Sa indi madugay, ipahibalo sang Industrial District Court of Smolensk ang desisyon sini sa kaso nanday Brother Yevgeniy Deshko, Brother Ruslan Korolyov, kag Brother Valeriy Shalev. a Gusto sang piskal nga sentensiahan si Yevgeniy kag si Ruslan nga mapriso sing siam ka tuig kag si Valeriy naman walo ka tuig. Si Brother Viktor Malkov, nga ginkasuhan man, napatay antes matapos ang pag-hearing sa ila kaso.

Yevgeniy Deshko

• Natawo: 1989 (Sochi)

• Biograpiya: Nagatrabaho sia bilang massage therapist. Isa man sia ka drayber, kag elektrisyan. Mga Saksi ang iya mga ginikanan. Ginarespeto gid niya ang mga kasuguan nga mabasa sa Biblia. Gani, sang ginpatawag sia nga magsoldado, nangindi sia. Nabawtismuhan sia sang 2012. Halin sang 2012 asta sang 2014, naghimo sia sing alternative civilian service bilang isa ka assistant sa isa ka ospital

Ruslan Korolyov

• Natawo: 1982 (Smolensk)

• Biograpiya: Sang bata pa sia, nanamian gid sia mangay-o sang mga gadyet. Sang ulihi, nangin mekaniko sia. Nangin soldado sia sang Russia. Nagtuon sia sing Biblia upod sa mga Saksi ni Jehova kag nanamian gid sia sa mga kamatuoran sa Biblia. Nabawtismuhan sia sang 2004

Viktor Malkov

• Natawo: 1959 (Smolensk)

• Biograpiya: Isa sia ka mekaniko, panday, kag manugkay-o sang atop. Napangasawa niya si Vera sang 1992. Sang bata sia, nanamian sia maghampang sing soccer. Ginaatipan niya ang iya utod nga lalaki nga indi na masyado makakita

  Kilala sia nga isa ka mapintas nga tawo, kag amo ini ang rason kon ngaa napriso sia sing pito ka tuig. Diutayan lang sila magdiborsio sang iya asawa. Sang nagtuon sia sing Biblia upod sa mga Saksi ni Jehova, nangin mabuot sia nga tawo, ginasunod na niya ang mga kasuguan sang gobierno, kag nangin maayo na sia nga bana. Nabawtismuhan sia sang 2008. Napatay sia sang Abril 26, 2020

Valeriy Shalev

• Natawo: 1977 (Yartsevo)

• Biograpiya: Sang bata sia, nagtuon sia sing English. Naggradweyt sia sa isa ka military school. Nagsaylo sila sa Far East sang Russia para magtrabaho bilang accountant sang mga soldado. Nag-untat sia sa pagkasoldado kag pagkatapos sini nagtrabaho sia bilang financial consultant. Sang 1999, napangasawa niya si Svetlana, nga nakilala niya sang college sia, kag gin-adoptar niya ang apat ka tuig nga bata nga lalaki ni Svetlana. Nagahampang sia gihapon sing soccer kag nanamian magdalagan

  Nagtuon sing Biblia ang iya iloy upod sa mga Saksi ni Jehova kag ginasugiran sia sang iya iloy sang mga natun-an niya. Gintinguhaan niya nga palas-ayon ang iya iloy. Pero sang ulihi narealisar niya nga amo gid man ini ang kamatuoran. Nabawtismuhan sia sing 2002

Ang paghingabot sa Smolensk nagsugod antes pa gin-ban sang Supreme Court sang 2017 ang hilikuton sang mga Saksi ni Jehova sa Russia. Sang Disiembre 18, 2016, gin-raid sang 15 ka armado nga pulis ang miting sang kongregasyon sa isa ka Kingdom Hall sa Smolensk. Mga 60 ka kauturan ang nagtambong sadto nga miting. Sa sini nga pag-raid, ang mga pulis may gin-planted nga mga publikasyon nga ginakabig sang gobierno sang Russia nga mga “extremist material.” Dayon nagsiling sila nga “nakita” nila kuno ini nga mga publikasyon didto.

Pagkatapos sini, sunodsunod nga pagpang-raid, pagpang-aresto, kag pagpangpriso ang natabo sang 2018 asta sang 2019. Sang Abril 25, 2019, gin-raid sang mga pulis ang pila ka balay kag gin-aresto sanday Brother Ruslan Korolyov, Brother Valeriy Shalev, kag Brother Viktor Malkov. Ginpamangkot ni Viktor ang mga pulis: “Pito ako ka tuig nga napriso kay nagapamintas ako, dayon nangin Saksi ako ni Jehova. Subong, prisuhon n’yo naman ’ko bangod . . . nagabantala ako sang maayong balita?”

Si Brother Yevgeniy Deshko gin-aresto kag gin-detain pila ka adlaw sa tapos sang pag-aresto sa iban nga mga brother. Si Yevgeniy nagsiling: “Kabalo na ’ko nga matabo gid ini sa akon, gani ginhanda ko na nga daan ang akon kaugalingon.” Napalig-on gid sia sa ginsiling ni Jehova kay Josue: “Magpakaisog ka kag magpakabakod. Indi ka mahadlok, kay kaupod mo si Jehova nga imo Dios bisan diin ka magkadto.” (Josue 1:9) Nagsiling si Yevgeniy: “Sa sina nga teksto ginapalig-on kita ni Jehova nga dapat kita mangin maisog, kag nagpromisa sia nga buligan niya kita.”

Sang gin-detain si Ruslan, nagsiling sia nga ginpamalandungan niya ang ginsiling ni Jesus sa Mateo 6:34. Sa baylo nga pamensaron ang posible matabo, nagsiling si Ruslan: “Nangin masako ako sa paghimo sang mga sulat, pagbasa sing Biblia, kag pagsugid sang kamatuoran sa kaupod ko nga mga priso. Gani, wala na ako sing oras para magkabalaka.”

Sang Marso 2020, ginbuhinan ni G. P. Bezrukov nga isa ka imbestigador sang Federal Security Service (FSB), ang restriksion sa apat ka brother, amo nga gin-untat na ang pag-house arrest sa ila. Mga isa man ka tuig sila nga napriso kag gin-house arrest. Ginsunod gid sang matutom naton nga mga brother ang gobierno kag maayo gid ang ila paggawi sang ginpriso sila. Amo ini ang rason kon ngaa ginbuhinan ang restriksion sa ila. Nagapati ang imbestigador nga bisan pa buy-an sila, mahimo gihapon sang imbestigador ang iya trabaho kag sigurado sia nga indi sila malagyo ukon magbato kon interogahon sila liwat.

Ang masubo kay wala magdugay pagkatapos sini, napatay si Viktor. Suno sa report, nagmasakit sing grabe si Viktor kag sang ulihi napatay. Kag madamo ang nagapati nga bangod ini sa indi maayo nga sitwasyon sa pretrial detention kag sa stress nga naeksperiensiahan niya samtang gina-hearing ang ila kaso.

Determinado gid si Ruslan, si Valeriy, kag si Yevgeniy nga sundon ang halimbawa ni Viktor kag sang iban pa nga nangin matutom asta nga napatay sila. Bangod nangin suod pa gid sila kay Jehova, nabatas nila ang paghingabot kag nangin malipayon bisan pa sang kabudlayan nga ila naeksperiensiahan.

Si Valeriy nagsiling: “Sang napriso ako, mas nangin suod pa gid ako kay Jehova. Subong pa lang gid nga amo ako sini ka suod sa iya. Pirme ko ginabasa ang Biblia. Indi gid nami kon ara ka sa prisuhan. Pero kon naagwanta gani ini sang mga tawo nga wala sila ginabuligan ni Jehova, sigurado nga mabatas man naton ini kay kabalo kita nga buligan kita ni Jehova.”

Si Yevgeniy nagsiling nga mas nagsalig pa gid sia subong nga ginabuligan kita ni Jehova. Si Yevgeniy nagsiling: “Sigurado ako nga buligan kita sang aton Amay, ilabi na kon nakaeksperiensia kita sing mga pagtilaw. Gani, wala na ko gawa nagakabalaka kon ano nga mga pagtilaw ang maeksperiensiahan ko sa ulihi.”

Bisan ano man ang desisyon sang korte, si Yevgeniy nagsiling: “Himuon ko ang bug-os ko nga masarangan para mabatas ko ining mabudlay nga sitwasyon kag padayon nga mangin matutom.”

Kabalo kita nga buligan gid ni Jehova ining aton mga brother. Gani sigurado kita nga mangin malipayon sila pati na ang ila pamilya samtang ginabatas nila ining mabudlay nga pagtilaw.—2 Tesalonica 3:5.