Ilkham Karimov

• Natawo: 1981 (Jomboy, Uzbekistan)

• Biograpiya: Manughimo sia sang botelya. Madamo sia sing trabaho para suportahan ang iya pamilya sa Uzbekistan. Nagsaylo sia sa Russia sang 2000. Isa ka adlaw sang 2001, nangamuyo sia sing bulig sa Dios. Pagkasunod nga adlaw, nakilala niya ang mga Saksi ni Jehova kag nagtuon sia sing Biblia. Nabawtismuhan sia sang 2004. Sang 2012, napangasawa niya si Yulia

Konstantin Matrashov

• Natawo: 1988 (Prokopyevsk)

• Biograpiya: Bata pa sia sang napatay ang iya amay. Isa sia ka mekaniko. Ginasuportahan niya ang mga kinahanglanon sang iya iloy. Nabawtismuhan ang iya iloy sang walo pa lang sia ka tuig. Nanamian gid sia sa ginasugid sang Biblia nga paglaum. Nabawtismuhan sia sang 2018

Vladimir Myakushin

• Natawo: 1987 (Nizhnekamsk)

• Biograpiya: Naggradweyt sia sa isa ka technical school kag engineering academy. Nagatrabaho sia bilang lead engineer sa isa ka kompanya nga nagapanghimo sang wiring para sa mga salakyan. Nagdayaw gid sia sa Biblia kay puno ini sang kaalam, maathag ini, kag mapatihan gid ang ginatudlo sini. Nabawtismuhan sia sang 2013. Napangasawa niya si Svetlana sang 2017

Aydar Yulmetyev

• Natawo: 1993 (Nizhnekamsk)

• Biograpiya: Sagad sia sa music kag isa sia ka mekaniko sang salakyan. Isa man sia ka negosyante. Natalupangdan niya nga nakabulig gid ang mga prinsipio sang Biblia sa iya mga ginikanan, gani nagtuon man sia sing Biblia. Nabawtismuhan sia sang 2012. Napangasawa niya si Albina sang 2013. Nagpangindi sia nga magsoldado bangod indi magsugot ang iya nahanas sa Biblia nga konsiensia nga himuon ini. Sa baylo, naghimo sia sing alternative civilian service

Sang Mayo 27, 2018, gin-raid sang mga pulis sa siudad sang Tatarstan ang pulo ka balay sang mga Saksi ni Jehova. Pagkatapos sini, gindala nila si Ilkham, si Konstantin, si Vladimir, kag si Aydar sa pretrial detention. Tanan sila nagtener sa detention center sing sobra 160 ka adlaw. Dayon, gin-house arrest sila.

Natapos na ang pag-house arrest sa ila, pero nalakip gihapon ang ila ngalan sa listahan sang mga “extremist” sa Russia. Ang korte nagdesisyon man nga indi sila puede maghalin sa ila lugar. Bangod sini, nabudlayan sila mag-withdraw sang ila kuarta sa banko. Nabudlayan man sila mangita sing obra.

Amo ini ang ginsiling ni Aydar sang ara pa sia sa pretrial detention: “Madamo nga mga teksto sa Biblia ang nagasulod sa pensar ko. . . . Ginbuligan gid ako ni Jehova nga madumduman ang madamo nga butang. Indi ko gid ini madumduman kon wala niya ako ginbuligan.”

Nakulbaan gid si Konstantin pagsulod niya sa detention facility. Gani, nangita sia dayon sing paagi para magkalma sia. Ginpanaksihan niya ang mga opisyal sang korte, mga guardia, ang iban nga mga priso, mga pulis, kag ang mga warden. Amo ini ang iya ginsiling: “Mas madamo ako sing napanaksihan sang gin-detain ako sangsa tion nga ara pa ako sa gua. Pareho ini sa ginsiling ni Pablo sang unang siglo sa Filipos 1:12, 13: ‘Karon luyag ko nga mahibaluan ninyo, mga kauturan, nga ang akon kahimtangan nagresulta sa pag-uswag sang maayong balita, amo nga ang akon mga gapos sang pagkabilanggo tungod sa Cristo nahibaluan sang tanan nga Guardia sang Pretorio kag sang iban pa.’”

Naapresyar gid ni Vladimir ang pagbulig sang mga kauturan. Nagsiling sia: “Ginsugid sang akon asawa sa akon nga pirme sia ginahatagan sang amon mga abyan sing kuarta para makapanindahan sia kag ipadala sa akon. May limit sa detention center kon pila lang ang mabaton ko kada bulan, kag sa masami nagalab-ot sa limit ang mabaton ko.”

Ginsugid ni Ilkham nga nagsuod pa gid sia kay Jehova. Nagsiling sia: “Bangod sa sini nga kaso, nagsuod pa gid ako sa akon langitnon nga Amay. Mas nagsalig pa gid ako sa Iya. Isa pa, pirme na ako subong nagapangamuyo kay Jehova kag mas malawig na ini kag ginahambal ko na sa iya ang tanan ko nga ginabatyag.”

Kabalo kita nga pakamaayuhon gid ining mga brother kag ang ila pamilya bangod sa ginpakita nila nga “diosnon nga debosyon kag pagkaserioso.”—1 Timoteo 2:2.