Sang Hulyo 2, 2019, ang korte sa Krasnoyarsk, Russia, nagdesisyon nga untaton na ang pag-house arrest kay Brother Andrey Stupnikov. Bisan pa sini, nagapadayon ang kaso kriminal nga ginpasaka batok sa iya.

Sang Hulyo 3, 2018, nag-check in sa Krasnoyarsk International Airport ang mag-asawa nga Stupnikov para sa ila flight sina nga aga. Ginpalapitan kag gin-aresto sang duha ka agent sang Federal Security Service si Brother Stupnikov. Ginpriso sia sing walo ka bulan bisan wala pa mabista kag gin-house arrest sang katapusan sang Pebrero 2019.

Suno kay Brother Stupnikov, madamo gid sia sing natun-an parte sa iya kaugalingon kag sa iya relasyon kay Jehova sa nagligad nga tuig. Nagsiling sia: “[Si Olga kag ako] pila ka tuig na nga mga Saksi ni Jehova, pero subong lang nga nangin amo sini kasuod ang amon relasyon kay Jehova! Sa sining pinakamabudlay nga tion, nabatyagan ko gid, kag padayon ko nga nabatyagan, ang presensia kag suporta sang aton Amay. Daw indi ako makapati nga amo sia sini kasuod sa akon kag kon daw ano kadasig niya nga ginasabat ang akon mga pangamuyo!”

Si Brother Stupnikov nagdugang: “Mas labi pa gid ako nga nangin kumbinsido nga kilala ako sang akon Amay kag naintiendihan niya ang akon ginabatyag. Ini nga eksperiensia nakabulig sa akon nga magsalig pa gid sa iya kag indi magkabalaka sing sobra parte sa paghingabot. Mas makahaladlok kon madula ko ining suod nga relasyon kay Jehova. Kumbinsido ako nga kon kaupod naton sia maatubang naton ang bisan ano.”

Ang nagalaba nga listahan sang mga kaso kriminal batok sa aton kauturan sa Russia naglab-ot na sa 217 sang Hulyo 1. Sa pila ka kaso, ginbuhinan sang mga awtoridad sang Russia ang silot sa pila naton ka kauturan. Pero, wala kita nagasalig sa tawhanon nga mga korte ukon mga opisyal—ara kay Jehova ang aton pagsalig. Nagapangamuyo kita nga padayon nga pabakuron kag proteksionan ni Jehova ang tanan naton nga masigkatumuluo sa Russia.—Salmo 28:7.