PEBRERO 24, 2020
RUSSIA
Ginabuligan sang mga Kauturan ang mga Brother nga Ginkastigo sa Prisuhan sa Russia
Pagkatapos ginreport nga ginkastigo sing todo ang lima ka brother nga ginpriso sa Orenburg, Russia, ang mga kauturan sa sina nga siudad insigida nga nagkadto sa prisuhan para magbulig. Ang ginpriso nga mga brother nga sanday Aleksey Budenchuk, Gennadiy German, Roman Gridasov, Feliks Makhammadiyev, kag Aleksey Miretskiy nagaistar sa Saratov, nga sobra 800 kilometros ang kalayuon halin sa Orenburg.
Si Brother Feliks Makhammadiyev nga nagayuhum, mga duha ka semana pagkatapos sia ginkastigo sing todo sang mga guardia sa prisuhan. Naga-jacket sia para tabunan ang iya mga pilas
Sang Pebrero 15, 2020, naggua sa balita sa internet nga ginkastigo sang mga guardia sang Penal Colony No. 1 sa Orenburg ang lima ka brother halin sa Saratov paagi sa ila mga batuta. Sang nabasa nila ini, ang isa ka grupo sang mga kauturan sa Orenburg nagkadto sa prisuhan. Maisog sila nga nagpakilala bilang mga Saksi ni Jehova bisan pa nabutang sa katalagman ang ila kahilwayan. Ginpamangkot nila ang mga pulis kon kamusta na ang lima ka brother pagkatapos sila ginkastigo. Suno sa report, si Brother Makhammadiyev ang natam-an gid sa pagkastigo kag nasamaran sing grabe gid kag naospital. Gani gusto gid sang mga kauturan sa Orenburg nga mabal-an kon bala buhi pa sia. Naglawig sang halos duha ka oras ang ila pagpakig-istorya sa mga pulis.
Ang mga kauturan sa Orenburg nag-organisar man sang isa ka grupo para padayon nga magbulig sa napriso nga mga brother kag sa ila asawa upod sa ila mga abogado. Ining mga kauturan sa Orenburg pirme nagapadala sang sulat para palig-unon ang mga brother sa prisuhan kag nagdonar pa gani sila sang kuarta para ibakal sang masustansia nga mga pagkaon nga wala sa prisuhan.
Ining gugma kag pagsakripisyo sang mga kauturan nangin mabaskog nga panaksi sa mga empleyado sa prisuhan. Nakita nila ang pag-ulikid sang mga Saksi ni Jehova sa pareho nila nga mga Saksi, bisan pa halin sila sa malayo nga lugar kag indi pa sila kilalahay.
Makapalig-on gid nga makabati sang mga report nga ginatuman sang aton mga kauturan ang laygay sa Hebreo 13:3: “Dumduma ninyo ang mga yara sa bilangguan, nga daw subong nga nabilanggo man kamo upod sa ila, kag ang mga ginapintasan, sanglit kamo pareho man sa ila nga yara sa undanon nga lawas.”
