimtan kon sin-o ang kabangdanan sang paghingabot. “Si Satanas ang ara sa likod sang tanan nga paghingabot sa katawhan sang Dios, kag tanan kita may kahigayunan nga pamatud-an ang aton katutom sa Dios,” siling niya.

Si Mariya nagdugang: “Nagasuod kita kay Jehova bangod sa aton mga ginahimo adlaw-adlaw. Gani, importante gid nga panilagan naton kon paano kita ginabuligan kag ginaatipan ni Jehova kada adlaw. Tun-i nga magsalig sa iya sa tanan nga bahin sang imo kabuhi. Himua nga batasan ang pagbasa sang Biblia adlaw-adlaw, mangin pamilyar sa mga hitabo sa Biblia, kag sauluha ang imo paborito nga mga teksto.”

Ang pagtuo kag pagbatas sang aton mga sister, maayo gid nga halimbawa para sa aton. Kay man, padayon sila nga ‘nagasalig kay Jehova bilang ila bulig kag ila taming.’—Salmo 115:11.