Sang Pebrero 25, 2019, isa ka aplikasyon nga nagakinahanglan sing gilayon nga aksion ang ginpasaka sa European Court of Human Rights (ECHR) para kay Brother Sergey Loginov, nga isa sa pito ka brother nga gin-torture sang mga opisyal sa siudad sang Surgut, sa katundan sang Siberia. Ang anom sa sining mga brother nga gin-torture ginpagua na, pero si Brother Loginov ginpriso sugod sang gin-aresto sia bisan wala sia mabista kag wala pa mapabulong sa doktor ang iya mga samad.

Sang Pebrero 26, isa lang ka adlaw sa tapos nga ginpasaka ang aplikasyon, ang ECHR nagdesisyon pabor sa aton. Gin-ugyunan sang Korte ang pangabay, kag ginmanduan sini ang Russia nga “gilayon” nga ipatan-aw si Brother Loginov sa mga doktor nga wala nagatrabaho sa gobierno, para mabal-an kon daw ano nga halit sa “pisikal kag mental” ang iya gin-antos kag kon bala puede sia makapabilin sa prisuhan asta nga madesisyunan ang kaso. Dapat matuman sang gobierno sang Russia ini nga mando antes sang Marso 11, 2019.

Ang amo sini nga mga desisyon ginahimo lamang sang ECHR sa serioso katama nga mga sitwasyon, kon ang indibiduwal posible nga mabutang sa katalagman kon wala sing himuon nga gilayon nga aksion. Makalilipay nga ang ECHR naghimo sing desisyon kag madasig ini nga ginpatuman—isa lang ka adlaw sa tapos nga ginpasaka ang aplikasyon. Ang ECHR nagsiling nga bantayan gid sini ang pag-abuso nga gin-antos sang aton kauturan.

Subong, 19 ka Saksi ang ginpasakaan sang kaso kriminal sa Surgut, kag 3 sa ila ang ginpriso bisan wala pa mabista.

Samtang padayon kita nga nagapangamuyo sing hanuot kay Jehova para sa aton mga kauturan, kabay nga dumdumon naton pirme ang nagapasalig nga mga pinamulong ni Jeremias: “Pakamaayuhon ang tawo nga nagasalig kay Jehova, nga ang iya ginasaligan amo si Jehova.”—Jeremias 17:7.