Siam lang ka adlaw sa tapos sang indi makatarunganon nga sentensia sang korte sa Russia kay Dennis Christensen, mga pito ka Saksi ni Jehova ang gin-torture—ginkuryente, ginpuot, kag ginkastigo—sang Russian nga mga imbestigador sa siudad sang Surgut sa katundan sang Siberia. Samtang gina-torture nila ang aton mga kauturan, ginapilit sila sang mga opisyal nga isugid kon diin ginahiwat ang ila mga miting kag kon sin-o ang iban pa nga mga Saksi.

Ini nga insidente nagsugod sang nagpang-raid ang mga awtoridad sang Surgut sang kaagahon sang Pebrero 15, 2019. Gin-aresto nila ang pila ka Saksi kag gindala sila sa mga opisina sang Investigative Committee, dayon gin-interogar nila ang aton mga kauturan, nga wala gid nanugid sang bisan ano nga detalye parte sa ila mga masigkasumilimba. Isa lang ang abogado nga ato didto, kag sang nakalakat na sia, ang mga biktima nagreport nga natabo ang masunod: ginputos sang mga imbestigador ang ila ulo sang plastik kag ginbutangan ini sing tape, gingapos ang ila mga kamot sa likod, kag ginkastigo sila. Dayon sa tapos nila gin-ubahan ang mga Saksi kag ginbubuan sing tubig, ginkuryente sila sang mga imbestigador paagi sa stun gun. Ining mapintas nga pag-torture naglawig sing mga duha ka oras.

Mga tatlo ka Saksi ang ara gihapon sa prisuhan. Ang iban nga ginpagua nagkadto dayon sa doktor para ipabulong ang ila mga samad kag nagpasaka sing reklamo sa natungdan nga mga ahensia.

Dugang pa, sa tapos sang ila pagpang-raid, ginpasakaan sang mga awtoridad sang Russia ang 19 ka Saksi bangod sa sayop nga panumbungon nga “pagpakigbahin sa hilikuton nga batok sa gobierno” kag “pag-organisar sang isa ka organisasyon nga batok sa gobierno.”

Ining makakulugmat nga pag-abuso sang awtoridad dapat silutan base sa Russian Criminal Code. Dugang pa, dapat tumanon sang Russian Federation ang mga kasuguan sang pila ka internasyonal nga organisasyon nga nagaamlig sang mga indibiduwal batok sa pag-torture. Gani, himuon naton ang tanan nga paagi para makuha ang hustisya sa sini nga krimen, sa Russia kag sa iban nga korte sa bilog nga kalibutan.

Labaw sa tanan, nakahibalo kita nga nakita ni Jehova ang paghingabot sa aton mga kauturan sa Russia kag magapanghikot sia bilang ila ‘manugbulig kag manluluwas.’—Salmo 70:5.