Suno sa official press release, gin-raid sang armado nga mga pulis sa Russia ang 110 ka balay sang aton mga kauturan sa Voronezh Region sang Hulyo 13, 2020. Amo ini ang pinakadamo nga balay sang mga Saksi ni Jehova nga gin-raid sa sulod lang sang isa ka adlaw sugod sang 2017. Ang duha ka brother nga sanday Aleksandr Bokov kag Dmitrii Katyrov ginkastigo kag ginpakahuy-an bangod wala nila ginhatag sa mga pulis ang password sang ila mga cellphone.

Ang Leninsky District Court sang Voronezh amo ang nagmando sining dulungan nga pagpang-raid. Gin-raid sang mga pulis ang mga balay sa indi magnubo pito ka siudad, banwa, kag baryo sa rehiyon. Madamo sa aton mga kauturan ang gindala sa lokal nga opisina sang Investigative Committee para interogahon.

Pagkaaga, Hulyo 14, 2020, nagmando ang Leninsky District Court nga prisuhon asta sa Septiembre 3, 2020, ang pulo ka kauturan bisan wala pa sila mabista. Sila amo sanday: Aleksei Antiukhin nga 44 anyos, Sergey Bayev nga 47 anyos, Iurii Galka nga 44 anyos, Valeriy Gurskiy nga 56 anyos, Vitalii Nerush nga 41 anyos, Stepan Pankratov nga 24 anyos, Igor Popov nga 54 anyos, Evgenii Sokolov nga 44 anyos, Mikhail Veselov nga 51 anyos, kag Anatoliy Yagubov nga 51 anyos.

Bisan pa nga suno sa report 110 ka balay ang gin-raid, 100 pa lang ka Saksi nga pamilya ang nagkompirmar nga gin-raid ang ila mga balay kag propiedad, gani mahimo magdugang pa ini nga kadamuon. Mabudlay kontakon ang tanan nga kauturan nga gin-raid ang mga balay bangod ginpanguha sang mga pulis ang ila mga telepono kag mga kompyuter.

Sang Pebrero 10, 2020, may gin-raid man nga 50 ka balay sa Transbaikal Territory, nga amo ang ikaduha sa pinakadamo nga balay sang mga Saksi ni Jehova nga gin-raid sa sulod lang sang isa ka adlaw. Sobra 1,000 na ka balay sang aton mga kauturan ang gin-raid sugod sang nagdesisyon ang Supreme Court sang 2017 nga i-ban ang aton mga hilikuton.

Wala na kita natingala sa sining mapintas nga mga paghingabot batok sa aton mga kauturan sa Russia kag sa iban pa nga pungsod bangod gintagna na ini sa Biblia. Padayon kita nga nagapangamuyo para sa aton mga kauturan, kag nagasalig nga hatagan sila ni Jehova sang balaan nga espiritu nga kinahanglan nila para makapabilin nga matutom.—1 Pedro 4:12-14, 19.