Sa Pebrero 4, 2020, ginapaabot nga ipahibalo sang Zheleznodorozhniy Court sa siudad sang Khabarovsk sa Russia ang desisyon sini sa kaso nanday Brother Stanislav Kim kag Brother Nikolay Polevodov. Gusto gid sang piskal nga sentensiahan ining duha ka brother nga mapriso sing tatlo ka tuig sa prison work camp. Pero may isa pa ka kaso kriminal nga ginpasaka batok sa ila nga ginabista sa Industrial District Court sa amo gihapon nga siudad.

Sanday Brother Kim kag Brother Polevodov gin-aresto sang Nobiembre 10, 2018. Sina nga adlaw, sobra 50 ka kauturan halin sa Khabarovsk ang nagtipon sa ila gin-arkilahan nga kalan-an para magkaon kag maglingawlingaw. Ang ila pagtipon wala sing labot sa relihion. Wala magdugay nga nakasugod sila, nagsulod sa kalan-an ang madamo kaayo nga mga pulis kag mga imbestigador kag gin-aresto sila tanan. Sanday Brother Kim, Brother Polevodov, kag Brother Vitaliy Zhuk ginpriso sing sobra duha ka bulan bisan wala pa mabista. Dayon, pila ka bulan pa gid sila nga gin-house arrest.

Ang desisyon sa Pebrero 4 para lang sa kaso kriminal batok kanday Brother Kim kag Brother Polevodov, nga ginkasuhan bangod ara sila sa amo nga pagtilipon. Ginpasakaan pa gid sang kaso sanday Brother Kim, Brother Polevodov, kag Brother Zhuk, pati ang tatlo ka sister nga ara man sa pagtilipon. Sa sini nga kaso, sanday Brother Kim kag Brother Polevodov gin-akusar nga nag-organisar sang amo nga pagtilipon. Wala pa mabal-an kon san-o desisyunan ini nga kaso.

Indi kinaandan ang kaso nanday Brother Kim kag Brother Polevodov bangod ginpasakaan sila sang kaso kriminal nga dungan nga ginabista sa duha ka korte. Nagdesisyon ang mga imbestigador nga indi pagtingbon ang kaso, gani sanday Brother Kim kag Brother Polevodov kinahanglan magtambong sa duha ka pagbista sa duha ka regional court sa Khabarovsk.

Ining duha ka brother pareho nga may asawa kag mga kabataan nga ara pa sa ila poder. Kabalo kita nga padayon nga hatagan ni Jehova sing balaan nga espiritu ining aton pinalangga nga mga brother kag ang ila mga pamilya para magbantay sang ila tagipusuon kag ikasarang sa paghunahuna agod makapabilin sila nga matutom bisan pa may mga pagtilaw.—Filipos 4:7.